ការ​សិក្សា​ថ្មី​មួយ​ស្តីពី​អាកាសធាតុ​ចុះ​ផ្សាយ​នៅ​ក្នុង​ទស្សនាវដ្តី Science Advances បាន​ឲ្យ​ដឹង​ក្នុង​ថ្ងៃ​សុក្រ ទី២៨ តុលា​ថា រលកកម្តៅ​ដែល​ក្តៅ​កាន់​តែ​ខ្លាំង​បង្ក​ឡើង​ដោយ​ការ​ប្រែប្រួល​អាកាសធាតុ​បាន​ធ្វើ​ឲ្យ​ខាតបង់​សេដ្ឋកិច្ច​ពិភពលោក​ក្នុង​ទឹកប្រាក់​រាប់សិបពាន់លាន​ដុល្លារ។ តាម​ការ​សិក្សា​ដដែល គឺ​ក្រុម​ប្រទេស​ក្រីក្រ​ជាង​គេ​ដែល​បាន​ទទួល​រង​ផលវិបាក​សេដ្ឋកិច្ច​ខ្លាំង​ជាង​គេ​ពី​រលកកម្តៅ​ក្តៅ​ខ្លាំង។ ការ​សិក្សា​ថ្មី​ស្តីពី​អាកាសធាតុ​នេះ​បាន​ធ្លាក់​មក ខណៈ​ដែល​សន្និសីទអន្តរជាតិ​ស្តីពី​អាកាសធាតុ​ហៅ​កាត់ COP27 ត្រៀម​បើក​ធ្វើ​នៅ​ក្នុង​ប្រទេស​អេហ្ស៊ីប​ពី​ថ្ងៃទី៧ ដល់​ថ្ងៃទី១៨ វិច្ឆិកា​ខាង​មុខ។