La classica

La classica cun insatgs da dus concerts dirigi da Mario Schwarz.Mario Schwarz da Trun sesent ad Arbon ha dirigì en ses concert da cumià ina raritad da Giovanni Battista Pergolesi, in Dixit Dominus in D chattà en la claustra da Beromünster. Quel concert ha gì lieu ils 14-04-2017 a Heiden. Cun quell'ovra ha Mario Schwarz dà, suenter 40 onns, adia al chor ed orchester dal Collegium musicum Ostschweiz. Solists: Muriel Schwarz, Kismara Pessatti, Nik Kevin Koch e Chasper-Curo Mani. Sper Pergolesi porta La classica in insatg dal concert 2014 a Rorschach; l'aria da Mozart «Voi avete un cor fedele».

La Classica cun musica da trais generaziuns Mozart.Tat Leopold (1719 - 1787), bab Wolfgang Amadeus (1756 - 1791) e figl e biadi Franz Xaver (1791 - 1844) - sper las enconuschentas dinastias da musicists (famiglia Bach, famiglia Strauss) san ins era vesair ils trais Mozarts sco tals. La Classica porta musica dal tat, bab e biadi. Nus udin da Leopold Mozart parts da sias sinfonias: Die Bauernhochzeit, Burlesca, Neu Lambacher e Kindersinfonie. Da Wolfgang Amadeus Mozart: il Molto Allegro da sia sinfonia Nr. 40 KV 550 e da Franz Xaver Mozart ses segund concert da clavazin, quel en Es-Dur op. 25.

Goethe e Schubert - l'istorgia d'ina relaziun disturbada.Il vegl sabi da Weimar ed il giuven plain retegnientschas da Vienna: Goethe e Schubert, dus genis! Il center poetic da las chanzuns d'art da Franz Schubert furma Johann Wolfgang von Goethe. 73 da las 600 chanzuns ha Schubert cumponì tenor pleds dal prinzi-poet da Weimar. La musica da Schubert e la lirica da Goethe – quai è la verificaziun da duas energias e londerora resulta ina terza: «Das Wunder des Liedes». La Classica lascha resunar ils pleds e discurrer ils tuns da questa relaziun disturbada.

La sinfonia dal fieu, la splendur da la glina, in regal spezial e la sinfonia da la fantasia – Las ovras da «La Classica» dad oz han schlantsch u stgaudan il cor.L'orchester da la Svizra taliana ha passentà in grev temp. La finanziaziun n'era betg pli segirada e la direcziun na saveva betg co ì duai ir vinavant. Ma dapi curt èsi cler che l'orchester è spendrà. Motiv avunda per RTR da preschentar in concert ch'è vegnì registrà il favrer 2015 en il Stelio Molo Auditori a Lugano.

Musica da Rossini, Verdi, Donizetti, Martucci e Ferlendis.La bella Italia n'è betg mo bella e ritga quai che pertutga cuntrada, natira, cuschina e vin, mabain ella è era ritga quai che pertutga cultura - era cultura da musica. «La Classica» porta questa giada ovras da trais gronds ed impurtants: Rossini, Verdi, Donizetti e cumposiziuns da dus main enconuschents: Martucci e Ferlendis. Lur prenums: trais Giuseppes, in Gaetano ed in Gioacchino Antonio.

Johannes Brahms e sia musica sinfonica.Sias quatter sinfonias èn hits. Ses dus concerts da clavazin e quel per violina èn vairs juvels. Sias serenadas e ses sauts ungarais aud'ins adina puspè gugent. Sia musica da chombra tutga tranter il meglier da quel gener. E ses «Ein deutsches Requiem» è da gronda profunditad.Denant era tar il gener intim da la chanzun d'art datti perlas. La classica porta intgins hits cumpositorics da Johannes Brahms: divers sauts ungarais, l'Akademische Festouvertüre, insatgs dal concert da clavazin nr. 2, da quel per violina, da sia 3. sinfonia e da sia serenada nr. 1.

In sguard en la musica dal 18avel tschientaner cun trais cumponists renumads da la musica barocca: Händel, Vivaldi ed Albinoni.L'october 2015 ha l'orchester baroc da l'Uniun europeica concertà en la Mihail Jora Concert Hall a Bucarest en la Rumenia. Sut la batgetta dal Danais Lars Ulrik Mortensen ha l'orchester sunà ovras da Georg Friedrich Händel, Antonio Vivaldi e Tomaso Giovanni Albinoni. Cun lur cumposiziuns fan els reviver ina part da la musica dal 18avel tschientaner.Redacziun: Gion Dominic Pohle

Per trais festas ha Bach cumponì in oratori (Nadal, Pasca ed Anzainzas).L'oratori da Pasca è per propi ina cumposiziun da parodia. La cumposiziun originala aveva in auter text ed era patratgada per in'autra occasiun. En quest cas sa tracti dad in'ovra scritta sco cantada da gratulaziun per il 43avel anniversari dal cont Christian von Sachsen-Weissenfels. Quai è stà ils 23 da favrer 1725.Gist suenter ha Bach integrà questa cantada profana en in'ovra liturgica per Pasca 1725. L'oratori ha 11 numers. Nus tadlain il Collegium Vocale cun Philippe Herreweghe e quatter solists vocals.

Ils 15 d'avrigl po in dals impurtants musicists rumantschs festivar ses 85avel anniversari.Cun numerusas cumposiziuns, dentant era sco dirigent ed expert ha professer Gion Giusep Derungs marcà sensiblamain la vita musicala en il Grischun.La classica da RTR renda omagi al giubilar lumnezian cun emetter ovras dad el dadas dal Rätisches Streichquartett (Suita romontscha, cumponì 1982), da Letizia Scherrer, Maria Riccarda Wesseling, Alvin Muoth, da la Ligia Grischa, da la Südwestdeutsche Philharmonie da Konstanz (Fidonza, cumponì 1994) e dal Calamus-Trio (Sommertag, Tänze aus Graubünden, cumponì 2013).

Per il 120avel di da la mort da Johannes Brahms.Johannes Brahms, naschì il 1833 a Hamburg, mort ils 3 d'avrigl 1897 a Vienna. Là ha el vivì e lavurà ils davos 20 onns da sia vita. Là, en il santeri central è el vegnì sutterrà, e quai sper ses dus gronds collegas Beethoven e Schubert. Brahms era il maister da las armonias. Il tipic tun da Brahms è stgir, chaud, romantic. La Classica sa fatschenta cun ils dus aspects: Brahms e l'inspiraziun populara, e l'influenza dal valzer da Vienna sin sias chanzuns d'amur.