La classica

Dus maisters da l'epoca da la romantica – Piotr Ilijtsch Tchaikovsky e Johannes Brahms ans mainan sin in viadi tras la Russia e la Germania.L'october 2016 ha l'orchester da la Svizra franzosa concertà en la Victoria Hall a Genevra. Els han accumpagnà il pianist svizzer Francesco Piemontesi sut la batgetta da Kazuki Yamada. Tranter auter han els sunà l'ovra che vegn era numnada «la pitschna Russia»: la segunda sinfonia da Piotr Ilijtsch Tchaikovsky. E lura hani interpretà ina part da l'emprim concert per clavazin da Johannes Brahms. En quest'emissiun faschain nus in viadi da la Russia enfin la Germania.Redacziun: Gion Dominic Pohle

Sentiments da primavaira tar Haydn, Schubert e Mendelssohn.Per la segunda giada dechanta La classica la stagiun dal prosperar, chatschar e flurir. Nus udiun da Joseph Haydn (1732-1809) «La primavaira» ord Die Jahreszeiten - Las stagiuns, da Felix Mendelssohn-Bartholdy (1809-1847) L'emprim moviment da sia 4. sinfonia (Die Italienische), dal classicher da la chanzun d'art, Franz Schubert (1797-1828) «Im Frühling» interpretà dad Anne Sofie von Otter e «Frühlingssehnsucht» chantà da Wolfgang Holzmair e da Frédéric Chopin (1810-1849) il valser «Les Sylphides» en ina orchestraziun da Roy Douglas.

Primavaira en la musica classica.La classica dechanta la stagiun dal prosperar, chatschar e flurir. Nus udin: Un bal (Hector Berlioz), Dôme épais le jasmin (Léo Delibes), Serenade (Karl Goldmark), Solveig's Song (Edvard Grieg), Ballet ord Rosamunde (Franz Schubert), Frühlingsstimmen (Johann Strauss), La primavera - 1. allegro (Antonio Vivaldi), Schenk man sich Rosen im Tirol (Carl Zeller), Rosen aus dem Süden (Johann Strauss) e Slavischer Tanz nr. 6 (Antonin Dvorak).

Musica instrumentala betg tant enconuschenta da Beethoven.Il revoluzer tudestg (naschì il 1770 a Bonn) che ha vivì e lavurà il bler da sia vita a Vienna, ha cumponì 11 uverturas, e quai pli u main parallelamain cun sias sinfonias. L'emprima datescha dal 1800 (Prometheus), la davosa dal 1822 (Zur Weihe des Hauses).Beethoven ha scrit uverturas faussas che na stattan betg a l'entschatta d'ina opera, d'in oratori - savens è quai musica da program sco Zur Namensfeier u Zur Weihe des Hauses - ed uverturas vairas sco: Leonore I-III, Egmont e Fidelio. David Zinman dirigia l'Orchester da la Tonhalle da Turitg.

Musica instrumentala dal giuven Verdi che n'è betg tant enconuschenta.Passa 300'000 persunas han accumpagnà Giuseppe Verdi il favrer 1901 a Milano sin ses davos viadi. Arturo Toscanini ha dirigì sco salid da cumià il «Va pensiero» (Nabucco), chantà dad 833 chantadurs e chantaduras.Naschì è Giuseppe Verdi ils 10 d'october 1813. L'Artg musical porta musica dal grond maestro talian, ovras ch'el ha scrit en la vegliadetgna tranter 23 e 25 onns. Verdi era lura «maestro di musica» a Busseto. Là viveva el cun sia dunna Margherita e ses dus uffants Virginia ed Icilio. Tranter 1838 e 1840 moran omadus uffants e sia dunna. Ina greva frida per Verdi!Redacziun: Giusep G. Decurtins

Mariss Jansons dirigia cumposiziuns da Chabrier, Brahms, Liszt e Gershwin.Il pled grec «rhapsodos» sa cumpona da «rhaptein», quai che munta «cuntschar u far chaltschiel» ed «odein» quai che vul dir «chantar». Ina rhapsodie è pia uss ditg salop – in tarpun musical cuntschì ord divers tocs. Dapi la romantica munta quai era ina cumposiziun u fantasia sur da chanzuns popularas u musica tradiziunala. Uschia stat la rhapsodie en stretg contact cun il naziunalissem. Per gronda part ha ella era in num d'in pajais en il titel, per exempel Ungaria, Rumenia, Spagna, Norvegia u America (Rhapsody in Blue).

Nus Rumantschs avain era nossa musica classica.Sut il titel «Musica artistica en tun popular cumponida dad indigens» porta La classica en ina segunda part ovras dad Anny Roth-Dalbert (Ode an das Engadin), Armin Caduff (Ritornell, op. 36 – suita da chanzuns rumantschas), Gion Antoni Derungs (Suita sursilvana, op. 76b - sis chanzuns popularas per oboa, fagot ed artgets), Domenic Janett (Orma engiadinaisa per clarinetta ed artgets) ed Armon Cantieni (A la riva da l'En - suita per clavazin).

Nus Rumantschs avain era nossa musica classica.Sut il titel «Musica artistica en tun popular cumponida da Grischuns» porta La classica en ina emprima part ovras da Gion Giusep Derungs (ord: Per a Per), Domenic Janett (Orma engiadinaisa e Concertino per orchester d'instruments a corda ed Ils Fränzlis da Tschlin), Hannes Meyer (Suite paysanne per quartet d'artgets ed orgla) e da Gion Antoni Derungs (Sis chanzuns popularas rumantschas per clarinetta ed orchester a corda).

La classica cun musica da Beethoven, Danzi e Waxman.Fantasia munta en la musica ina cumposiziun senza ina furma exacta, definida. Questa furma nunlianta lubescha in'interpretaziun emoziunala ed expressiva dal patratg musical. Spontanitad e libertad èn qua ils chavazzins e quai malgrà ch'era la fantasia è nudada cun notas sin palpiri. Gea, qua e là envida ella schizunt d'improvisar.Nus udin: Chorfantasie (Beethoven), Fantasia 'La ci darem la mano' (Danzi), Carmen-Fantasie (Waxman), Erinnerung an Ernst oder Der Karneval von Venedig (bab Strauss) e Fantasia ord Das kleine Hofkonzert (Nick).

Dapi la stad 2016 è Philippe Bach directur musical da l'orchester da chombra dal Grischun. Fin settember han els dà l'emprim concert sinfonic sut sia batgetta. Quai emprim concert che ha gì lieu a Cuira en il teater ils 29 da settember 2016 han noss collegas da SRF 2 cultura registrà. Il solist al cello è Patrick Demenga. Oz pudais tadlar quest concert durant «La classica» sin las undas rumantschas.