សង្រ្គាម​រុស្ស៊ី​ឈ្លានពាន​អ៊ុយក្រែន​បាន​ឈាន​ចូល​ដល់​ខែ​ទី៧ គិត​តាំង​ពី​ថ្ងៃទី២២ សីហា។ ខណៈ​ដែល​រុស្ស៊ី​កំពុង​បន្ត​សង្រ្គាម​នៅ​អ៊ុយក្រែន ក្រុម​ប្រទេស​លោក​ខាង​លិច ពិសេស​អឺរ៉ុប និង​អាមេរិក​ក៏​កំពុង​បន្ត​ដាក់​ទណ្ឌកម្ម​ប្រឆាំង​រុស្ស៊ី និង​បន្ត​ផ្តល់​ជំនួយ​ឲ្យ​អ៊ុយក្រែន។ តាម​រយៈ​ទណ្ឌកម្ម​ប្រឆាំង​រុស្ស៊ី​ពេល​នេះ បស្ចិមលោក​សង្ឃឹម​ខ្ទប់​ដង្ហើម​សេដ្ឋកិច្ច​របស់​រុស្ស៊ី និង​បង្ខំ​ឲ្យ​រុស្ស៊ី​បញ្ឈប់​សង្រ្គាម​លើ​អ៊ុយក្រែន។ តែ​ផ្ទុយ​ទៅ​វិញ សេដ្ឋកិច្ច​រុស្ស៊ី​ហាក់​មិន​បាន​ដួល​រលំ​ឆាប់​រហ័ស​ដូច​ដែល​បស្ចិមលោក​ចង់​បាន​ទេ។ លើស​ពី​នេះ ទណ្ឌកម្ម​ប្រឆាំង​រុស្ស៊ី​ពេល​នេះ​ហាក់​កំពុង​ជះ​ផលវិបាក​ខ្លាំង​ដល់​បស្ចិមលោក​ខ្លួន​ឯង និង​ពិភពលោក​ទៅ​វិញ។