សន្តិសុខ​ស្បៀង ការព្យួរ​កម្មសិទ្ធិ​បញ្ញា​លើ​វ៉ាក់សាំង​បង្ការកូវីដ​១៩ បញ្ហាអាកាសធាតុ និង​កិច្ចព្រមព្រៀង​ស្តី​ឧបត្ថម្ភធន​សម្រាប់វិស័យ​នេសាទ។ ទាំងនេះ​ជា​សំណុំរឿងក្តៅគគុក ដែល អង្គការ​ពាណិជ្ជកម្ម​ពិភពលោក ហៅកាត់ជា​ភាសាអង់គ្លេស WTO លើក​មក​និយាយ​នៅក្នុង​កិច្ចប្រជុំ​ថ្នាក់រដ្ឋមន្រ្តី លើកទី ១២ ដែល ចាប់បើក​តាំងពីថ្ងៃ​អាទិត្យទី ១២ និង​ត្រូវ​បិទបញ្ចប់​នៅថ្ងៃ​ពុធ​ទី ១៥​មិថុនា។ នៅពេលប្រទេស​សមាជិក​ទាំង ១៦៤ កំពុង​បើកការចរចា​យ៉ាងមមាញឹក នៅ​ក្នុងកិច្ចប្រជុំ​នៅទីក្រុង​ហ្សឺណែវ ប្រទេស ស្វ៊ីស អ្នកជំនាញ បាន​រំលឹក​មិនឲ្យ​គេ​សង្ឃឹម​អ្វី​ច្រើនពី​លទ្ធផល​នៃ​កិច្ចប្រជុំ​របស់​WTO ព្រោះថា ការចរចាទាំងឡាយ​ដើម្បី​ឈាន​ទៅ​បង្កើតឲ្យមាន​កិច្ចព្រមព្រៀង​នឹង​ធ្លាក់ទឹក គ្រាន់តែ ប្រទេស​មួយ លើកដៃបោះឆ្នោត ​ប្រឆាំង។