La classica

La Classica cun musica da trais generaziuns Mozart.Tat Leopold (1719-1787), bab Wolfgang Amadeus (1756-1791) e figl e biadi Franz Xaver (1791-1844) – sper las enconuschentas dinastias da musicists (famiglia Bach, famiglia Strauss) san ins era vesair la dinastia dals trais Mozarts sco tala. La Classica porta musica dal tat, bab e biadi. Nus udin da Leopold Mozart parts da sias sinfonias: Die Bauernhochzeit, Burlesca, Neu Lambacher e Kindersinfonie. Da Wolfgang Amadeus Mozart: il Molto Allegro da sia sinfonia Nr. 40 KV 550. Da Franz Xaver Mozart ses secund concert da clavazin, quel en Es-Dur op. 25.redacziun: Giusep G. Decurtins

La Classica fa reverenza a concerts.Concerto è talian e munta nagut auter che metter ensemen duas funtaunas da musica u sco en dumonda e resposta u a moda e maniera da «cumbat». Per regla è quai solist/solista cun in orchester. Questa furma dal concertare vegn pratitgada sistematicamain dapi il baroc. La Classica porta musica pli giuvna, cumposiziuns da la classica e romantica.Nus udin: Hornkonzert Nr.1 (Mozart), Introduzione e tema con variazione (Rossini), Romance f-moll (Dvorak), Concerto per flauto (Rondo russo) (Mercadante) e Klavierkonzert Nr. 2 (Rondo) (Beethoven).

L'emprima classica en il 2017 tracta l'uvertura, stain nus gea a la sava da l'onn nov.Uvertura vul dir avrir. En la musica po quai esser l'introducziun en in'opera, in'operetta, tar in oratori ni tar musica da scena. En la romantica han ins lura creà l'uschenumnada uvertura da concert.Da Felix Mendelssohn udin nus sia «Trompeten-Ouvertüre», ina vaira uvertura da concert. Lura suonda musica da Johann Strauss (Fledermaus), Mikhail Glinka (Russlan e Ludmilla), Gioacchino Rossini (Il Barbiere di Siviglia), Franz von Suppé (Leichte Kavallerie) e da G. Verdi (La Traviata e La forza del destino).

Musica e chant per ils dis enturn Nadal.La Classica fa viadi vers Betlehem: Il Dresdner Kreuzchor dat tschintg veglias chanzuns da Nadal tudestgas: 'Wie soll ich dich empfangen', 'Vom Himmel hoch', 'In dulci jubilo', 'Kommet ihr Hirten' ed 'Es ist ein Ros' entsprungen'. Lura interpretescha quest chor cun la Filharmonia da Dresden e solists vocals la cantata chorala da Felix Mendelssohn 'Vom Himmel hoch'. La finiziun fa la cantata pastoralis 'Venite ocius, transeamus usque in Betlehem' da Johann Heinrich Schmelzer cun ils dus tenors Peter Schreier ed Eberhard Büchner, accumpagnads da la Capella Sagittariana.

«In pau losch da quella cumposiziun sacrala sun jau». Joseph Haydn, 1796.Anno 1794: Joseph Haydn era a Londra cura che ses patrun, il prinzi-regent Esterhazy, è mort. Ses successur Nikolaus II cloma enavos Haydn a la curt. Ses pensum: cumponer - sper auter - mintg'onn per il di dal num da princessa Maria Hermenegild ina messa festiva. L'emprima da questa incumbensa è la Missa in tempore belli, era numnada «Die Paukenmesse» (1796). Nus udin ella qua cun Nikolaus Harnoncourt, l'Arnold Schönberg Chor ed il Concentus musicus da Vienna. SolistAs: D. Röschmann, E. von Magnus, H. Lippert ed O. Widmer.

Avant 225 onns è mort in dals gronds da la musica: Wolfgang Amadé Mozart.Ina curta vita: be 35 onns! Wolfgang Amadé Mozart è mort ils 5 da december 1791 a Vienna. Sia musica vala anc oz sco simbol d'armonia cumplaina e sentiment da ventira. La classica porta musica sacrala dal grond maister austriac. Nikolaus Harnoncourt dirigia il Concentus musicus Wien, solistas vocalas da renum ed il Chor Arnold Schönberg. Nus udin: Laudate Dominum, Dulcissimum convivium, Exsultate jubilate, Venite populi, Benedictus sit Deus, Sancta Maria mater Dei, Alma Dei creatoris e Sub tuum praesidium.Redacziun: Giusep G. Decurtins

Atun - tar Antonio Vivaldi, Joseph Haydn e Giuseppe Verdi.Atun - la stagiun da las colurs, da la racolta, dal far ventschidas e betg il davos era la stagiun che vala sco simbol da la fin da la vita; quest temp ha adina puspè inspirà cumponists da metter el en musica.La classica porta trais atuns mess en musica dad Antonio Vivaldi (L'autunno ord: Le quattro stagioni da 1725), Joseph Haydn (Der Herbst da l'oratori Die Jahreszeiten da 1801) e la musica da ballet da Giuseppe Verdi (Atun da l'opera I Vespri siciliani da 1855).Redacziun: Giusep G. Decurtins

La quarta part maina nus a Paris tar ils dus giuvens Saint-Saens e Bizet.Paris 1835: Camille Saint-Saens, in uffant tut spezial: cun trais onns sa el leger e scriver, cun 6 cumpona el sia emprima ovra, cun 11 dat el ses emprim concert sco pianist, cun 15 ha el terminà sia emprima sinfonia. Ins discurriva lura d'in «nov Mozart».Paris 1838: Georges Bizet, er el in uffant talentà, ina spezia scheni. Cun 9 onns daventa el scolar da Gounod al conservatori da Paris, cun 17 cumpona el sia emprima sinfonia e quai en mo paucs dis. La primaudiziun ha dentant gì lieu pir 80 onns pli tard a Basel.Redacziun: Giusep G. Decurtins

En la terza part entupain nus dus giuvens Russ: Prokofiew e Glasunow. Anno 1882: In giuven student da 17 onns fa surstar il public pupragnà da Son Petersburg. Gist ha si'emprima sinfonia gì primaudiziun mundiala. In success cumplain. «El na sa sviluppescha betg da di a di, mabain dad ura ad ura», ha ses magister Rimski-Korsakow ditg ina giada.Anno 1911: Sergej Prokofiew: Cun 20 onns ha el cumponì ses emprim concert da clavazin ed orchester. Era el, sco Glasunow, scolar da Rimski-Korsakow. Pianist e cumponist da renum mundial. Nus tadlain quest concert da clavazin en D-Dur, op. 10.Redacziun: Giusep G. Decurtins