July 10, 2025

ខោទ្រនាប់អាចបង្អាក់សមត្ថភាពបន្តពូជបុរស?

7 minutes

ជម្រើសស្លៀកខោទ្រនាប់មិនមែនត្រឹមតែសម្រាប់បិទបាំង ឬលម្អរាងកាយទេ តែអាចមានឥទ្ធិពលដល់សុខភាពបន្តពូជទៀត។ ការសិក្សាជាច្រើន បានបង្ហាញថា ខោទ្រនាប់រឹតតឹងខ្លាំង អាចរំខានដល់ជីវិតបន្តពូជរបស់បុរស ព្រោះភាពហប់ក្តៅបានធ្វើឱ្យបរិមាណនិងគុណភាពនៃមេជីវិតបុរស (ស្ពែម៉ាតូហ្សូអ៊ីត) ធ្លាក់ចុះ ទើបពួកគាត់ពិបាកមានកូន។

តើអស់លោក ចូលចិត្តស្លៀកខោទ្រនាប់ ក្នុងទម្រង់ជាស្លីប ជាខោក្តោបខ្លាំង ជាBoxer ជាខោខ្លីរលុងបែបចាស់បុរាណខ្មែរ? ខោទ្រនាប់ មិនមែនគ្រាន់តែជាគ្រឿងលម្អ សម្រាប់បិទបាំងកេរ្ត៍ខ្មាសទេ តែការជ្រើសរើសខោទ្រនាប់ក៏មានពាក់ព័ន្ធដល់បញ្ហាសុខភាពដែរ។ នៅប៉ុន្មានឆ្នាំចុងក្រោយមកនេះ ការសិក្សាជាច្រើនបានលើកឡើងថា ខោទ្រនាប់បុរសដែលរឹតតឹងខ្លាំង អាចធ្វើឱ្យបុរសពិបាកមានកូន ព្រោះមេជីវិតបុរសនឹងធ្លាក់ចុះ ប្រសិនបើប្រដាប់ភេទបុរសរងកម្តៅខ្លាំង រយៈពេលយូរពេក។ អ្នកស្រាវជ្រាវបានសម្គាល់ឃើញទៀតថា បុរសខ្លះ បាត់បង់សមត្ថភាពបង្កកំណើត មិនអាចមានកូនបាន ដោយហេតុតែធ្វើការនៅកន្លែងដែលប្រឈមនឹងភាពក្តៅខ្លាំងដល់ពងស្វាស ដូចជាធ្វើការនៅក្នុងហាងឬឡធ្វើនំប៉័ង ឬអ្នកបើកឡាន ដែលត្រូវអង្គុយយូរ នាំឱ្យក្តៅដល់ប្រដាប់ភេទ។

ការងាររបស់ក្រុមគ្រូពេទ្យ ស្រាវជ្រាវរកវិធីពន្យារកំណើតបុរស ដោយវិធីស្លៀកខោស្លីបក្តៅ ក៏ហុចលទ្ធផលដូចគ្នា។ ដើម្បីបង្អាក់ដំណើរលូតលាស់របស់ស្ពែម៉ាតូហ្សូអ៊ីត បុរសចង់ពន្យារកំណើតត្រូវស្លៀកខោស្លីបរឹតក្តោបកម្តៅលិង្គរយៈពេលយ៉ាងហោច១៥ម៉ោងក្នុងមួយថ្ងៃ និងជាប់គ្នារយៈពេលបីខែ។ គេត្រូវការរង់ចាំដល់បីខែ ទើបវិធីពន្យារកំណើតដោយស្លៀកខោរឹបចាប់មានប្រសិទ្ធភាពព្រោះដំណើរការលូតលាស់របស់ស្ពែម៉ាតូហ្សូអ៊ីតស៊ីពេលបីខែ។ មានឈ្មោះថា ជាពិធីពន្យារកំណើតដោយកម្តៅ ខោស្លីបក្តៅនេះកំពុងស្ថិតនៅក្នុងដំណាក់កាលសិក្សានៅឡើយ និងមិនទាន់ត្រូវបានអាជ្ញាធរសុខាភិបាលបារាំងទទួលស្គាល់នៅឡើយទេ។ ខោស្លីបក្តៅនេះ ក៏ពុំមានដាក់លក់នៅទីផ្សារទេ។ បើលោកអ្នកចង់សាកល្បង ត្រូវវាស់កាត់ដោយខ្លួនឯង ដោយត្រូវធ្វើយ៉ាងណាឱ្យខោ ត្រូវខ្លំរឹតពងបន្តិច ដើម្បីបន្ថប់កម្តៅឱ្យឡើងដល់៣៧អង្សានៅម្តុំប្រដាប់ភេទ។ ៣៧អង្សាជាកំរិតសីតុណ្ហភាពក្តៅអាចបញ្ឈប់ការផលិតស្ពែម៉ាតូហ្សូអ៊ីតបាន។ ក្នុងពេលធម្មតា ពងស្វាសត្រជាក់ជាងផ្នែកផ្សេងនៃសរីរាង្គកាយ (៣៥អង្សា)។ អ៊ីចឹងហើយជាធម្មជាតិបង្កើតសត្វលោកមកដោយដាក់ពងស្វាសនៅផ្នែកខាងក្រៅនៃសពាង្គកាយ។

មានន័យថា នៅពេលពងស្វាស ឬប្រដាប់ភេទបុរស ត្រូវរឹបញុកជាប់ណែននឹងខ្លួន ដោយខោស្លីបរឹតរួត ដែលធ្វើឱ្យហប់ឡើងក្តៅ ការផលិតមេជីវិតត្រូវរងការរំខាន។ ការផលិតមេជីវិតស្ពែម៉ាតូហ្សូអ៊ីត ទាមទារឱ្យតំបន់កេរ្ត៍ខ្មាសនេះមានសីតុណ្ហភាពទាបជាងរាងកាយទាំងមូល ប្រមាណពី៣ទៅ៤អង្សា។

នៅក្នុងការសិក្សាប្រៀបធៀបកំរិតបរិមាណស្ពែម៉ាតូហ្សូអ៊ីតរបស់បុរសស្លៀកខោស្លីបតឹង និងខោស្លីបរលុង បានឆ្លុះបញ្ចាំងឱ្យឃើញថា ខោរឹបតឹងជាប់ខ្លួន ពិតជាបានបន្ថយផលិតកម្មស្ពែម៉ាហ្សូអ៊ីតមែន។ ប្រសិនបើបុរសមានបរិមាណស្ពែម៉ាហ្សូអ៊ីតធម្មតា ការចុះថយផលិតកម្មមេជីវិតឈ្មោលដោយការស្លៀករឹប មិនសូវប៉ះពាល់ដល់ការបង្កពូជទេ។ ប៉ុន្តែបើបុរសនោះមានស្ពែម៉ាតូហ្សូអ៊ីតតិចស្រាប់ ការចុះថយតែបន្តិចនឹងធ្វើឱ្យពួកគេពិបាកមានកូនហើយ។

កម្តៅពិតជាអាចសម្លាប់ស្ពែម៉ាតូហ្ស៊ីត?

តាមការពិតទៅនោះ កំរិតសមត្ថភាពបន្តពូជរបស់បុរសបានធ្លាក់ចុះជាលំដាប់ តាំងពីប៉ុន្មានឆ្នាំចុងក្រោយមកនេះ។ អត្រាស្ពែម៉ាតូហ្សូអ៊ីតសកម្មបានថយដោយឯកឯងមិនដឹងថាមកពីហេតុអ្វី។ មូលហេតុអាចមានច្រើន តែដើមហេតុដំបូងនិងចម្បងគេមួយ ជាកត្តាសម្លៀកបំពាក់ ដែលតឹងរឹតខ្លួនខ្លាំងពេក។ ហើយមិនមែនសម្ពាធនៃការរឹតរួត កៀបតឹងរបស់ខោទ្រនាប់ទេដែលជាបញ្ហាធ្វើបុរសពិបាកមានកូននោះ គឺភាពក្តៅបង្កឡើងដោយសម្លៀកបំពាក់រឹតរួតតឹងបានទៅដំឡើងសីតុណ្ហភាពតំបន់បន្តពូជរបស់បុរស។ ធម្មជាតិបង្កើតមនុស្សដោយដាក់ពងឱ្យនៅក្រោម និងក្រៅសពាង្គកាយមិនមែនជាចៃដន្យទេ។ ការឡើងកម្តៅតែបន្តិច អាចជះឥទ្ធិពលនិងផលវិបាកធំដល់សមត្ថភាពបន្តពូជរបស់បុរស។ មានន័យថា ក្តៅអាចសម្លាប់មេជីវិតស្ពែម៉ាតូហ្សូអ៊ីតឬ? ពិតជាអាច។ បណ្តោយឱ្យប្រដាប់ភេទត្រូវក្តៅ ឬស្ថិតក្នុងសភាពក្តៅជ្រុល នឹងធ្វើឱ្យស្ពែម៉ាតូហ្សូអ៊ីតមានអាយុខ្លីនិងមានចំនួនតិច។

បាតុភូតអសមត្ថភាពបុរស ក្នុងបង្កកំណើតកូន បានក្លាយជាប្រធានបទនៃការស្រាវជ្រាវទ្រង់ទ្រាយធំ និងយ៉ាងលម្អិត។ ក្រុមអ្នកស្រាវជ្រាវជីវវិទ្យានិងវេជ្ជសាស្ត្រអាហ្សង់ទីន បានវិភាគទិន្នន័យនៃគំរូស្ពែម៉ាតូហ្សូអ៊ីតរបស់បុរសជាច្រើនពាន់នាក់ រយៈពេល១៩ឆ្នាំ (២០០៥-២០២៣) ហើយយកទិន្នន័យនេះទៅផ្ទឹមនឹងព័ត៌មានអាកាសធាតុផ្តល់ដោយភ្នាក់ងារឧតុនិយម។ ជាលទ្ធផលដែលមានចុះផ្សាយក្នុងទំព័រទស្សនាវដ្តីវិទ្យាសាស្ត្របរិស្ថាន ការប្រឈមនឹងរលកកម្តៅសីតុណ្ហភាពខ្ពស់ បង្កឡើងដោយការប្រែប្រួលអាកាសធាតុ បានបញ្ចុះសមត្ថភាពបង្កកំណើតរបស់បុរសអស់១០%។ ជាងនេះទៅទៀត ដោយសារភាពក្តៅ ស្ពែម៉ាតូហ្ស៊ីតក្នុងទម្រង់ធម្មតាតែខ្សោយ។ នេះបើតាមរបាយការណ៍ដដែល។

បុរសពេញវ័យបង្កកំណើត មានស្ពែម៉ាតូហ្ស៊ីត ជាមធ្យមពី៨០ទៅ១០០លានក្នុងមួយមីល្លីលីត្រនៃទឹកស្ពែម។ ក្រោម១៥លាន បុរសចាប់មានការលំបាកឬចាត់ទុកថាមានជំងឺអារហើយ។ តែដោយហេតុថាអស់លោកបុរសជាទូទៅ មិនដឹងថាខ្លួនមានមេជីវិតច្រើនឬតិច ខ្លាំងឬខ្សោយនោះ មធ្យោបាយដ៏ល្អ ដែលប្រាកដមិននាំផលវិបាកដល់ការមានកូន គឺត្រូវជ្រើសរើសខោក្នុងរលុងៗ។ សេចក្តីណែនាំរបស់អ្នកជំនាញ គឺបើចង់ក្លាយជាឪពុក ត្រូវស្លៀកពាក់រលុងៗ មិនថា ខាងក្នុង ឬខោក្រៅទេ។ ចៀសវាងការអង្គុយយូរ ដោយត្បៀតជើង។ ឧស្សាហ៍ប្តូរឥរិយាបថអង្គុយ ឬងើបដើរ ដើម្បីកុំឱ្យក្តៅគូថទាន់។ កុំធ្វើការដោយដាក់កុំព្យូទ័រ នៅលើភ្លៅ ព្រោះវានឹងបង្កើនកម្តៅសីតុណ្ហភាពដល់ប្រដាប់ភេទ។ បុរសភាគច្រើនមានទម្លាប់ដាក់ទូរស័ព្ទនៅហោបៅខោខាងមុខ ទង្វើបែបនេះក៏អាចរំខានដល់ការបន្តពូជដែរ ដោយទូរស័ព្ទអាចសាយភាយរលកកម្តៅដល់ពងស្វាស។ ត្រាំទឹកក្រៅហ្សាក់កូហ្ស៊ីឬសូណា ជួយសម្រួលអារម្មណ៍បន្ធូរបន្ថយភាពតានតឹង តែមិនល្អទេសម្រាប់សុខភាពស្ពែម៉ាតូហ្សូអ៊ីត។

ដោយមិននិយាយអំពីបញ្ហាមានកូន ជម្រើសខោក្នុងត្រូវធ្វើដោយគិតគូរដល់ផាសុកភាពនៃរាងកាយ។ ស្លីបអាចតឹងជ្រុល ខោក្នុងបែបចាស់បុរាណខ្មែររលុងជ្រុល ខោBoxerទំនងសមរម្យជាងគេ ព្រោះសូមចងចាំថា ស្លៀកខោទ្រនាប់ត្រូវខ្លួន អាចបញ្ចៀសការកកោស កកិត ដែលអាចធ្វើឱ្យស្បែករលាក។ ជាចុងក្រោយ ត្រូវគិតដល់អនាម័យ ! ត្រូវប្តូរខោអាវក្នុងជារៀងរាល់ថ្ងៃ។ ខោក្នុងមានតួនាទីសំខាន់ពីរយ៉ាង គឺការពារប្រដាប់ភេទនិងអនាម័យ។ មិនស្លៀកខោក្នុងពេលថ្ងៃ អាចនឹងបង្កឱ្យមានការកកិតនិងរលាក ហើយអាចត្រូវកៀបនៅពេលបិទរូតខោ។ តែពេលយប់ គេមិនចាំបាច់ស្លៀកខោក្នុងក៏បាន ធ្វើយ៉ាងណាឱ្យសម្រាន្តលក់ស្រួលជាការស្រេច។

...more