La classica

L'emprima Classica dal 2018 tracta l'uvertura.Uvertura vul dir avrir. En la musica po quai esser l'introducziun en in'opera, in'operetta, tar in oratori u tar musica da scena. En la romantica han ins lura creà la uschenumnada uvertura da concert.Da Felix Mendelssohn udin nus sia «Trompeten-Ouvertüre», ina vaira uvertura da concert. Lura suonda musica da Johann Strauss (Fledermaus), Mikhail Glinka (Russlan e Ludmilla), Gioacchino Rossini (Il Barbiere di Siviglia), Franz von Suppé (Leichte Kavallerie) e Giuseppe Verdi (La Traviata e La forza del destino).

Nadal – la festa da la legria, da la glisch ed era la festa dal chant e da la musica.La Classica per la vigilgia da Nadal porta chant e musica «per la notte di Natale» co Arcangelo Corelli numna ses Concerto grosso, op. 6 nr. 8 Daspera udin nus anc autra musica dal baroc scritta per Nadal (Manfredini, Bach, Händel e Heinrich). Munida vegn questa musica cun chants sin via vers Betlehem (Adeste fideles, Transeamus usque Betlehem, Siemi da Nadal, Ave Maria, Da mesanotg fideivlamein e Clara notg da Nadal).

La Classica fa viadi viers Betlehem.Transeamus usque Betlehem: Il Dresdner Kreuzchor dat tschintg veglias chanzuns da Nadal tudestgas («Wie soll ich dich empfangen», «Vom Himmel hoch», «In dulci jubilo», «Kommet ihr Hirten» ed «Es ist ein Ros'entsprungen»). Lura interpretescha quest chor ensemen cun la Philharmonia da Dresden e solists vocals la cantada chorala da Felix Mendelssohn «Vom Himmel hoch». La finiziun fa la cantada pastoralis «Venite ocius, transeamus usque in Betlehem» da Johann Heinrich Schmelzer cun ils tenors Peter Schreier ed Eberhard Büchner accumpagnads da la Chapella Sagittariana.

Musica da la romantica franzosa - musica en in tun rosa-dultsch, plaschaivel.Charles Gounod (1818-1893), dad el udin nus: Allegro molto (Sinfonia Nr. 1), Finale (Petite Symphonie), parts da la Messe solennelle de Sainte-Cécile e siu renomau Ave Maria (tenor Bach).Gabriel Fauré (1845-1924), dad el dudin nus: Cantique de Jean Racine e la suita Masques et Bergamasques. Ils interprets: Academy of St. Martin-in-the-Fields, Chor et Orchestre Radio France, City of Landon Orchestra & The Cambridge Singers, Wiener Philharmoniker, Münchner Bläserakademie.

Concert da giubileum «30 onns Josias Just solo-clarinettist en il ZKO».Cumenzà ha tut il 1987 en la baselgia da Ziràn. Lezza giada è Josias Just sa preschentà sco solist. E ses sunar ha imponà il dirigent Edmond de Stoutz uschè ferm, ch'el ha engaschà directamain Josias sco solo-clarinettist en ses orchester. E 30 onns pli tard ha Josias dà là en la baselgia da Ziràn ses concert da giubileum. «La Classica» porta parts da quel concert dals 2 da fanadur 2017. Duas ovras da Wolfgang A. Mozart en A-Dur: Sinfonia Nr. 21, KV 134 e il Concert per clarinetta ed orchester, KV 622. Supplement: John Ratter: Lamento ord Magnificat en ina versiun per clarinetta ed orchester a cordas.

Ils 29 da november avant 220 onns è naschì Gaetano Donizetti.Ensemen cun Bellini e Rossini furma Donizetti il traifegl illuster dal belcanto. Da quest' impurtanta epoca da l'opera taliana che ha gì ses zenit tranter il 1820 e 1840. Gaetano Donizetti è naschì ils 29 da november 1797 sper Bergamo, e mort là il 1848 suenter greva malsogna da spiert. El ha cumponì 70 operas, musica sinfonica, musica da chombra e sacrala.Per ses 220avel anniversari porta la Classica musica da las operas: Gabriella di Vergy, L'elisir d'amore, Lucia di Lammermoor, La favorite, Don Pasquale ed Anna Bolena. Ed in da ses bels chants sacrals, in Ave Maria.

La Classica cun musica da trais cumponists detg differents.Johann Nepomuk Hummel (1778 Bratislava, mort 1837 Vienna): Dad el ch'ha vivì dus onns tar Mozart a Vienna e ch'è lura daventà successur da Joseph Haydn tar la Capella Esterhazy ad Eisenstadt udin nus il Concert per trumbetta en Es. «Tge è nossa vita auter ch'ina retscha da preludis e quels mainan nus a la chanzun finala, a la mort»; quai ha Franz Liszt (1811-1886) ditg da ses poem sinfonic Les Préludes. Da Carl Maria von Weber (1786-1826), il romanticher tudestg, udin nus duas uverturas da concert: Jubel-Ouvertüre e Preciosa.

Johannes Brahms e sia musica sinfonica.Sias quatter sinfonias èn hits. Ses dus concerts da clavazin e quel per violina èn vers juvels. Sias serenadas e ses sauts ungares aud'ins adina puspè gugent. Sia musica da chombra tutga tranter il meglier da quai gener. E ses «Ein deutsches Requiem» è da gronda profundità. Dentant era tar il gener intim da la chanzun d'art datti perlas.La classica porta intgins hits cumpositorics da Johannes Brahms: divers sauts ungares, l'Akademische Festouvertüre, insatgs dal concert da clavazin nr. 2, da quel per violina, da sia 3. sinfonia e da sia serenada nr. 1.

Atun – tar Antonio Vivaldi, Joseph Haydn e Giuseppe Verdi.Atun – la stagiun da las colurs, da la racolta, dal far ventschidas e betg il davos era la stagiun che vala sco simbol da la fin da la vita; quest temp ha adina puspè inspirà cumponists.«La classica» porta trais atuns mess en musica dad Antonio Vivaldi (L'autunno ord: Le quattro stagioni da 1725), Joseph Haydn (Der Herbst da l'oratori Die Jahreszeiten da 1801) e la musica da ballet da Giuseppe Verdi (Atun da l'opera I Vespri siciliani da 1855).

La quarta part maina nus a Paris tar ils dus giuvens Saint-Saëns e Bizet.Paris 1835: Camille Saint-Saëns, in uffant tut spezial: cun 3 onns sa el leger e scriver, cun 6 cumpona el si'emprima ovra, cun 11 dat el ses emprim concert sco pianist, cun 15 ha el terminà sia emprima sinfonia. Ins discurriva là d'in «nov Mozart». Nus tadlain ses Concerrt per clavazin nr. 1, op. 17 e la Tarantella, op. 6.Paris 1838: Georges Bizet, era in uffant talentà, ina spezia scheni. Cun 9 onns daventa el scolar da Gounod al conservatori da Paris, cun 17 cumpona el sia emprima sinfonia e quai en mo paucs dis. La primaudiziun ha dentan gì lieu per 80 onns pli tard a Basilea. Nus tadlain ella.