La classica

Oz na pudess ins betg imaginar co che la musica classica fiss sa sviluppada senza Johann Sebastian Bach (1685-1750). Blers cumponists han studegià minuziusamain sia moda da cumponer. Tut auter era quai anc da sias uras. Lura era el in lavurer-musicist sco quai ch'i deva anc numerus auters. Cunzunt vers la fin da sia vita è el s'engaschà per las proximas generaziuns da cumponists e musicists. El ha gì passa 40 scolars e n'ha betg be mussà a quels sia moda da cumponer, mabain er da sunar.

Ina da quellas ovras che sa drizza a ses discipels è «Das Wohltemperierte Klavier». Igl è ina rimnada da mintgamai 24 preludis e fugas en tuttas tonalitads, pia da C-dur, fin a h-moll. Sin il frontispizi da quella rimnada aveva Bach er remartgà «Zum Nutzen und Gebrauch der Lehrbegierigen Musicalischen Jugend».

Sper intgins schatgs ord «Das Wohltemperierte Klavier» udis vus en La Classica er l'entira suita per violoncello solo (BWV 1007), l'emprim moviment dal «Brandenburgisches Konzert Nr. 2» (BWV 1047) e la toccata e fuga en d-moll (BWV 564).

Questa Classica porta dus schatgs da Felix Mendelssohn Bartholdy (1809-1847). Per l'ina l'uvertura «Sommernachtstraum» e per l'autra sia sinfonia taliana, nr. 4 en A-dur. Ses collega-cumponist Schumann aveva ina giada caracterisà il cumponist da la romantica sco «il Mozart dal 19avel tschientaner». Creschì si è Mendelssohn Bartholdy en ina famiglia da banchiers. El è naschì a Hamburg e suenter stà da chasa a Leipzig. Là ha el tranter auter manà il Gewandhausorchester.

Si'emprima ovra da scheni ha il cumponist da la romantica cumponì cun 17 onns. I sa tracta dad ina uvertura tar la cumedia da Shakespeare «A Midsummer Nights Dream». Mendelssohn Bartholdy numna questa cumposiziun «Ein Sommernachtstraum».

Er il segund schatg che Vus udis en La Classica sa basa sin ina tematica extra-musicala. Sia sinfonia taliana – la «Italienische» ha el cumponì suenter in lung viadi en l'Italia – el sa referescha pia a sias impressiuns.

La classica cun ovras che stgaudan adina puspè cor ed olma. En sia seria cun hits da la musica classica porta l'emissiun La classica questa giada cumposiziuns da: Georg Friedrich Händel (ord: Wassermusik: Air e Menuet), Joseph Haydn (Concert da trumbetta), Johann Nepomuk Hummel (Rondo ord: Concert da trumbetta), Ludwig van Beethoven (Romanza per violina), Pjotr Ilitsch Tschaikowsky (Andante cantabile) e Nikolai Rimski-Korssakoff (Andantino ord Scheherazade).

Munida vegn quella musica cun trais chanzuns fidelas ord: Der heitere Mozart.

A Vienna, Paris e cunzunt a Londra n'era nagin auter cumponist uschè dumandà sco el: Joseph Haydn. Ils onns 1790 era la glieud da Londra tut narra dad ir a concert. Haydn è viagià en la citad englaisa per diriger sez sias pli novas ovras. I n'è però betg be restà tar il diriger. Durant ses dus viadis ha el cumponì aposta per il public englais 12 novas sinfonias. Tut en tut ha Haydn cumponì 104 sinfonias. Quellas da Londra èn sias davosas e furman in punct culminant da sia ovra sinfonica ed er da l'epoca da musica classica insumma.

Label Suisse – la gronda sentupada dals musicists svizzers. Era la musica classica fa part dal Festival Lebel Suisse ch'ha lieu dals 14 fin ils 16 da settember 2018 a Lausanne. Il venderdi la saira han l'Orchester da chombra da Basel e la Knabenkantorei Basel concertà là en la Salle Métropole.

Dirigent: Jérémie Rhorer. Sin il program stat la Carmen-Suite Nr. 2 da Georges Bizet ed in omagi a Leonard Bernstein, naschì avant 100 onns. Dad el duas ovras: parts ord West Side Story ed il Chichester Psalms.

Nagin auter cumponist ha influenzà il gener da la chanzun artistica uschè marcantamain sco Franz Schubert. Ina chanzun artistica è in'ovra per clavazin e chant solo. Il text n'ha il cumponist per il solit betg scrit sez ed è d'auta qualitad. Tar Schubert gioga il clavazin er ina pli impurtanta rolla che tar auters cumponists da lezzas uras. El è in partenari egual dal chantadur u la chantadura. Las duas chanzuns artisticas «Erlkönig» e «Gretchen am Spinnrade» mussan quai a moda exemplarica.

Tut en tut ha Schubert cumponì bunamain 600 chanzuns artisticas. Inqualas furman er in ciclus. Quai vul dir ch'il cuntegn d'ina retscha da chanzuns furman in'istorgia. In da quels ciclus è «Die schöne Müllerin» che sa basa sin poesias da Wilhelm Müller.

Antonin Dvorak – il bab da la musica tscheca è naschì avant 177 onns. Ils 8 da settember 1841 – uss avant 177 onns – è naschì in dals gronds da la musica tscheca: Antonin Dvorak. Ensemen cun ses dus collegas Bedrich Smetana e Leos Janacek ha el inizià e furmà la musica naziunala tscheca e manà quella a la perfecziun.

La classica sa regorda oz dal mazler – quai è stà l'emprima professiun da Dvorak – dal mazler ch'è daventà in cumponist da renum mundial.

Redacziun: Giusep G. Decurtins

Antonin Dvorak – il bab da la musica tscheca è naschì avant 177 onns. Ils 8 da settember 1841 – uss avant 177 onns – è naschì in dals gronds da la musica tscheca: Antonin Dvorak. Ensemen cun ses dus collegas Bedrich Smetana e Leos Janacek ha el inizià e furmà la musica naziunala tscheca e manà quella a la perfecziun.

La classica sa regorda oz dal mazler – quai è stà l'emprima professiun da Dvorak – dal mazler ch'è daventà in cumponist da renum mundial.

Redacziun: Giusep G. Decurtins

Il coc da La Classica da quest'emna furma in concert per clavazin ed orchester. Tar in tal concert vegn in solist al clavazin accumpagnà da l'orchester. Nus udin la terza contribuziun dal cumponist russ Sergej Rachmaninov (1873-1943) tar quest gener. Il Concert per clavazin ed orchester nr. 3 datescha dal 1909. A la premiera dal concert a New York è Rachmaninov sesì sez al clavazin – el n'era numnadamain betg be cumponist, mabain er pianist e dirigent. Ses terz concert per clavazin ed orchester ha tendenzas dramaticas. Il caracter da l'ovra sumeglia uschia magari a quel d'ina sinfonia.

Questa gronda ovra vegn enramada da cumposiziuns dal cumponist tudestg Johannes Brahms (1833-1897): A l'entschatta in valzer per clavazin solo, che prepara las ureglias sin il grond concert per clavazin ed orchester. La fin da l'emissiun furman intgins schatgs dals sauts ungarais da Brahms.

Redacziun: Yvonne Simmen

Trais da la Germania: Carl Maria von Weber, Ludwig van Beethoven e Max Bruch. En sia seria cun hits porta La classica questa giada ovras da trais cumponists da derivanza germana: Carl Maria von Weber (Der Freischütz, uvertura), Ludwig van Beethoven (Chorfantasie), Max Bruch (Concert per violina ed orchester 2. moviment), Carl Maria von Weber (Concertino per clarinetta ed orchester) e Ludwig van Beethoven (Piano Sonate Nr. 8 «Pathétique» 3. moviment).

Redacziun: Giusep G. Decurtins