La classica

Martin Luther – il chant unescha nus en la cardientscha.En sia vita ha la musica giugà la segund'impurtanta rolla suenter la teologia. «Die Musik ist eine Gabe und ein Geschenk Gottes», uschè ha Martin Luther descrit l'impurtanza da la musica per cardientscha, per cor ed olma. El sez era in versà chantadur e sunava oraifer la lauta. Per el è il chant stà in'arma effectiva en il cumbat refurmatoric.«La classica» porta musica da la refurmaziun; ovras da Martin Luther, Johann Crüger, Georg Neumark, Johann S. Bach, Felix Mendelssohn e Johannes Brahms.

En la terza part entupain nus dus giuvens cumponists russ: Sergej Prokofiew e Alexej Glasunow.Anno 1882: In giuven student da 17 onns fa stut il public pupergnà da Son Petersburg. Gist ha si'emprima sinfonia gì primaudiziun mundiala. In success cumplain. «El na sa sviluppescha betg da di a di, mabain dad ura ad ura», ha ses magister Rimski-Korsakow ditg ina giada da ses scolar Alexej Glasunow. Nus tadlain sia Sinfonia nr. 1 en E-Dur, op. 5.Anno 1911: Sergej Prokofiew: Cun 20 onns ha el cumponì ses emprim concert da clavazin ed orchester. Era el, sco Glasunow, scolar da Rimski-Korsakow. Pianist e cumponist da renum mundial. Nus tadlain quest concert da clavazin en D-Dur, op. 10.

En la segunda part entupain nus il giuven Mendelssohn ed il giuven Schubert.Anno 1813: Franz Schubert, il mat da 16 onns era scolar al Convict da Vienna. Las notas nunsuffizientas han alarmà il bab. Enstagl da cumponer – emprender dapli! Quai il cumond dal bab. Il Franzl cumpona dentant sia emprima sinfonia e sgola da la scola.Anno 1821: Felix Mendelssohn, figl da famiglia ritga: Cun 12 onns ha el cumponì sia emprima gronda sinfonia. Avant ha el gia gì scrit 12 sinfoniettas per artgets. Quellas ha el però bittà en il chanaster da palpiri. Cun 17 onns ha el lura cumponì la musica tar il giug «Ein Sommernachtstraum».

La classica cun musica dal giuven Mozart e dal giuven Beethoven.Anno 1764: Wolfgang Amadé Mozart, il mattet dad 8 onns era cun ses bab a Londra. Là ha el scrit sia emprima sinfonia, ina musica che stat anc en la sumbriva dad in Johann Christian Bach. Era lez viveva quel temp a Londra. Ha Johann Ch. Bach influenzà il giuven Mozart?Anno 1784: Ludwig van Beethoven. Cun 14 onns ha el cumponì ses emprim concert da clavazin. Betg in dals 5 gronds ed enconuschents. Na, quel qua porta il nr. 0. Vis uschia ha Beethoven scrit 6 concerts per clavazin ed orchester. Nus tadlain il nr. 0.

La Classica cun ina maschaida franzos-tudestg-austriaca. L'orchester sinfonic dal SWR interpretescha ovras dals cumponists franzos Maurice Ravel ed Albert Roussel e dal cumponist austriac Wolfgang Amadé Mozart.Il schaner 2016 ha l'orchester sinfonic dal radio tudestg Südwestrundfunk concertà en la Liederhalle a Stuttgart. Sut la batgetta dal dirigent Stéphane Denève han els sunà ovras da Maurice Ravel, Albert Roussel e Wolfgang Amadé Mozart. Parts da quest concert pudais Vus tadlar en la Classica dad oz.Redacziun: Gion Dominic Pohle

La classica cun musica plain colurs.Edvard Grieg, il maister da las colurs musicalas, el ha cumponì 1872 la musica da tribuna Sigurd Jorsalfar. Da quest gieu tadlain nus il renumà Marsch d'ovaziun (Huldigungsmarsch). E daspera udin nus dus da ses quatter sauts sinfonics e la commoventa chanzun da Solvejg ord Peer Gynt chantada da Letizia Scherrer.Michael Haydn, il frar giuven da Joseph, el ha cumponì 1771 in concert per flauta ed orchester. Emmanuel Pahud interpertescha quest concert a moda maistrila. Accumpagnà vegn el dal Haydn-Ensemble Berlin che dat per finir dus scherzis da Joseph Haydn.

La classica cun ovras da Richard Wagner, Richard Strauss e sir Edward Elgar. L'orchester da la Svizra franzosa ha sunà ensemen cun il cellist danais-svedais : Andreas Brantelid.L'October 2016 ha l'orchester da la Svizra franzos concertà a Genevra en la Victoria Hall. Sut la batgetta dal dirigent englais Jonathan Nott han els sunà ensemen cun il cellist Andreas Brantelid ovras da Richard Wagner, Richard Strauss e sir Edward Elgar. Parts da quai concert pudais Vus tadlar en la Classica dad oz.

Ils 4 da settember avant tschintg onns è Gion Antoni Derungs mort.Desideri – sut quest titel ha gì lieu ils 6 da settember 2015 a Cuira in concert tut spezial. Envidà aveva la Kammerphilharmonie Graubünden e l'ensemble cantus firmus surselva cul dirigent Clau Scherrer. Trais ovras da Gion Antoni Derungs èn vegnidas interpretadas a moda impressiunant-fascinanta. «La classica» porta duas da quellas, numnadamain la Suita sursilvana, op. 76b/1988 e la Sontga Margriata, op. 78/1978. Solists vocals: Ingrid Alexandre (Sontga Margriata), Lena Kiepenheuer (paster petschen) e Chasper-Curò Mani (raquintader).

Trais da la Germania: Carl Maria von Weber, Ludwig van Beethoven e Max Bruch.La classica porta questa giada ovras da trais cumponists da derivanza germana: Carl Maria von Weber, naschì 1786 ad Oldenburg (Der Freischütz - uvertura, Concertino per clarinetta ed orchester), Ludwig van Beethoven, naschì 1770 a Bonn (Chorfantasie, Piano Sonate Nr. 8 «Pathétique» - terz moviment) e Max Bruch, naschì 1838 Köln (Concert per violina ed orchester - segund moviment).

Bels muments musicals, quai il tema da la classica.En la seria da stad cun hits porta «La classica» questa giada singulas parts (moviments) dad ovras pli voluminusas (sinfonias, concerts).Nus udin cumposiziuns dals classichers da Vienna: Joseph Haydn, Wolfgang Amadeus Mozart e Ludwig van Beethoven. E lura anc dad in auter da Vienna, da Franz Schubert.