Koɗo men hannde

Côte d’ivoire, Suudu ñaawooru Abidjan salanike Tijjaani Caam tawugol e suɓngooji saatiiɗi e lewru 10ɓuru arooru. Ñaawooɓe ɓee yamirii yo oo ardiiɗo fedde politik PDCI yaltine e doggol woote ngol. Sabu e bi’ol maɓɓe, sahaa mo oo kandidaajo PDCI winnditii e ngol doggol tawo hayrii e ɓii leydaaku makko Koddiwaar. Kono Tijjaani Caam yeddii ndee ñaawoore. O hollii wonnde ko hooreeɓe ndii leydi faala yaltindeme e ɗii suɓngooji sabu ko kanko ɓuri jogaade fartaŋŋe foolugol ɗi.

Mbele oo dawroyankeejo no jogii laawol waylirgol ngal pellital ? Kori Tijjaani Caam, wonndude e Laurent Gbagbo, Charles Blé Goudé e Guillaume Soro, hino waawi renndude ngam etagol no tawtiree e ɗii suɓooji ? Koɗo men hannde ko Abdurahmaan Bari, heertorɗo dawro. Himo jaaboo laamnde Ibrahiima Timmbi Bah

Dental leyɗe hirnaange Afrik mawninat, ñannde 28 lewru 5ɓuru daratoondu, duuɓi mum 50. Ndee maanditaare waɗata ko e sahaa mo ngal dental CEDEAO wonndi e caɗeele mawɗe. Ɗeen caɗeele hino tiiɗi teeŋtini e fannu Politik e Kisal. CEDEAO waasi e ndeeɗo hitaande tati e terɗe mum. Leyɗe goɗɗe kadi tawteeɗe e ngal dental ina nguuri njannguuji kuliyaŋkooɓe e tiiɗallaaji politik. E oon sahaa, ɓiɓɓe leyɗe hirnaange Afrik heewɓe hino ŋiña golle CEDEAO ɗee. Eɓe tuuma ngal dental bammbugol hooreeɓe leyɗe ɗee. 

Hannde hol peeje CEDEAO haani ɓamude ngam huɓindagol ɗee caɗeele ? Koɗo men hannde ko Dr Abdu BAH, heertorɗo dawro. Himo Jaaboo laamnde Ibrahiima Timmbi Bah.

Pape François ko Diinayankeejo yiɗnooɗo Afrik, wallunooɗo leñi tosookii, daraniiɗo kaaldal hakkunde diinaaji. Ko ɗum holli Dr Daniel Dama, hertorɗo jokkondiral hakkunde Pine, caggal mayde Pape François. E bi’ol Dr Daniel Dama, oo hooreejo Nasaarankooɓe waɗii waylo-waylooji mawɗi e nder oo église. Ko kanko woni koɗo men hannde. Himo jaaboo lamnde Ibrahima Timbi Bah.

To Mali, hooreeɓe leydi ndii eɓɓii jeewte ngam haaldude e alhaali sariya pelle politik ɗee. E wiide laamu nguu pelle nguurɗe e nder diiwe Mali, hollitii wonnde pelle politik leydi ndii koko haana wayleede : goɗɗe fusee, golle goɗɗe dartinee, limoore majje uytee. Ɗee njeewte joofan ñannde 29 nduu lewru nayaɓuru. Kono dawroyankooɓe Mali heewɓe hino tuumii ardiiɓe leydi ndii gollirgol ngal kaaldal ngam fusugol pelle politik maɓɓe. Koɗo men hannde ko Siidi Umaar Jallo, tawaaɗo e waalde politik KODEM. Himo jaaboo e laamnde Ibrahiima Timbi Bah.

Kamerun, yimɓe ɗuuɗuɓe jeyaaɓe e nder diiwe rewo leydi ndii waɗii noddaandu ngam waylugol hooreejo leydi e suɓngooji saatiiɗi e timmoode ndee hitaande. Ko jooma gannalɓe e yimɓe sosiyete siwil waɗi nduu noddaandu. E bi’ol maɓɓe, fii yo ɓamtaare heɓo Cameroun ko maa hooreejo keso daraniiɗo mbaylal suɓee. Meeter Abdoulaye Harissou, hooreejo suudu noteerɓe, Cameroun e Afrik kiɗɗo, no tawaa joɗɗinɓe ndee eɓɓoore. Ko kanko woni koɗo men hannde. Himo Jaaboo lamnde Ibrahima Timbi Bah.   

Gine, leydi ndin dimmbike Saanoyah leegal ngal woɗɗaaki Conakry. Ndee dimmbannde ko talata no weetude alarba feƴƴuɗo nde waɗi. Tiiɗeendi mayre feccii leydi ndin wonndude e maadi cuuɗi timmuɗi noogay. Woɓɓe e hoɗuɓe e majji eggii. Holko saabii ndee dimmbannde ? E bi’ol Ibrahima Sory Idrissa Diallo jooloogjo, ko asugol kaaƴe ŋaaño walla granit e nder ndee
nokkuure saabii dillugol ɗii leydi. O waɗiino wiɗto e hoore aso granit Sanoyah. Ko kanko woni koɗo men hannde. Himo jaaboo lamnde Ibrahima Timbi Bah.

Sudan, hannde heɓii duuɓi ɗiɗi gila hare fuɗɗii e ndii leydi. Ko Jeneral Abdel Fatah al Burhan ardiiɗo konu leydi ndii e jeneral Muhammad Hamdan Daglo, anndiraaɗo Hemeti, ardiiɗo ngoomu konu yaawungu no wi’ee FSR woni e haɓude ngam ardagol Sudan. Ndee, ko hare ɓurnde e muusude e nder nduu adunaaru. Yimɓe ujune maayi, miliyon 13 eggii. Ɓee egguɓe hino wuuri ngurɗam musɗam. Ɓadagol setto tawti pellital Dawlaaje Ndentuɗi Amerik dartinngal balle winndereyankooje, no laatanii HCR, salndu adunaaru daraniindu egguɓe, annde. Ko Mamadou Dian Diallo, ardiiɗo nduu saldnu e nder Sudan woni koɗo men hannde. Himo Jaaboo lamnde Ibrahima Timbi Bah.

Mbele demokarasi no yaarude caggal e nder Afrik ? Hay so tawii o alaa e yaarude ɓaama, awa o alaa kadi e yaarude yeeso, ko ɗum holli Alfa Usmaan JALLO, jannginoowo taariika politik Afrik, to duɗal toowngal Sonfonia ngal Conakry e nder Gine. E misaal, e nder hirnaange Afrik, e oo sahaa ɗoo, konunkooɓe no ardii leyɗe 4 caggal ciwlagol laamu. Ka fewndiiɗoo, gooto e maɓɓe hollaani annuye jonnitugol nguu laamu siwilɓe ɓee. Ngol jattugol laamu hino andina laamuuji njaggu arani caggal nde leyɗe Afrik heɓi ndimaagu majje . Namndal ngal ko mbele leyɗe Afrik goɗɗe hino ruttaade e laamu njaggu saaliingu wellitaare ? Koɗo men hannde ko Alfa Usmaan JALLO, oo taarikayankeejo politik Afrik.

Himo jaaboo lamnde Ibrahiima Timbi Bah.

Hooreejo Dawlaaji Ndentuɗi Amerik ɓeydanii Shiin Saggale timmuɗe 125 % e nder teemederewel kala ko faati e yeeyeteeɗi maɓɓe naatooji Amerik. Ɗum ko caggal nde Pékin ɓamii peeje yoɓtorɗe, saggale Amerik ɓeydaaɗe arane. Ndee hare ngeygu hino hulɓini faggudu winndere nden. Haysi tawii ɗee saggale ɓeydaaɗe meemii Afrik, kono tiiɗeendi majje hino hakindii. Holko saabii ɗum? Mbele kulol no woodani faggudu Afrik hayso tawii ngeygu hakkunde ndee duunde e Dawlaaji Ndentuɗi Amerik wonaa ko tiiɗi ? Koɗo men hannde ko Sherif Mohammed Abdallah Haydara, ardiiɗo GOHA, fedde renndinnde jooma jawle Gine. E bi’ol makko Afrik kañun kadi hino haani ɓeydannde Dawlaaji Ndentuɗi Amerik saggale. Himo jaaboo lamnde Ibrahiima timmbi Bah.

Kawrital winndereyankowal faatiingal e diplomasi diinayankooɓe waɗii Dakar e ɗee balɗe ɗiɗi faltiiɗe. Ngal kawrital renndinii ardiiɓe julɓe e nasaarankooɓe e diplomatɓe wonndude e wiɗtotooɓe e iniwersiteeji. Faandaare nden, ko gollirgol diinayankooɓe ngam ñippugol kareeli jaaliiɗi e nduu adunaaru. Ko Ceerno Ahmed Tijjan Bah, khalif Bambilor e nder Senegaal, nodditi ngal Kawrital winndereyankowal.

Ko kanko woni koɗo men hannde. E faandu haala Ibrahiima Timmbi Bah, o anndinii wonndema ardiiɓe diina hino waawi gollirde diplomasi ngam ñippugol kareeli goɗɗi. Heɗoɗen.