ថ្ងៃទី២៧ កញ្ញា​ជា​ទិវា​ទេសចរណ៍​ពិភពលោក។ ទិវា​មួយ​នេះ​ត្រូវ​បាន​បារព្ធ​ធ្វើ​ឡើង​នៅ​ថ្ងៃទី២៧ កញ្ញា​ជា​រៀងរាល់​ឆ្នាំ​តាំង​ពី​ឆ្នាំ ១៩៨០ ដោយ​មាន​ប្រធានបទ​ខុសៗ​គ្នា។ សម្រាប់​ឆ្នាំ ២០២២ ទិវា​ទេសចរណ៍​ពិភពលោក​រៀបចំ​ឡើង​ក្រោម​ប្រធានបទ « ការ​គិតគូរ​ឡើង​វិញ​ពី​ទេសចរណ៍ »។ តាម​រយៈ​ប្រធានបទ​មួយ​នេះ អង្គការ​សហប្រជាជាតិ​ចង់​ដាស់​តឿន​ឲ្យ​គ្រប់​ប្រទេស​ទាំង​អស់​ពិនិត្យ​មើល​ឡើង​វិញ​លើ​ការ​អភិវឌ្ឍន៍​វិស័យ​ទេសចរណ៍​ដោយ​គិតគូរ​ពី​វិស័យ​បរិស្ថាន។ ចូរ​កុំ​ភ្លេច​ថា វិស័យ​ទេសចរណ៍​ក៏​បាន​រួម​ចំណែក​យ៉ាង​សំខាន់​នៃ​ការ​ចាក់​ចោល​ឧស្ម័ន​ផ្ទះកញ្ចក់​នៅ​ក្នុង​បរិយាកាស​ដែរ។