នៅ​ប្រទេស​ចិន លោកប្រធានាធិបតី ស៊ី ជីនពីង​បាន​ទទួល​រាក់ទាក់ អធិការបតី​អាល្លឺម៉ង់​លោក អូឡាហ្វ ស្ហុល៍ ដែល​ត្រូវធ្វើ​ដំណើរ​ទស្សនកិច្ច​រយៈពេល ១ថ្ងៃ នៅទីក្រុង​ប៉េកាំង នៅថ្ងៃ​សុក្រទី ៤​វិច្ឆិកានេះ។ អមដំណើរ​ដោយ​គណៈប្រតិភូអាល្លឺម៉ង់ ប្រមាណ ៦០នាក់ ដែលភាគច្រើន​ជា​អ្នកជំនួញ ប្រធានក្រុមហ៊ុន​ផលិតរថយន្ត​អាល្លឺម៉ង់ លោកនាយករដ្ឋមន្រ្តី អូឡាហ្វ ស្ហុល៍ ធ្វើដំណើរ​ទៅ​ជួប​ប្រមុខដឹកនាំ​ចិន ក្នុង​បំណង​ពង្រឹង​សហប្រតិបត្តិ​សេដ្ឋកិច្ចរវាងអាល្លឺម៉ង់ ដែលជាក្បាលម៉ាស៊ីន​សេដ្ឋកិច្ច​របស់អឺរ៉ុប និង​ចិនដែលជាមហាអំណាច​សេដ្ឋកិច្ចពិភពលោក​ទី២។ យ៉ាងណាក៏ដោយ ទស្សនកិច្ច​រយៈពេល​ដ៏ខ្លី របស់​ប្រមុខរដ្ឋាភិបាល​អាល្លឺម៉ង់ នៅ​ទីក្រុង​ប៉េកាំង មិនត្រូវ​បាន​គេ​មើលឃើញ​ក្នុង​ផ្លូវល្អ​ទេ ទាំង​នៅក្នុងចំណោម​មតិ​អាល្លឺម៉ង់ និង​អឺរ៉ុប។