នៅព្រឹកថ្ងៃពុធ ទី២វិច្ឆិកានេះ យោងតាម​ក្រសួងការពារជាតិកូរ៉េខាងត្បូង គឺកូរ៉េខាងជើង បានបាញ់​មីស៊ីលជាច្រើនគ្រាប់ សំដៅ​មកសមុទ្រខាងកើត និង​ខាងត្បូង ដែលក្នុង​នោះ មានមួយគ្រាប់ បានធ្លាក់ចូល​កៀកបំផុត នឹងដែនទឹក​របស់​កូរ៉េខាងត្បូង។ នេះ​ជាលើកទីមួយហើយ ដែល​មីស៊ីល​របស់​កូរ៉េខាងជើង បានធ្លាក់ហួសឆ្ងាយ​ពី​ខ្សែបន្ទាន់ព្រំដែន​ទឹក​ ដែលខណ្ឌចែកបងប្អូនកូរ៉េទាំង២បែបនេះ។ ភ្លាមៗនោះ កងទ័ពកូរ៉េខាងត្បូង បានបាញ់មីស៊ីលច្រើនគ្រាប់ ជាការឆ្លើយតបវិញទៅកាន់របបកុម្មុយនីស្តព្យុងយ៉ាង។ ការបាញ់មីស៊ីលឆ្លងឆ្លើយ​គ្នានេះ បានបង្កឲ្យ​មានការព្រួយ​បារម្ភកាន់តែខ្លាំង អំពី​ការ​ផ្ទុះអាវុធដាក់គ្នា​ទៅវិញទៅមក​។