សង្រ្គាមនៅយេម៉ែន​បាន​ក្លាយ​ជា​ព័ត៌មាន​ក្តៅគគុក នៅ​ថ្ងៃ​អង្គារ​ទី​១៨​មករា បន្ទាប់ពី ក្រុមឧទ្ទាម​ហ៊ូទី នៅប្រទេស​យេម៉ែន​បាន​បើកការវាយប្រហារ​សំដៅ​ព្រលាន​យន្តហោះ នៅ​អាប៊ូ ដាប៊ី របស់​អេមីរ៉ាត អារ៉ាប់រួម ដោយ​សម្លាប់​មនុស្ស​៣នាក់ កាលពី​ថ្ងៃ​ចន្ទ។ ជា​ការសងសឹកវិញ សម្ព័ន្ធ​យោធា​ដឹកនាំ​ដោយ​អារ៉ាប៊ី សាអូឌីត​បាន​បើកប្រតិបត្តិការ​វាយប្រហារ​ទៅលើ​រដ្ឋធានី​សាណា របស់​យេម៉ែន​ដែល​កាន់កាប់​ដោយ​ពួកឧទ្ទាម​ហ៊ូទី នៅ​ថ្ងៃ​ចន្ទ​ដដែល។ តាមទូរទស្សន៍​យេម៉ែន គ្រប់គ្រង​ដោយ​ក្រុមឧទ្ទាម​ហ៊ូទី ការវាយប្រហារ​របស់​សម្ព័ន្ធ​អារ៉ាប់ ដឹកនាំ​ដោយ​អារ៉ាប៊ី សាអូឌីត​បាន​សម្លាប់​មនុស្ស​១៤នាក់។