Erfgrond is gewoonlik 'n stuk grond wat jy as seën van 'n familielid ontvang. Ons Hemelse Vader het aan elkeen van ons ook erfgrond gegee, maar dit voel nie of dit noodwendig altyd goed gaan op ons erfgrond nie. Dit voel nie of dit 'n seëning is nie. Vir ons om werklik die seën van God se erfgrond aan ons te geniet, moet ons deel hê aan Sy familie.

God het aan elkeen van ons gawes en talente gegee om by te dra tot Sy koninkryk. Soms steek ons, om verskillende redes, hierdie ”munstukke” weg. Ons moet egter besef ons moet dit wat God vir ons gegee het, gebruik.

Leemgrond is die vrugbaarste en beste grond vir ‘n plant of boom om in te groei en vrug voort te bring. God se Vaderhart is dat elkeen van Sy kinders leemgrond sal wees, dat dit wat Hy in ons lewe saai sal vrug dra. Hoe lyk die vrug van jou lewe - goed of sleg?

Hoeveel keer het ons al gebid vir iets soos ‘n nuwe werk of ‘n eggenoot waarmee jy jou lewe wil deel en wanneer God sy belofte nakom sukkel ons partykeer om die belofte wat ons aan Hom gemaak het na te kom. Die wêreldse menings, raad en opninies gooi mens baie keer van koers af en maak ons deurmekaar om hierdie beloftes na te kom. Dit is juis in hierdie belofte-grond tydperk waar ons, ons oë en dankbaarheid op God moet hou om ons beloftes ook na te kom. Wat is die belofte wat God aan jou gemaak het en wat doen jy daarmee? Wees braaf en trek op na jou belofte-grond!

Almal van ons is grond en a.g.v. sonde verander dit ons in bloedgrond. Sonde het 'n
skuldlas en dit hang oor ons skouers maar wanneer ons besef dat Jesus Sy bloed
gegee het om ons van die skuld van sonde los te maak, maak dit ons vry. Ons behoort
nou aan Hom want Hy het ons met Sy kosbare bloed gekoop.

Ons het gekyk na die gelykenis van die saaier in Matteus 13 en die vraag gevra: Watse tipe grond is ons? So gaan ons kan evalueer en toets hoe vrugbaar ons grond is, sodat God nuwe groei in ons lewe kan bring.

Alles begin by die grondwerke. Toe God die mens gemaak het, het Hy ons uit stof geskape met die doel om te werk en op te pas. Iewers het die grondwerk saam met God ontbreek, maar met Pinkster sien ons dat Jesus dit weer deur die Heilige Gees kom herstel het.

Grond speel 'n baie groot rol in ons elkeen se lewe en ons sien dit ook in die Bybel. Grond word baie as ‘n metafoor in die Bybel gebruik en in ons reeks gaan ons bietjie in die grond van ons menswees rondkrap, ‘n paar dinge omskoffel, kunsmis gooi, iets plant sodat ons ons grond (harte) kan voorberei vir Pinkster en wat God in hierdie Pinksterseisoen in ons lewe wil doen. Marius Malan het die reeks vir ons afgeskop en gesels oor Grondbreek. Daar is dinge wat ons in ons lewe kan inlaat wat ons harte kan verhard, wat ons groei kan verhoed. Ons moet die grond in ons lewe breek, sodat ons ruimte skep vir God om die goeie werk wat Hy in ons begin het, te kan voltooi.

Daar is twee tipes mense in hierdie lewe: mense wat vir hulself lewe en die wat vir ander lewe. Die groot vraag is watter een is jy? God roep ons om onselfsugtig vir Sy koninkryk te lewe.

Almal sê altyd ons moet ons Bybel lees, maar het jy al ooit gewonder hoekom? Jy sien, die Bybel is soveel meer as net 'n boek. God het dit vir ons gegee om as wapen te gebruik in die geestelike oorlog waarin ons onsself bevind. Ons het reeds die oorwinning in die oorlog déúr Jesus, maar met ons wapen kan ons grond terugwen wat die vyand van ons probeer steel.