ថ្ងៃទី​៦មករា ២០២១ ថ្ងៃដែលសភាខុនហ្រ្កេសអាមេរិក ត្រូវអនុម័តទទួលស្គាល់ជ័យជំនះរបស់​លោក ចូ បៃដិន នៅក្នុងការ​​បោះឆ្នោតប្រធានាធិបតី ក្រុមអ្នកគាំទ្រលោកដូណាល់ ត្រាំ រាប់ពាន់នាក់ បានសំរុកចូលយ៉ាងកំរោល​និងហិង្សា ទៅក្នុងវិមាន​កាពីតូល​។ ព្រឹត្តិការណ៍ដ៏ហិង្សានេះ បានធ្វើឲ្យរញ្ជួយស្ថាប័ន​ប្រជាធិបតេយ្យ​អាមេរិក និងបានធ្វើ​ឲ្យពិភពលោក​ស្រឡាំងកាំង ភ្ញាក់ផ្អើលជាខ្លាំង។ កាលពី​ថ្ងៃទី​៩មិថុនា គណៈកម្មការសភាអាមេរិក ដែលទទួល​បន្ទុក​ស៊ើបអង្កេត​សំណុំរឿងនេះ​ បាន​ធ្វើ​បទបង្ហាញជាសាធារណៈ ពីលទ្ធផល​នៃការស៊ើបអង្កេតជាង​១ឆ្នាំ​​​របស់ខ្លួន ។ គណៈកម្មការសភាអាមេរិក បានសន្និដ្ឋានថា ព្រឹត្តិការណ៍ហិង្សាថ្ងៃទី​៦មករា២០២១ គឺជាការប៉ុនប៉ងធ្វើរដ្ឋប្រហារ ផ្តួលរំលំស្ថាប័ន​​លទ្ធិ​ប្រជាធិបតេយ្យ​​​​សហរដ្ឋអាមេរិក ហើយ​មនុស្ស​ម្នាក់ដែលជាមេញុះញង់ ជំរុញឲ្យ​កើត​ហេតុការណ៍នេះ គឺលោក​ដូណាល់ ត្រាំ។