ឆ្នាំ២០២១​បានបិទបញ្ចប់​ទៅ​ជាមួយ​នឹង​ស្ថានភាព​កាន់តែ​ដុនដាប​នៃ​វិបត្តិ​កូវីដ ដោយ​ពិភពលោក​ត្រូវ​ប្រឈម​នឹង​ការ​ឆ្លងរាលដាល​សាជាថ្មី ដោយ​មេរោគបំប្លែងខ្លួន​អូមីក្រុង។ នៅតាមបណ្តា​ប្រទេស​ខ្លះ ក្នុងនោះ​ក៏​មាន​ប្រទេស​បារាំង​ផងដែរ ចំនួន​អ្នក​ឆ្លង​ថ្មី​ប្រចាំថ្ងៃ​​បាន​កើនឡើង​ដល់កម្រិតខ្ពស់​ជាងពេលណាៗ​ទាំងអស់។ ក៏ប៉ុន្តែ បើទោះជាយ៉ាងនេះ​ក៏ដោយ ​លោក​ប្រធានាធិបតី​បារាំង​ ក៏ដូចជា ប្រមុខដឹកនាំ​អង្គការ​សុខភាព​ពិភពលោក​ សុទ្ធតែ​បាន​បង្ហាញ​នូវ​សុទិដ្ឋិនិយម​ថា ឆ្នាំ២០២២​នេះ​ យើង​នៅតែ​​អាច​មាន​ច្រក​​ចេញ​ពីវិបត្តិ​កូវីដ​បាន។