នៅល្ងាចថ្ងៃព្រហស្បតិ៍ ទី២២ សីហា នាយករដ្ឋមន្ត្រីកម្ពុជា លោក ហ៊ុន ម៉ាណែត បានថ្លែងសារពិសេស ដោយបង្ហើបឲ្យដឹងពីគម្រោងរៀបចំដំណើរកំសាន្តរបស់ប្រជាពលរដ្ឋ នៅក្នុងខេត្តចំនួន៤នាតំបន់ឦសាន នៅរៀងរាល់ចុងសប្តាហ៍។ គម្រោងទស្សនកិច្ចនៅក្នុងខេត្តទាំងបួនជាប់ព្រំដែនជាមួយវៀតណាម និងឡាវ មានគោលដៅយកពលរដ្ឋខ្មែរធ្វើជាភ្នែក ជាច្រមុះ ក្នុងកិច្ចសហប្រតិបត្តិអភិវឌ្ឍន៍តំបន់ត្រីកោណ (CLV) ។ ពួកគេអាចជាសាក្សីបញ្ជាក់ថា តើ កម្ពុជាមានបាត់បង់ទឹកដី ឬក៏មានលំហូរជនជាតិដទៃចូលកម្ពុជាដែរឬទេ។ អ្នកឃ្លាំមើលខ្លះថា នេះជាយន្តការល្អដើម្បីជំរុញទេសចរណ៍ក្នុងស្រុក តែខ្លះថា គ្មានប្រសិទ្ធិភាពព្រោះជាការរៀបចំទុកជាមុន។ តើយន្តការរបស់រដ្ឋាភិបាល ដែលត្រៀមរៀបចំដំណើរទស្សនកិច្ចពលរដ្ឋទៅកាន់តំបន់ឦសាន ដោយមិនគិតថ្លៃ នឹងអាចកាត់បន្ថយមន្ទិលក្នុងចិត្តពលរដ្ឋ ពីរឿងបាត់បង់ទឹកដីដោយសារគម្រោង (CLV)  ឬក៏គ្មានប្រសិទ្ធិភាពសោះ?