Klassik Aktuell

Beim Festival Bridges II steet den Echange tëschent verschiddene Museker:innen am Vierdergrond. Wéi den Numm verréit, geet et drëms, Brécken ze schafen tëschent verschidde Kulturen, Zäiten an och Geschlechter. All Dag vum Festival steet entweder ee liewege Komponist, ee Lëtzebuerger Komponist oder eng Komponistin um Programm. Een Numm op der Affiche ass d'Albena Petrovic. D'Zil ass et, deene Museker:innen eng Bün ze ginn, déi soss dacks ënnerrepresentéiert sinn.

De Festival geet vum 25. September bis den 1. Oktober an d'Concerte sinn am Foyer Européen am Quartier vun der Stater Gare.

Am Kader vum Festival Musique dans la Vallée, bei deem et Concerten an der Belsch an zu Lëtzebuerg ginn, gëtt de 27. September en Optrëtt an der Kierch zu Biebereg (Bettborn) organiséiert. Optriede wäert den Orchestre de la Fondation Baron Arthur Grumiaux, ënner der Direktioun vum Luc Dewez. Um Programm stinn dräi Wierker vun dräi verschiddene Komponisten (Respighi, Schumann an Dvorak) a Solistin ass d’Cellistin Stéphanie Huang. Si huet 2022 de Concours international Reine Elisabeth de Belgique gewonnen. Mat dobäi ass och nach d’Mezzo-Sopranistin Cécile Lastchenko.

De Concert gëtt och vum Opus opgeholl an zu engem spéideren Zäitpunkt um Opus diffuséiert.

"Harmonesche Moien", esou heescht déi nei Sendung um Opus, déi méindes bis freides ëmmer vun 9 bis 12 Auer Moies leeft. Lauschtere kann een déi aktuell net nëmmen um Webradio op www.opus.radio, mee och op der Opus-100,7-App. Do kann een och soss zu all Moment ee breede Choix u klassescher Musek lauschteren, vill Interviewen ënner anerem am Kader vun aktuelle Concerten a weider spannend Formater fir klassesch Musek nei kennenzeléieren. Weekends lafe weider vill Concerten, a sonndes gëtt et zweemol eis Sendung "Resonanzen", an där aktuell Eventer aus der klassescher Musekszeen am Vierdergrond stinn.

Weider ginn et och reegelméisseg Concerten, déi live um Opus presentéiert ginn. Eisen éischte Live-Concert vun dëser Saison presentéiert de Guy Engels haut den Owend, 22.9. Et ass ee grousse Concert, dee mir Live vun hallwer 8 un aus der Philharmonie iwwerdroen, well do stinn direkt zwee grouss Lëtzebuerger Chéier op der Bün, an domat nach net genuch - mat dobäi sinn och d’SEL - d’Solistes Européens, Luxembourg an hire Chefdirigent Christoph König, a mat dobäi ass och nach de Pianist Jean Muller.

Hautzedaags ass de Georges Sadeler als Saxofonist a Komponist täteg. Am Alter vun nëmmen 18 Joer war hie scho feste Member vun der Militärmusek, an dat obwuel hien als Kand net wierklech iwwer esou ee Liewenswee nogeduecht huet. Datt hie Komponist wéilt sinn, huet hien eigentlech eréischt duerch d’Ecrituresfächer am Conservatoire entdeckt, wéi hien an dësem Extrait verréit.

De Méindeg, 22. September spillen d'Solistes Européens, Luxembourg hiren Optakt-Concert vun dëser Saison an der Philharmonie. Fir dësen Optrëtt mam Titel "Symphonic Tales from the East" steet den Orchester net eleng op der Bün. Mat dobäi sinn och de Chouer vun der Maîtrise aus der Kathedral, de gemëschte Chouer aus dem Stater Conservatoire an de Lëtzebuerger Pianist Jean Muller.

Um Programm steet déi éischter seele gespillte Fantasie fir Piano, Chouer an Orchester vum Ludwig van Beethoven souwéi och Wierker vum Tschaikowski a vum Borodin.

Zu Diddeleng war dëst Joer tëschent dem 7. an 12. September fir déi mëttlerweil zéngten Editioun deen Internationalen Diddelenger Uergelconcours.

Dëst Joer hate sech fir d’Jubiläumseditioun 37 jonk Participanten aus 12 verschiddene Länner ageschriwwen. Alleguer ënner 35 Joer al. An hei gouf et souwuel wat den 1. Präis, wéi och de Publikumspräis ugeet, eng Victoire vun der jonker Musikerin Songyeon Im. Si ass eng südkoreanesch Organistin, déi den Ament a Frankräich lieft a rezent zu Paräis hire Master an der Uergel ofgeschloss huet.

Erausgesicht gouf d’Songyeon Im als Gewënnerin vum Concours vun engem Jury, dee sech aus nationalen an och international renomméierten Organisten zesummesetzt.

De Bach ass deene meeschten e Begrëff, och wann ee sech net mat klassescher Musek auskennt. Hien ass wuel dee bekanntste Komponist aus der Zäit vum Barock an hien huet vill verschidde Wierker geschriwwen. Dorënner och ronn 300 Kantaten. Déi opzeféieren, ass d'Zil vum Ensembel fir al Musek Ad Libitum. Den 21. September steet den nächste Concert an där Serie um Programm an der Kierch zu Bartreng. Dat besonnescht: Et ass e Concert-Conférence, bei deem de Public ëmmer tëschent der Musek nei Informatiounen iwwer de Bach a seng Musek kritt. De Rosch Mirkes vun Ad Libitum verréit méi.

Haut ass den 150. Doudesdag vun der Louise Farrenc, gebuere Jeanne-Louise Dumont. Dono huet si de Nonumm vun hirem Mann ugeholl, deen si mat nëmme 17 Joer bestuet huet.

Gebuer gouf si zu Paräis, an opgewuess ass si am Kënschtlermilieu. Dat huet et hir dann och erlaabt, Kueren an der Kompositioun an an der Instrumentatioun ze huelen. Dat war nämlech eppes wat fir Fraen zu där Zäit éischter onüblech war.

Si war eng ganz renomméiert Komponistin an awer och eng grouss Virtuosin um Piano. Am 19. Joerhonnert hate vill Frae Schwieregkeeten, déi selwecht Rechter wéi Männer ze hunn – an dat war och bei dëser Komponistin de Fall. Si war 30 Joer laang erfollegräich Professerin um renomméierte Conservatoire zu Paräis – an si ass awer bei Wäitem net esou vill bezuelt gi wéi hir männlech Aarbechtskolleegen.

Net nëmme si selwer ass ganz berüümt ginn, mee si huet dat och hire Schülerinnen a Schüler erméiglecht. Dorënner waren hir eegen Duechter Victorine Farrenc an den Ernest Reyer, ee berüümten Operekomponist.

Beim Wuert Bibliothecaire denkt een normalerweis u Bicher a Bibliothéiken - mee et ginn awer och Orchester-Bibliothecairen - an dat och an der Philharmonie um Kierchbierg. Dat sinn d’Pauline Marmaï an d’Kalvine Antoine. Ee Groussdeel vun hirer Zäit verbrénge si an den Archiven mat alle Nouteblieder an der Philharmonie, mee si sinn och wärend de Concertsprouwen an deels wärend de Concerten dobäi. Firwat dat esou ass, ennert anerem dat verroden déi zwou Bibliothecairen am Reportage vum Marie Schockmel.

Haut, den 11. September, feiere mir den 90. Gebuertsdag vum Arvo Pärt. Hien ass ee vun de bedeitendste Komponiste vun eiser Zäit. De Pärt ass bekannt fir seng experimentell a gläichzäiteg markant roueg a spirituell Musek. Den opus 100,7 mat engem Réckbléck.