La classica

Ludwig van Beethoven (1770-1827) ha cumponì nov sinfonias e tuttas èn singularas, nagina sumeglia l'autra. Ordvart enconuschentas èn la terza, la tschintgavla u la novavla. Pli pauca attenziun retschaiva la quarta sinfonia. Auter è quai en quest'emissiun. Cunzunt tranter la terza sinfonia da Beethoven, la Eroica e la tschintgavla l'uschenumnada «Schicksalssymphonie», resta la quarta sinfonia da Beethoven magari en l'umbriva. Robert Schuman ha descrit la quarta sinfonia suandantamain: «Eine griechisch schlanke Maid zwischen zwei Nordlandriesen».

Il maletg d'ina fina matta tranter dus gigants circumscriva la moda co la quarta sa differenziescha da las sinfonias vischinas. Quai sa mussa per exempel er en la dimensiun da l'orchester. En nagin'autra sinfonia dovra Beethoven in orchester uschè pitschen.

En quest'emissiun vegn la sinfonia nr. 4 da Beethoven enramada da duas uverturas: «Die Geschöpfe des Prometheus» e «Leonoren-Ouvertüre Nr. 3».

La classica cun musica che dechanta il bel paese. L'Italia stat en il center da questa classica. L'Italia sco terra cun sias citads e sias bellas piazzas. Nus udin musica che dechanta il bel paese, cumposiziuns dad Antonio Salieri (La fiera di Venezia), Pjotr Ilitsch Tschaikowsky (Capriccio italian), Ottorino Respighi (La fontana di Trevi) e da Felix Mendelssohn-Bartholdy (ord: sinfonia nr. 4 «italienische» 1. part: Allegro vivace e 4. part: Saltarello presto).

E garnida vegn questa musica sinfonica cun chanzuns a la napolitana da Francesco Paolo Tosti (Sogno, Non t'amo più, La Serenata e Mattinata).

Armin Caduff che viva a Danis en Surselva, festivescha ils 8 da fanadur 2019 ses 70avel natalizi. Per quest'occasiun festivescha La Classica el ch'ha deditgà sia vita a la musica. Il bassist Armin Caduff n'è betg mo chantadur. El arranscha e transcriva ovras, scolescha vuschs ed el chanta sa chapescha er sez – saja quai sco solist u en in ensemble. Enconuschent è el cunzunt sco chau da La Compagnia Rossini, in ensemble solistic.

Per quest'emissiun hai RTR elegì schatgs musicals cun il solist Armin Caduff, da «sia» Compagnia Rossini sco er ovras ch'el ha arranschà u transcrit.

Stad – la stagiun dal sulegl, dal bel chaud – quest temp ha adina puspè inspirà cumponists da metter el en musica. La stad tar Joseph Haydn, Giuseppe Verdi, Alexander Glasunow e Pjotr I. Tschaikowsky.  La classica porta quatter stads messas en musica da Joseph Haydn - Der Sommer (ord l'oratori Die Jahreszeiten, 1801), da Giuseppe Verdi - L'estate (ord: l'opera I Vespri siciliani, musica da ballet «Le quattro stagioni», 1855), d' Alexander Glasunow - Sommer (ord: Die Jahreszeiten, 1898/99) e da Pjotr Illjitsch Tschaikowsky - avust (ord: Die Jahreszeiten - 12 Charakterstücke, versiun orchestrala d'Alexander Gauck).

Edita Gruberova è ina da las grondas sopranistas da noss temp. Durant passa 50 onns ha ella intgantà cun sia vusch l'auditori d'operas. Ils 27 da mars 2019 ha ella dà sia derniera. Per la davosa giada ha la maestra dal belcanto, la primadonna assoluta – uschia vegn ella bain savens numnada – chantà sin ina tribuna d'opera. La sopranista da 72 onns na veglia però betg chalar dal tuttafatg da chantar. Ella veglia vinavant dar concerts ed accumpagnar chantaduras e chantadurs giuvens sco mentura.

En questa Classica udis vus differentas interpretaziuns dad Edita Gruberova. Uschia per exempel, co ch'ella interpretescha la rolla da la regina Elisabetta en «Roberto Devereux» (Gaetano Donizetti), co ch'ella dat dumogn a las coloraturas en la gronda aria da la regina da la notg en «Die Zauberflöte» (Mozart) u er co ch'ella chanta la famusa aria en deliri da la Lucia en «Lucia di Lammermoor» (Gaetano Donizetti).

Il coc da La Classica da quest'emna furma in concert per clavazin ed orchester. Tar in tal concert vegn in solist al clavazin accumpagnà da l'orchester. Nus udin la terza contribuziun dal cumponist russ Sergej Rachmaninov (1873-1943) tar quest gener. Il «Concert per clavazin ed orchester nr. 3» datescha dal 1909. A la premiera dal concert a New York è Rachmaninov sesì sez al clavazin – el n'era numnadamain betg be cumponist, mabain er pianist e dirigent. Ses terz concert per clavazin ed orchester ha tendenzas dramaticas. Il caracter da l'ovra sumeglia uschia magari a quel d'ina sinfonia.

Questa gronda ovra vegn enramada da cumposiziuns dal cumponist tudestg Johannes Brahms (1833-1897): A l'entschatta in valzer per clavazin solo che prepara las ureglias sin il grond concert per clavazin ed orchester. La fin da l'emissiun furman intgins schatgs dals sauts ungarais da Brahms.

Durant l'entir process da cumposiziun da ses op. 11 n'era Johannes Brahms (1833-1897) betg segir dal gener. Era el gia pront per ina elavurada sinfonia? Sco i para betg. Durant cumponer quest'ovra è Brahms bunamain sa desperà:

«Ich sehe es ein, dass das Werk so eine Zwittergestalt, nichts Rechtes ist. Ich hatte so schöne, so grosse Idee [sic!] von meiner ersten Sinfonie, und nun!» (Johannes Brahms)

La finala hai dà ina maschaida tranter serenada e sinfonia. Tar ils tratgs d'ina serenada tutga bain caracter divertent e simpel, cunzunt dals moviments quatter, tschintg e sis. Ils emprims trais moviments èn però pli lungs e cunzunt pli elavurads sco tals d'ina sinfonia.

Vitiers vegn che Brahms ha cumponì ina serenada per orchester grond cun mintgamai duas flautas, oboas, clarinettas, fagots, schizunt quatter corns, duas trumbettas, paucas e natiralmain instruments d'artg. Uschia fiss il titel «Sinfonie-Serenade» che Brahms ha nudà en sias skizzas forsa adattà.

La finala ha el tuttina puspè stritgà la part da sinfonia. Il giuven da 26 onns n'era anc betg pront per si'emprima sinfonia e na leva anc betg sa metter en retscha cun il grond bab da la sinfonia Beethoven. L'emprima sinfonia ha Brahms pir scrit cura ch'el aveva 43.

Avant la serenada nr. 1 da Brahms pudais vus udir en questa Classica l'uvertura «Genoveva» da Robert Schumann (1810-1856). «Genoveva» (1847/48) è la suletta opera che Schumann ha cumponì. Fin oz n'ha l'opera sez betg propi gì success, tut auter l'uvertura. Sper l'uvertura «Manfred» op. 15 tutga l'uvertura «Genoveva» tar las pli renumadas uverturas da Schumann – ovras che tutgan tar il repertori classic.

Ils 4 da mars 1678 è naschì a Venezia quel che ha survegnì pli tard il surnum «il prete rosso». Ses chavels eran cotschens e prer/spiritual è el era daventà, silmain per curt temp: Antonio Lucio Vivaldi. A Venezia ha Vivaldi surtut instruì musica al conservatori/internat da mattaschas Ospedale della Pietà. El sez era in virtuos a la violina ed ha cumponì 400 concerts, operas, oratoris, sonatas e trios per instruments a corda. Il 1740 va Vivaldi a Vienna e là mora el en tutta paupradad ils 28 da fanadur 1741. Antonio Vivaldi ha influenzà in'entira generaziun da cumponists, uschè era Johann Sebastian Bach.

Il gener dal divertimento è in gener simpel. Sco ch'il pled «divertimento» implitgescha gia, èn divertimentos scrits per divertir. Uschia sa cumpona in divertimento da plirs simpels moviments. Il divertimento en Es-Dur (KV 563) da Mozart è però in'excepziun. Mozart n'ha mai vulì differenziar tranter musica d'art e musica da divertiment. Uschia ha el er giugà en ses sulet divertimento per violina, viola e violoncello cun la convenziun ed ha cumponì in divertimento zunt elavurà, per uschè da dir serius. El ballantscha tranter il stil galant ed il stil doct, vul dir tranter in stil pli melodius e divertent ed in pli academic.

George Gershwin – dal fabricant da hits al cumponist renconuschì. Avant 95 onns – il favrer 1924 – ha el fatg stremblir il tempel static da la musica sinfonica. La primaudiziun da la Rhapsody in Blue a New York en l'Aeolin Hall è stada in success epocal. Per l'emprima giada sinfonica e jazz en simbiosa – in mument istoric! In «scriva-schlaghers», in «fabricant da hits al Brodway» è sa midà en in cumponist sever, renconuschì. In cas unic en questa branscha! Oz marcan surtut quatter opus l'ovra cumpositorica da George Gershwin (1898-1937): Rhapsody in Blue (1924), Concerto in F (1925), An American in Paris (1928) e l'opera Porgy and Bess (1935).