Koɗo men hannde

Koɗo men hannde, ko Huseynu BA, jaayndiyankeejo heertoɗo dawro e leyɗe sahel. Omo yeewtida e Umaar Mammadu SOW e pellital ngal Aljeriya ƴettii altineere faltiinde ndee dartinde koyɗe jam (kaaldal) ko faati e caɗeele gonɗe Niijeer. Aljeriya ciftinii wonde ñannde 27 lewru 9ɓuru faltiindu, ɓe keɓii ɓataake immiiɗo to ardiiɓe laamu faddewu Niijeer wonɓe ɓen njaɓi ɓe njaha ɓe yewta hakkunde maɓɓe. Kono hooreejo jaagorɗe Niijeer, Ali Mahaman Lamiin Zeyn habriino wonnde ko e mejaaje renndo ɓe tini oo kabaaru. Keɗoɗen yeewtere maɓɓe.

Ko ɓadii ujunere e teemeɗɗe jowi yimɓe wasi pittaali maɓɓe. Woodii  ujune gaañiiɓe gila ɗe hare fuɗii e aseweere yawtunde hakkunde Palestiin e Israayel. Ɗum ko caggal nde fedde Hamas, nde Israyel, Amerik, e fedde leyɗe Orop siforii wano fedde kuliyankooɓe, yani e dow Israyel . Holko saabi immintingol ɗe hare hakkunde Israyel e Palestiin ? Ko wonata battane mum ender Afrik? Dr Abdu BA jannginoowo ka duɗal mawngal ngal Sheykh Anta JOOP Dakar hertorɗo dawro, nanondiral hakkunde leyɗe e Dente Afrik. O jaaɓike ɗee lamnde. O yewtidii e Abdullaay Jallo. Heɗoɗen mo.

Baaba Maal, oo naalanke ŋanaajo lolloɗo mawnini duuɓi 38 guɓal daande leñol e yontere yawtunde. Ko o yimoowo kono ko  daraniiɗo kadi ɓamtaare Afrik. O tawtoraama ko ɓoyaani koo e jonnde 78ɓiire Dental Adunaaru ONU, to New York. E nder mayre o eeriima no Afrik yahra yeeso e baŋŋe faggudu e renndo. Ko holɗe e peeje kanaa ɓameede ngam yaltinde Afrik e caɗeele, teninii ɗee ɗanle ɗe ɗooftaaki sariya teskaaɗe e ɗii dummunnaaji cakkitiiɗi ? Aysha Sow waawi yeewtidde e makko. Keɗoɗen ɓe !

Fiyanɗe kuliyankooɓe no ɓeydii e ɗee jonte yawtuɗe e nder Niijer. Sakitiinde nden ko e altine waɗi e dow daaka konu to Tabatol sera keerol e Mali. Konnunkooɓe noogay e jeenayo maayi e mum, ko ɓuri cappanɗe kuliyankooɓe waraama e nden fiyande. Ko kayre woni ɓurnde tiiɗude gila nde konunkoɓe ɓen sammini laamu Mohammed Bazum ñannde 26 lewru 7ɓuru. Ɓe hollituno wonnde ko rafi ndeenaagu saabii ciwlagol laamu ngun. E lewru 8ɓuru kadi konunkooɓe sappo e njeeɗiɗo warano e dow fiyande ka sera keerol Burkina Faso. Ko woni sabu ɓeydagol ɗee piyanɗe e nder Niijeer. Mammadu Omar LI, ko hertorɗo kisal e  ndeenaagu e nder Sahel. O tintindii e Abdullaay Jallo. Heɗoɗen mo.

E ndee altineere yawtunde, OMS, salndu fedde adunaaru ONU,  topitiindu fii cellal newnii yo ngal markal ɗiɗaɓal wi'eteengal R21 Matriks yaltine ngam haɓuɗe nanwna jonte no wi'ee "palii". Ngal markal ko cukkalon (paykoy) koy ɓurta wallitaade ko faati e rafi yontinooje. E nder Afrik leyɗe goɗde no weltorii ngal pelital OMS, wano Gine halfinaaɗo eɓɓoore nawna yontinooje e nder leydi ndin anndinii wonnde Afrik fof  no habbinoo ngal markal ɗiɗaɓal. Sabu e bi’ol makko ngal ɓuri moƴƴude adii ngal ngal. Dr Aliiwu Kamara o wi’etee, o tintindii e Abdullaay Jallo. Heɗoɗen mo.

Duɗe jannginirɗe ɗen uditaama e nder yoga leyɗe afrikanaaje baŋŋe hirnaange. Senegaal e Mali ko hanki e altene ɗe uditaa. Kono ngol uditugol wano Senegaal no hawrondirii e caɗeele yowitiiɗe e waame caggal ndiyam toɓɓo mawngo lekkolji ɗuuɗuɗi no e nder  ɗi'e demmbuɗe. Mali caɗeele kisal. Mbele pellite ɗen fof ƴettaam e ɗen leyɗe no jannde sukaaɓe ɓen  fuɗɗitoroo no haaniri non? Ko Siley Gorbal SI woni koɗo men hannde. Ko kanko ardii fedde nde wonaa laamuyankoore daraniinde jannde sukaaɓe e nder Afrik. O yewtidii e Abdullaay JALLO ko faati e nden toɓɓere heɗoɗen mo.

Burkina Faso, hooreejo laamu faddewu ngun Kapiten Ibrahima Tarawore ɓamii haala e aljuma yawtunde ndee ka tale leydi ndin. E ngal tintidal makko e jaandyankooɓe ɓen o hollii wonde ko kisa ngal l ɓuri hittude e makko wonaa  woote ɗen. Ɗii konnguɗi makko hawrondiri e hitaande timmunde e oo asewe caggal nde o samini laamu Hanri Pool Damiba. Holto o fewndii e golle ɗe o eɓɓunoo waɗude caggal nde o hetti laamu ngun ? Dr Daawuda Jallo ardiiɗo CISC fedde nde wonaa laamuyankoore daraniinde hakkeeji neɗɗo woni koɗɗo men. En yewtidii e makko ko yowitii e nden toɓɓere e Abdullaay JALLO heɗoɗen mo.

Ko hannde timmi hitaande gila ñaawoore warngooji 28 settembuur udditaa Konaakiri. E nder ɗii lebbi sappo e ɗiɗi, tuumaaɓe e lorriiɓe ɓen heɗaama. Kono woɓɓe e lorriiɓe yiituɓe ellaaji no ñaawore nden woni e yahrude non,  awokaaɓe ɓen kadi woɓɓe e maɓɓe dartinno golle maɓɓe ɗen. Caggal hitaande  gila nde fuɗɗi, Meeter Aamadu DS BAH, awokaajo, cukko hooreejo fedde nde wonaa laamuyankoore daraniinde hakkeeji neɗɗo yewtidii e Abdullaay Jallo no ndee ñaawoore yahri e ndee hitaande ɗoo. Heɗoɗen mo.

Ardiiɓe laamu faddewu ngun ƴetti pellital ñannde noogay e jowi nduu lewru ngam dirtinde subngooji hooreyaaku leydi ndin. Ɗin haanunooɗi waɗeede e lewru ɗiɗaɓuru hitaande waroore nden. Toppitiiɓe ɓee hino tuumi sosiyete faransnaajo noddirteeɗo "IDEMIA" addande ɓe caɗeele to baŋŋe winndugol wootooɓe. Ali Sidibe hertiyankeejo to baŋŋe dawro wi’i wonnde ngal pellital ko geldol (ɗaɓɓere hujjaaji) ngam ɓe dirtina subngooji ɗin. E bi’ol makko ɗuuɗɓe e taskotooɓe dawro leydi ndin no anndunoo ɓe waɗataa woote hooreyaaku leydi ndin e lewru ɗiɗaɓuru hitaande 2024. Heɗoɗen mo.

Niijeer, caggal luural teskaangal e ɗii leɓɓi ɗiɗi hakkunde sakkitiiɗi ɗoo hakkunde Paris e Ñaamey. Ɗum ko gila  laamu Mohammed Bazum saminaa, Emmaniyel Makron hooreejo Faransi ƴetti pellital ngam yaltinde konnunkooɓe makko e nder Niijeer. E bi'ol makko ko ɗoo e timmoode hitaande nden. Mbele oo happu no waawi yonude  nde konnunkooɓe e aalaaji kaɓirɗe maɓɓe yaltinee e nder ndin leydi. ? Holko dartingol ɗee golle maɓɓe battinta ko faati e haɓugol kuliyankaaku e nder leydi ndin. Jeneral Usmaan Kaan, Jeneraljo fowtiiɗo golle hooreejo kiɗɗo konu weeyo Senegaal na jaaboo ɗee lamnde Abdullaay Jallo . Ko kanko woni koɗo men hannde. Heɗoɗen mo.