La classica

Musica da paraulas u la paraula en musica – quai il tema da la classica.  En las pli diversas furmas cumpositoricas chatt'ins la paraula: ina giada sco opera u gieu-musical, lura la paraula en furma da cantata, da ballet, fantasia u sco poem musical. La classica porta tals exempels. Uschia La Cenerentola (Tschenderletga) – uvertura (Gioacchino Rossini), Dornröschen (Rosaspina) – valse (Piotr I. Tschaikowsky), Hänsel und Gretel (Gionin e Grettina) – preludi (Engelbert Humperdinck), Sheherazade – 3. moviment (Nikolai Rimsky-Korsakoff), Till Eulenspiegel (Richard Strauss) e Die Zauberflöte (Wolfgang A. Mozart).

En il center da quella Classica stat la vusch da bariton, pia la vusch virila amez – pli bassa che quella da tenor, ma pli auta che quella da bass. Sin Vus spetga in viadi musical da rollas per bariton. Quest viadi cumenza tar ovras da Mozart (Don Giovanni, Le Nozze di Figaro). Ord vista istorica èn Mozart e ses contemporans a la fin dal 18avel tschientaner stads quels ch'han savì co trair a niz las vuschs virilas amez. Da lura dateschan las emprimas rollas per baritons.

En quest'emissiun pudais vus er tadlar ovras ord las plimas dals cumponists talians Gioachino Rossini (Figaro, Guillaume Tell), Gaetano Donizetti (Don Pasquale) u Giuseppe Verdi (Macbeth). Plinavant in schatg dal collega tudestg Richard Wagner (Tanhäuser) sco er la gronda aria d'entrada dal torero ord l'opera Carmen da Georges Bizet.

Carnaval en la musica classica. «La Classica» cun musica per il temp da barlot. Ella fa tschaiver e cun ella visitain nus ils carnavals da Paris, Roma, Venezia e Vienna. E nus giudain er anc il carnaval spagnol ed il carnaval russ. Musica da Johann Strauss, bab e figl, da Cesare Ciardi, Daniel Popper e da Carl Michael Ziehrer porta la Classica – tut cumposiziuns cun il pled «carnaval» en il titel.

Tranter ils onns 1782 e 1784 ha Wolfgang Amadeus Mozart (1756-1791) cumponì dudesch concerts per clavazin ed orchester. En ina brev a ses bab Leopold ha Wolfgang Amadeus descrit tals concerts sco ovras che na sajan betg grevas, ma er betg levas. «Die Konzerte sind eben das Mittelding zwischen zu schwer und zu leicht, sind sehr brillant, angenehm in die Ohren, natürlich ohne in das Leere zu fallen; hie und da können auch Kenner allein Satisfaktion erhalten, doch so, daß die Nichtkenner damit zufrieden sein müssen, ohne zu wissen warum.»

(Vienna, ils 28 da december 1782)

La finamira da Mozart è stada quella da cumponer concerts per clavazin ed orchester che plaschan a tuts – tant a laics sco er ad experts. Talas ovras ha el cumponì, cura ch'el è arrivà a Vienna. Lura n'era Mozart anc betg s'etablì en la scena e n'aveva nagina plazza fixa. Ses paun da mintgadi gudagnava el cun dar uras da clavazin e cun organisar concerts. Tar quellas uschenumnadas academias era Mozart il cumponist, pianist e manager – tut en ina persuna.

Cun il temp gudagnava il cumponist oriund da Salzburg adina in pli grond renum, perquai che ses famus concerts per clavazin ed orchester pudeva il public sulettamain tadlar a chaschun da talas academias. Cun cumponer ovras che plaschan a laics ed ad experts e cun preschentar sez quellas ovras ad in public, è Mozart s'etablì en la scena. Il pli tard l'onn 1786 è quai gartegià ad el. Da lura datescha l'ultim grond concert per clavazin ed orchester nr. 25 en C-Dur (KV 503). L'entir concert udis Vus en questa Classica.

Ils numers 26 e 27 na pon ins betg pli cumparegliar cun ils concerts precedents. Per l'ina ha Mozart cumponì quels cun autras intenziuns e per l'autra manca en quels il tun brigliant ch'è caracteristic per tut las autras ovras da quest gener.

Jan Ladislav Dussek e Leopold Kozelu – dus emblidads!  Betg be Mozart, Schubert e Beethoven han marcà la musica da la fin dal 18avel entschatta 19avel secul, mabain era cumponists da la Boemia. Ils fratellis Benda e Vranicky, il «divino boemo» Myslivecek ni Dussek e Kozeluh. Dals 1750-1850 han els influenzà la vita musicala en l'Europa. Uss èn quels ton sco emblidads!

En La Classica dad oz stattan dus dad els en il center: Jan Ladislav Dussek (1760-1812) e Leopold Kozeluk (1747-1818). Il Pargue Piano Duo (Martin e Zdenka Hrsel) suna ensemen cun il Czech Chamber Philharmonic Pardubice (dir. Leos Svarosky). Da Dussek udin nus il Concert en B-Dur per dus clavazins ed orchester; da Kozeluh in Allegro da ses Concert per clavazin à quatter mauns ed orchester.

Richard Strauss (1864-1949) ha scrit ina cumposiziun musicala per grond orchester. El sa basa a moda libra sin il cudesch filosofic da Friedrich Nietzsche (1844-1900) «Also sprach Zarathustra». Quest cudesch tracta la relaziun dad in individi cun il mund, la relaziun tranter carstgaun e natira. Il profet Zarathustra vegn cun la levada dal sulegl giu dal cuolm e raquinta als carstgauns che vivan ina vita terrestra, ch'i dettia er ina forza superiura. Tenor il profet valia la paina da sa stentar a quella forza superiura – in surcarstgaun.

Ord vista musicala èn las tonalitads C-dur sco er h-moll da gronda impurtanza per «Also sprach Zarathustra» da Strauss. Uschia è l'introducziun ina gronda cadenza che finescha en C-dur. Suenter l'emprima cesura mida la tonalitad abrupt en h-moll. La cumposiziun finescha era cun vi e nà d'accords da talas tonalitads.

Uschia pudess ins concluder che Strauss interpretescha cun la dispita da quellas duas tonalitads, che na pudessan betg esser pli differentas e lunsch davent ina da l'autra, il cumbat dad in carstgaun per daventar in surcarstgaun.

Il saut sco furma cumpositorica tar ils maisters da la classica. Furlan, gavotta, chaconne, czardas, polonaise, polca e valzer – furmas da saut chatt'ins dapertut en la musica, era en la classica. Questa furma cumpositorica datti en mintga epoca da la musica e bunamain tar mintga cumponist. Musica e saut – ina vaira simbiosa. La Classica porta sauts da: Piotr Iljitsch Tschaikowsky (1840-1893), Johannes Brahms (1833-1897), Jacques Offenbach (1819-1880), Léo Delibes (1836-1891) e Frédéric Chopin (1810-1849).

Il cumponist tudestg Johannes Brahms na pudeva sez betg sunar la violina. Tuttina ha el cumponì in tal concert, la finala er sin giavisch da ses bun ami Joseph Joachim. Las parts principalas dal Concert per violina en D-dur ha Brahms cumponì l'onn 1877. Ses ami e renumà violinist da lezzas uras, Joseph Joachim ha cusseglià Brahms durant cumponer quest concert per violina solo ed orchester. En quest gener po il solist savens mussar quant diligent ch'el è.

Ma da cumponer in ovra per artists virtuos n'è mai stà la finamira da Brahms. En quest concert, ses opus 77, dattan plitost ils elements sinfonics en egl. Il concert è in resultat da lavur creativa da dus buns amis: Il cumponist e sinfonicher Johannes Brahms ed il violinist virtuos Joseph Joachim.

La Classica cun musica che dat curaschi dad ir viaden en il 2019. L'emprima Classica dal 2019 porta musica che stgauda cor ed olma e fa gust da tadlar RTR. Musica dals Franzos Charles Gounod (1818-1893 Paris/Saint-Cloud) e Georges Bizet (1838-1875 Paris), dals Tudestgs Ludwig van Beethoven (1770-1827 Bonn/Wien), Johannes Brahms (1833-1897 Hamburg/Wien) e Carl Maria von Weber (1786-1826 Eutin/London) e da l'Austriac Wolfgang Amadeus Mozart (1756-1791 Salzburg/Wien). Munida vegn quella musica cun chanzuns dal Talian Giovanni Paisiello (1740-1818 Taranto/Napoli) interpretadas da Cecilia Bartoli.

redacziun: Giusep G. Decurtins

Questa Classica porta in potpurri da melodias dals Strauss da Vienna. Cunzunt las salas da concert a Vienna fan da Son Silvester e da Bumaun mintgamai in program spezial. A Vienna èn tals concerts il pli savens deditgads a la dinastia da cumponists cun la schlattaina Strauss. En questa Classica pudais Vus tadlar in program sumegliant a tals concerts. Vus spetga in potpurri ilaric per la midada da l'onn.

Il pli grond success ha Johann Strauss (il fegl, 1825-1899) gì. El ha cumponì 17 operettas ed aveva er ses agen orchester per il qual el ha cumponì enturn 170 valzers. Perquai ha el er survegnì il surnum «Walzerkönig». Er ses bab Johann Strauss (il bab, 1804-1850) e ses frars Josef Strauss (1827-1870) ed Eduard Strauss (1835-1916) han cumponì ovras ch'ils Wiener Philharmonikers sunan savens e gugent per lur concerts enturn la midada da l'onn.