តំបន់ការ៉ាបាក់ ដែលជាជម្លោះរ៉ាំរ៉ៃ រវាងអាមេនី និងអាស៊ែបៃហ្សង់​ ពេលនេះបានពើប​ប្រទះនឹង​ការផ្ទុះអាវុធសាជាថ្មី កាលពីថ្ងៃអង្គារ ទី​១៩កញ្ញា។ កងទ័ពអាស៊ែបៃហ្សង់ បានបើក​ប្រតិបត្តិការវាយប្រហារ ទៅលើទីតាំងជាច្រើននៃតំបន់នេះ បណ្តាលឲ្យស្លាប់​មនុស្សប្រមាណ​៣២នាក់ និងរបួសជាង​២០០នាក់​។ ប្រជាជនប្រមាណ​៧០០០នាក់ បាន​រត់ភៀសខ្លួនយ៉ាងតក់ក្រហល់ ក្រោយ​ការ​ផ្ទុះអាវុធសាជាថ្មី បង្កឡើងដោយកងទ័ពអាស៊ែបៃហ្សង់នេះ​។