កាលពីថ្ងៃពុធសប្តាហ៍​កន្លងទៅ រដ្ឋាភិបាលចិន បានសម្រេចចេញវិធានការថ្មី បន្ធូរបន្ថយ​យ៉ាងខ្លាំងទាក់ទិននឹង​ការប្រយុទ្ធប្រឆាំងកូវីដ​១៩។ ជាការបោះជំហាន ​បោះបង់ចោល​គោលនយោបាយ​កូវីដសូន្យដ៏តឹងតែង ដែលរដ្ឋាភិបាលចិន បាន​អនុវត្ត​ជិត​៣ឆ្នាំមកនេះ​។ ជាងនេះទៀត ​នៅថ្ងៃចន្ទនេះ អាជ្ញាធរសុខាភិបាលចិន បាន​ប្រកាសឈប់​ប្រើ​កម្មវិធី​ទូរស័ព្ទ ដែល​តាមដាន​ការធ្វើដំណើរបំលាស់ទីរបស់​ប្រជាជន តទៅទៀត។ នេះជា​សញ្ញាបញ្ជាក់ថា រដ្ឋាភិបាលចិនបាន​ប្តេជ្ញាយ៉ាងច្បាស់ ឈប់អនុវត្ត​គោល​នយោបាយ​កូវីដ​សូន្យ​ ដោយ​ទុក​ឲ្យ​ប្រជាជន​មាន​ភាពបន្សាំជាមួយ​មេរោគកូវីដ។ យ៉ាងណាក៏ដោយ គេសង្កេត់ឃើញថា ករណីឆ្លងរាលដាលកូវិដ ទំនងជាកំពុងស្ទុះឡើងខ្លាំង គួរឲ្យ​បារម្ភ ដែលអាចបណ្តាល​ឲ្យ​មាន​អ្នកជំងឺឈឺធ្ងន់ច្រើននៅក្នុង​ប្រទេសចិន។