យោងតាមការស្ទង់មតិមួយរបស់អង្គការតម្លាភាពកម្ពុជា ពលរដ្ឋខ្មែរដែលចាប់អារម្មណ៍ខ្លាំងទៅលើកិច្ចការនយោបាយក្នុងប្រទេសមានត្រឹមតែ១៧ភាគរយប៉ុណ្ណោះ ខណៈ៨២ភាគរយទៀតចាប់អារម្មណ៍តិចតួចឬគ្មានទាល់តែសោះ។ បើតាមការ​ស្ទង់​មតិនេះ យុវជនខ្មែរដែលចាប់អារម្មណ៍ផ្នែកនយោបាយភាគច្រើនគឺជាបុរសមានការអប់រំខ្ពស់នៅទីប្រជុំជន។ ក្រុមអ្នកតាមដានសង្គម យល់ថា កត្តាដែលធ្វើឱ្យពលរដ្ឋខ្មែរមិនខ្វល់ខ្វាយរឿងនយោបាយអាចដោយសារហេតុផលច្រើនយ៉ាងណា។ តែហេតុផលចម្បង គឺការខ្លាចរអានិងការគំរាមកំហែងពីអាជ្ញាធរ។ ប៉ុន្តែអ្នកនាំពាក្យរដ្ឋាភិបាលវិញ អះអាងថា កម្ពុជាផ្តល់សេរីភាពផ្នែកនយោបាយ​ហូរហៀរទៅហើយ។