សង្គមស៊ីវិល អ្នកតាមដានសង្គម និង​អ្នក​នយោបាយ​មួយ​ចំនួន​សាទរ​ដែល​លោកនាយករដ្ឋមន្ត្រី ហ៊ុន ម៉ាណែត គ្រោង​កាត់​បន្ថយ​ឈ្មោះ​ស្ទួន​នៃ​តួនាទី​មន្ត្រី។ នៅ​ចំពោះ​មុខ​កំណើន​ទី​ប្រឹក្សា​ក្នុង​អាណត្តិទី៧​នេះ លោក​នាយករដ្ឋមន្ត្រី ហ៊ុន ម៉ាណែត នៅ​ថ្ងៃ​ទី​១​ខែ​កញ្ញា​នេះ​បាន​ប្រកាស​ថា នឹង​មាន​ការ​ចេញ​ព្រះរាជក្រឹត្យមួយ​កំណត់​ពី​ការ​តែងតាំង​និង​បែងចែក​តួនាទី​មន្ត្រី​រាជការ ដើម្បី​កម្រិត​តួនាទី​របស់​ទីប្រឹក្សា​មិន​ឲ្យ​មាន​​ឋានៈស្មើ​បន្ថែម​លើ​មុខ​ងារ​បច្ចុប្បន្ន​ទេ។​ ចំណែក​វិស័យ​ឯកជន​ដែល​មាន​គោរមងារ​ជា​អ្នក​ឧកញ៉ា​និង​ឧកញ៉ាដែល​តែង​តាំង​ជា​ទី​ប្រឹក្សា​មិន​អាច​មាន​ឋានៈ​ស្មើរដ្ឋ​មន្ត្រី​ឡើយ។ ការ​តែង​តាំង​ទី​ប្រឹក្សា ជំនួយ​ការ​របស់នាយក​រដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី ហើយ​តាម​បណ្តា​ក្រសួង​ក៏​ដូច​គ្នា​ដែរ ពោល​បើ​យក​តួនាទីដែល​មាន​ឋានៈ​ស្មើ ត្រូវ​ដាក់​ចុះ​ការងារ​ក្នុង​ក្របខណ្ឌ តែ​បើ​យ​ក​ការងារ​ក្នុង​ក្របខណ្ឌ ត្រូវ​លុប​តួនាទី​ដែលមាន​ឋានៈ​ស្មើ។