រដ្ឋសភា​កម្ពុជា ​នឹងបើក​កិច្ចប្រជុំ​នៅថ្ងៃទី២០​ ខែ​កញ្ញា ឆ្នាំ​២០២៤​ស្អែក ដោយមាន​របៀបវារៈ​សំខាន់​មួយគឺការបោះឆ្នោត​ផ្តល់សេចក្តីទុកចិត្ត​លើការកែសម្រួល​សមាសភាពសមាជិក​រាជរដ្ឋាភិបាល​ចំនួន២រូប​។ ​ក្នុងនោះត្រូវបាន​គេដឹងក្រៅផ្លូវការ​នៅឡើយថា ​នឹងមាន​ការផ្លាស់ប្តូរ​ការងារគ្នាទៅវិញ​ទៅមក​រវាងរដ្ឋមន្ត្រី​ក្រសួង​ទេសចរណ៍ ​និង​រដ្ឋមន្ត្រី​ក្រសួង​អធិការកិច្ច។ ​អ្នកវិភាគ​សង្គម និង​នយោបាយ​នានា​មើលឃើញថា​ជាដំណើរការ​ប្រព្រឹត្តទៅ​ធម្មតារបស់​រដ្ឋាភិបាល​ស្របតាម​រដ្ឋធម្មនុញ្ញ ​សំដៅ​ពង្រឹង​បន្ថែមទៀត​នូវ​សមត្ថភាព​ការងារ​។ ​ក៏ប៉ុន្តែ​ការសម្រួល​ការងារទៅលើ​រដ្ឋមន្ត្រី​ទទួលបន្ទុក​វិស័យទេសចរណ៍​ហាក់​មានការ​ចាប់អារម្មណ៍​ខ្លាំង ​ដោយសារ​វិស័យទេសចរណ៍​កម្ពុជា​នៅតែ​ជាកម្មវត្ថុ​នៃ​ការចោទសួរ​នៅឡើយ​។