ថ្ងៃចន្ទ ទី៦មីនា រដ្ឋាភិបាល​កូរ៉េខាងត្បូង បានប្រកាសនូវ​គម្រោងថ្មីមួយ ដើម្បី​ប៉ះប៉ូវសងជម្ងឺចិត្ត ជូនដល់ជនរងគ្រោះកូរ៉េខាងត្បូង ដែលត្រូវបាន​គេចាប់បង្ខំឲ្យធ្វើការ កាលពីក្នុងជំនាន់ជប៉ុនដាក់អាណានិគម រវាងពីឆ្នាំ​១៩១០ ដល់ឆ្នាំ​១៩៤៥។ ជាផែនការថ្មី ដែលរដ្ឋាភិបាល​កូរ៉េខាងត្បូងបាន​អះអាងថា នឹងអាចបិទបញ្ចប់ទំព័រដ៏ឈឺចាប់ កាលពីអតីតកាល ហើយនឹងឈានទៅចាប់ផ្តើមកសាងទំនាក់ទំនងល្អប្រសើរ រវាងកូរ៉េខាងត្បូងនិង​ជប៉ុន​។ តែយ៉ាងណាក៏ដោយ ផែនការសងជម្ងឺចិត្តដែលរដ្ឋកូរ៉េខាងត្បូងបានប្រកាសនេះ បានទទួលនូវការរិះគន់ជាខ្លាំង ពីសំណាក់សមាគមជនរងគ្រោះ ដោយគេលើកឡើងថា វាជារឿងមិនអាចទទួលយកបានទេ ដែលភាគីជប៉ុន មិនបាន​​ចូលរួមសុំទោស តាមរយៈការផ្តល់ជាថវិកាសងជម្ងឺ​ចិត្តដោយ​ផ្ទាល់ មកឲ្យជនរងគ្រោះ។