ពិធី​បើកការដ្ឋាន​សាងសង់ ​«ព្រែកជីក​ហ្វូណន​តេជោ»​ ត្រូវបាន​ធ្វើឡើង​យ៉ាងអធិកអធម​នៅថ្ងៃទី​០៥ ខែ​សីហា ឆ្នាំ​២០២៤ ​ដូចការ​គ្រោងទុក​។ ក្រៅពីរៀបចំ​នៅក្នុង​ទឹកដី​ខេត្តកណ្តាល ​ពិធីនេះ​ក៏បាន​រៀបចំ​ធ្វើនៅតាម​ទីតាំងតូចៗ​ជាច្រើនទៀត​នៅទូទាំង​ប្រទេស ដូចជា​នៅតាមសាលារៀន​ វត្តអារាម ​ស្ថាប័ន​សាធារណៈ ទីផ្សារ ​និង​សហគ្រាសឯកជន​។ តាមរយៈ​ពិធីដ៏គគ្រឹកគ្រេង​បែបនេះ​ត្រូវបានអ្នកវិភាគ​ខ្លះមើលឃើញ​ថា​ គឺជាការ​រំលេចឡើង​នូវរូបភាព​នយោបាយ​របស់គណបក្ស​កាន់អំណាច។​ តែអ្នកវិភាគ​ខ្លះទៀត​យល់ថា ​គឺជា​ព្រឹត្តិការណ៍​ប្រវត្តិសាស្ត្រ​ ដែលមាន​គុណតម្លៃ​ពិសេសជាង​ព្រឹត្តិការណ៍ធំៗ​ផ្សេងទៀត​។