នៅ​ក្នុង​ប្រទេស​ចិន រដ្ឋាភិបាល​បាន​សម្រេច​បន្ធូរបន្ថយ​មួយ​កម្រិត​ទៀត​នូវ​វិធានការ​រឹតបន្តឹង​កូវីដ១៩។ បន្ទាប់​ពី​បាន​បោះបង់​ចោល​នូវ​នយោបាយ​សូន្យ​កូវីដ ចិន​បាន​ប្រកាស​នា​យប់​ថ្ងៃ​ចន្ទ ទី២៦ ធ្នូ​ពី​ការ​បិទបញ្ចប់​កាតព្វកិច្ច​ធ្វើ​ចត្តាឡីស័ក​សម្រាប់​អ្នកដំណើរ​ចូល​ស្រុក​ចិន​ចាប់​ពី​ថ្ងៃទី៨ មករា ឆ្នាំ ២០២៣ ទៅ។ ដំណឹង​មួយ​នេះ​បាន​ធ្លាក់​មក​នៅ​ប៉ុន្មាន​ថ្ងៃ​មុន​ដាច់​ឆ្នាំ ២០២២ និង​នៅ​ជាង ១ខែ​មុន​ថ្ងៃ​ចូល​ឆ្នាំ​ចិន។ អ្នក​ដែល​ត្រេកត្រអាល​នឹង​ដំណឹង​នេះ​មុន​គេ គឺ​គ្មាន​នរណា​ក្រៅ​ពី​ពលរដ្ឋ​ចិន​ដែល​បាន​ជាប់​ឃុំ​ក្នុង​ប្រទេស​ខ្លួន​ឯង​ជិត ៣ឆ្នាំ​ដោយសារ​កូវីដ១៩។