ក្រុម​ប្រទេស​នាំ​ឧស្ម័ន​ចេញ​បើក​ជំនួបកំពូល​ចាប់​ពី​ថ្ងៃ​អាទិត្យ ទី២០ កុម្ភៈ​នៅ​ក្នុង​ប្រទេស​កាតា។ នៅ​ក្នុង​ថ្ងៃ​ដំបូង ជំនួបកំពូល​បាន​ចាប់​ផ្តើម​ត្រឹម​ថ្នាក់រដ្ឋមន្រ្តី និង​បន្ត​ដោយ​ថ្នាក់​ប្រមុខរដ្ឋ និង​ប្រមុខ​រដ្ឋាភិបាល​នៅ​ថ្ងៃ​អង្គារ ទី២២ កុម្ភៈ។ កម្មវត្ថុ​នៃ​ជំនួបកំពូល គឺ​និយាយ​ពី​ស្ថានភាព​ឧស្ម័ន​ក្នុង​លោក​ដោយ​ពិនិត្យមើល​ការ​ផ្គត់ផ្គង់ និង​តម្រូវការ។ តែ​អ្វី​ជា​ការ​កត់សម្គាល់ ជំនួបកំពូល​លើក​នេះ​បាន​ធ្វើ​ឡើង​នៅ​ក្នុង​បរិបទ​នៃ​វិបត្តិ​អ៊ុយក្រែន​ដែល​ក្រុម​បស្ចិមប្រទេស​កំពុង​បារម្ភ​ពី​ការ​វាយប្រហារ​អ៊ុយក្រែន​របស់​រុស្ស៊ី។