La classica

Oz cun musica che stgauda cor ed olma. Vairs hits da la musica classica furman il cuntegn da questa Classica per la fin da matg. Nus udin ovras detg popularas ch'ins taidla adina puspè gugent. Questa quarta part porta cumposiziuns da Mikhail Ivanovich Glinka, Piotr Ilitsch Tschikowsky, Antonin Dvorak, Franz von Suppè, Wolfgang Amadeus Mozart, Georges Bizet, Frédéric Chopin, Felix Mendelssohn-Bartholdy e dals dus Talians: Giacomo Puccini e Pietro Mascagni.

Redacziun: Giusep G. Decurtins

La Classica puspè ina giada cun musica sacrala.  I deva duas modas da metter las sis parts da l'ordinarium missae (Kyrie, Gloria, Credo, Sanctus, Benedictus, Agnus Dei) en musica: ina curta e simpla per dumengias ordinarias, numnada Missa brevis e lura ina lunga, festiva per las festas ecclesiasticas, la Missa solemnis. Per l'archuvestg da Salzburg ha Mozart scrit 16 messas. Ina che datescha dals 1776 è speziala: la Missa longa in C, KV 262. Cun 824 tacts è ella tranter brevis e solemnis; ina messa festiva cun soli, chor, orchester grond ed orgla. Sper questa Missa longa porta La Classica Sonatas da baselgia da Mozart e chants sacrals da Franz Schubert (Psalm 23, Salve Regina).

La classica senta la primavaira. Musica plain vita, frestg-fidela; quai è il cuntegn da questa Classica per mez-matg. Nus udin cumposiziuns dals trais da Vienna: Wolfgang Amadeus Mozart, Ludwig van Beethoven e Franz Schmidt, lura dals dus Tudestgs: Christoph Willibald Gluck e Carl Maria von Weber. L'Italia è represchentada cun: Gioacchino Antonio Rossini e Ruggiero Leoncavallo e la Frantscha tras Charles Gounod.

redacziun: Giusep G. Decurtins

La classica cun musica che dechanta il bel paese. L'Italia stat en il center da questa Classica. L'Italia sco terra cun sias citads e sias bellas plazzas. Nus udin musica che dechanta il bel paese, cumposiziuns dad Antonio Salieri (La fiera di Venezia), Pjotr Ilitsch Tschaikowsky (Capriccipo italian), Ottorino Respighi (La fontana di Trevi) e Felix Mendelssohn-Bartholdy (ord: Symphonie Nr. 4 «Italienische»: 1. Allegro vivace e 4. Saltarello Presto). E garnida vegn questa musica sinfonica cun chanzuns «alla napolitana» da Francesco Paolo Tosti (Sogno, Non t'amo più, La Serenata e Mattinata).

Oz cun musica da: Haydn, Smetana, Verdi e Mozart ed auters. La classica porta puspè ina giada hits da la musica classica, ovras popularas – era sch'ellas èn in zichel isadas – ovras che stgaudan cor ed olma. Questa terza part porta cumposiziuns da: Joseph Haydn, Eduardo di Capua, Carl Maria von Weber, Ruggiero Leoncavallo, Bedrich Smetana, Giuseppe Verdi, Sergej Rachmaninow e Wolfgang Amadeus Mozart.

La classica questa giada cun musica da trais gronds ed impurtants cumponists. Wolfgang Amadeus Mozart (1756-1791): Dad el il Marsch Nr. 1 en D-Dur e da la Sinfonia Nr. 48 en D-Dur l'uvertura, l'andante grazioso (ord: Ascanio in Alba) ed il finale.

Franz Schubert (1797-1828): Dad el dat Gidon Kremer duas ovras per violina solo ed orchester cumponidas 1816/17 per ses frar Ferdinand Schubert: Polonaise B-Dur e Konzertstück D-Dur.

Robert Schumann (1810-1856): Dad el interpretescha l'Orchester da la Tonhalle Turitg la Sinfonia Nr. 1 en B-Dur, op. 38 dals 1841 (Frühlingssymphonie).

redacziun: Giusep G. Decurtins

Franz Anton Hoffmeister (1754-1812) e Franz Krommer (1759-1831) eran da lur temp dus cumponists fitg renconuschids e populars. Els han lavurà a Vienna e quai dal temp da Mozart, Beethoven e Schubert.

Hoffmeister, cumponist e surtut editur da musicalias, era in bun ami da Mozart. Hoffmeister ha scrit 9 operas, 70 sinfonias, 42 quartets, serenadas e concerts. Dad el udin nus l'uvertura «Der Königssohn aus Ithaka» e la sinfonia en C-dur.

Franz Krommer ha survì a divers aristocrats ed il davos a l'imperatur Franz I. Krommer ha scrit da quai da 300 cumposiziuns, 9 sinfonias, 10 concerts, 80 quartets e musica sacrala. Dad el dudin nus dus moviments dal concert per duas clarinettas ed orchester, Es-Dur, op. 35.

redacziun: Giusep G. Decurtins

Donizetti – il maister dal belcanto è mort ils 8 d'avrigl 1848 a Bergamo.  Ensemen cun Bellini e Rossini furma Donizetti il traifegl dal belcanto, da quest'impurtanta epoca da l'opera taliana che ha gì ses zenit tranter 1820 e 1840. Gaetano Donizetti è naschì ils 29 da november 1797 sper Bergamo e mort là ils 8 d'avrigl 1848 suenter ina greva malsogna da spiert. El ha cumponì tranter auter 70 operas. Per ses 170avel di da la mort porta «La classica» musica da las operas: Gabriella di Versy, L'elisir d'amore, Lucia di Lammermoor, La Favorita, Don Pasquale ed Anna Bolena ed in da ses bels chants sacrals, in Ave Maria.

La classica cun musica da Rimski-Korsakow, Vivaldi e Bach. La classica porta trais ovras differentas da caracter e da derivanza. L'uvertura concertanta «Swetly prasdnik - Las Pascas russas» sa basa sin melodias da la liturgia russ-ortodoxa munidas cun citats biblics. 1887/88 ha Nikolai Rimski-Korsakow scrit quella musica sco omagi a ses dus collegas Mussorgski e Borodin. 200 onns pli vegl è il renumà Gloria in D d'Antonio Vivaldi. 12 parts cuntegna quest'ovra cumponida per 3 vuschs da solo, chor ed orchester. Dal medem temp datescha l'oratori da Pasca da Johann S. Bach. Nus udin l'emprima part, la sinfonia.

La Classica dechanta per ina segunda giada la stagiun dal prosperar, chatschar e flurir. Nus udin: da Joseph Haydn (1732-1809) «Der Frühling» ord: Die Jahreszeiten, lura da Felix Mendelssohn-Bartholdy (1809-1847) l'emprim moviment da sia 4. sinfonia (Die Italienische), dal classicher da la chanzun d'art, Franz Schubert (1797-1828) «Im Frühling» chantà dad Anne Sofie von Otter e «Frühlingssehnsucht» interpretà da Wolfgang Holzmair e per finir da Frédéric Chopin (1810-1849) il valser «Les Sylphides» en in'orchestraziun da Roy Douglas.