ឧបទ្ទវហេតុ និងគ្រោះមហន្តរាយផ្សេងៗតែងកើតមានឥតឈប់ឈរទាំងនៅលើពិភពលោក ក៏ដូចជានៅប្រទេសកម្ពុជា។ ឧបទ្ទវហេតុខ្លះ និងគ្រោះថ្នាក់ខ្លះ បានកើតឡើងដោយយថាហេតុ ហើយខ្លះទៀត បានកើតឡើងដោយសារការខ្វះការប្រុងប្រយ័ត្ន ខ្វះការបង្ការហានិភ័យជាមុន។ ក្រោយឧបទ្ទវហេតុ កោះពេជ្រ កាលពីឆ្នាំ២០១០ កម្ពុជាក៏កើតមានជាបន្តបន្ទាប់ដូចជាការបាក់រលំអគារ និងការលិចទូកចុងក្រោយនេះនៅខេត្តកណ្តាល សុទ្ធសឹងជាសោកនាថកម្មដ៏គួរឲ្យសោកស្តាយ។ ទន្ទឹមគ្នានេះ កម្ពុជាក៏ត្រូវសិក្សាពីបទពិសោធន៍បន្ថែមទៀតដែរ ពីឧបទ្ទវហេតុប្រជ្រៀតគ្នាខ្វះអុកស៊ីសែននៅកូរ៉េខាងត្បូងដែលធ្វើឲ្យមនុស្សស្លាប់ជាង១៥០នាក់ និងការបាក់ស្ពានយោលនៅឥណ្ឌាកាលពីថ្ងៃអាទិត្យដំណាលគ្នាដែលធ្វើឲ្យមនុស្សស្លាប់ជាង១០០នាក់ដែរ។