របាយការណ៍របស់ក្រសួងបរិស្ថានចេញផ្សាយនៅព្រឹកថ្ងៃសុក្រ ទី២៤ មករានេះឲ្យដឹងថា គុណភាពខ្យល់ក្នុងប្រទេសកម្ពុជាមានភាពល្អប្រសើរ។ តែរាជធានីភ្នំពេញ និងខេត្តចំនួនកំពុងប្រឈមនឹងបញ្ហាខ្យល់ពុល ពិសេសរាជធានីភ្នំពេញដែលស្ថិតក្នុងស្ថានភាពពណ៌ក្រហមដោយមានការកើនឡើងនូវកំហាប់ភាគល្អិតនិចលដែលមានវិជ្ឈមាត្រតូចជាង ឬ ស្មើ ២,៥មីក្រូម៉ែត្រ (PM2.5) នៅក្នុងបរិយាកាស។ ការវាយតម្លៃគុណភាពខ្យល់របស់ក្រសួងបរិស្ថានពេលនេះធ្វើឡើង ក្រោយមានការរិះគន់តាមបណ្តាញសង្គមថា ការផ្តល់ព័ត៌មានស្តីពីគុណភាពខ្យល់មានភាពយឺតយ៉ាវដែលអាចនាំឲ្យមានហានិភ័យដល់សុខភាពប្រជាពលរដ្ឋ។ ក្នុងន័យនេះ អ្នកពាក់ព័ន្ធក្នុងការងារបរិស្ថាន និងអភិវឌ្ឍន៍ស្នើឲ្យរដ្ឋាភិបាលផ្តល់ព័ត៌មានឲ្យបានរហស័ និងច្បាស់លាស់។