របាយការណ៍ស្រាវជ្រាវមួយផ្តោតលើមីក្រូហិរញ្ញវត្ថុ ឬ​កម្ចី​ខ្នាតតូចនៅកម្ពុជា ត្រូវបានចេញផ្សាយនាពេលថ្មីៗនេះ ក្រោមមូលនិធិពីប្រទេសអាល្លឺម៉ង់។ របាយការណ៍នេះបង្ហាញអំពី ការអភិវឌ្ឍ បញ្ហាប្រឈម និងអនុសាសន៍នៃវិស័យមីក្រូហិរញ្ញវត្ថុនៅកម្ពុជា។ តាមរយៈលទ្ធផលនៃការសិក្សាក្នុងរបាយការណ៍នេះ និងការសិក្សាផ្សេងៗនៅលើពិភពលោក បង្ហាញថា ជោគជ័យ​របស់​​កម្ចី​ខ្នាតតូច ​ត្រូវភា្ជប់ជាមួយនឹងល័ក្ខខ័ណ្ឌ ពោលគឺការប្រើប្រាស់​កម្ចីទាំងនេះ​​ឱ្យ​បាន​សមស្របត្រឹមត្រូវ។ បើ​មិន​ដូច្នេះទេ គ្រួសារ​មួយ​អាច​​ប្រឈមមុខនឹងកម្ចីដែល​មាន​ការប្រាក់ខ្ពស់ ហើយ​ត្រូវជាប់ផុងនឹងបំណុលរើខ្លួនមិនរួច រហូតត្រូវបាត់បង់ផ្ទះសំបែង ដីធ្លី និង​ក៏ការបង្ខំឱ្យសមាជិកគ្រួសារធ្វើចំណាកស្រុកដើម្បីសងបំណុលក៏មាន។