កម្ពុជា​កំពុងសិក្សាពី​លទ្ធភាព​បង្កើតច្បាប់​ស្ដីពីការ​ជ្រៀតជ្រែក​ពីបរទេស ក្នុងគោលដៅ​​រក្សាការពារសន្តិសុខជាតិ​។ នេះ​បើតាម​​អ្នកនាំពាក្យនៃក្រសួងមហាផ្ទៃ ដោយបញ្ជាក់ទៀតថា មន្ត្រីពាក់ព័ន្ធកំពុង​​អាន​និងស្វែងយល់យ៉ាង​ម៉ត់ចត់ អំពី​ឯកសារច្បាប់នេះ។ ជា​ច្បាប់ដែល​មាន​​លំនាំពី​ប្រទេសសឹង្ហបុរី។​ អង្គការ​សង្គមស៊ីវិល​និងមន្ត្រី​សិទ្ធិមនុស្ស​ បាន​សម្តែង​ក្តីព្រួយ​បារម្ភអំពីផលប៉ះពាល់នៃដំណើរការ​អភិវឌ្ឍន៍​សង្គម​ សេដ្ឋកិច្ច​ និង​នយោបាយ​កម្ពុជា ប្រសិនបើ​កម្ពុជាមានច្បាប់នេះមែន។ តែយ៉ាងណាអ្នកវិភាគ យល់ថា​កម្ពុជាគួរតែបង្កើតអោយមានច្បាប់ថ្មីនេះ ដើម្បីរក្សាសន្តិសុខជាតិនិងជៀសវាងពីក្រញាំបរទេសនៅក្នុងល្បែងភូមិសាស្ត្រនយោបាយ។