សង្គ្រាម​នៅអ៊ុយក្រែន មិនមែនត្រឹមតែបង្កការលំបាក មកដល់អឺរ៉ុប ក្នុង​ផ្នែក​ថាមពលប្រេងឥន្ធនៈ និង​ឧស្ម័ន​ហ្កាសប៉ុណ្ណោះទេ តែវាកំពុងតែបង្កឧបសគ្គជាខ្លាំង មកលើ​វិស័យ​កសិកម្ម​របស់អឺរ៉ុប។ នោះគឺបញ្ហា ជីកសិកម្ម ដែលរំពឹងខ្លាំងណាស់ ទៅលើការនាំចូលពីរុស្ស៊ី​។ បន្ទាប់ពីបានរងទណ្ឌកម្ម​របស់អឺរ៉ុប រដ្ឋាភិបាលរុស្ស៊ី បានចេញបញ្ជាឲ្យក្រុមហ៊ុន​ផលិត​ជីកសិកម្ម​របស់រុស្ស៊ីទាំងអស់ ត្រូវផ្អាកឈប់នាំចេញទៅកាន់អឺរ៉ុប។ ហ្កាសក៏គ្មាន ជីកសិកម្មក៏គ្មាន ដែលនេះគឺជាផលប៉ះពាល់នៃសង្គ្រាមអ៊ុយក្រែន មក​លើវិស័យកសិកម្មអឺរ៉ុប។