La classica

Il di da la mamma è La classica deditgada a tut las mammas e tattas, a quellas dunnas ch'han schenghegià a nus tuts il pli grond regal insumma: la vita. Il di da la mamma pudais Vus giudair musica classica che tracta il ferm liom tranter mammas e lur uffant, ovras che cumponists han deditgà a lur mammas ed er inqual perla musicala che stat en connex cun fluras.

Bels muments musicals per l'entschatta dal mais da matg. En sia seria cun hits porta La classica questa giada cumposiziuns da Mikhail Glinka, Pjotr I. Tschaikowsky, Antonin Dvorak, Bedrich Smetana, Wolfgang Amadeus Mozart, Felix Mendelssohn-Bartholdy Ruggiero Leoncavallo e dal nunenconuschent Eduardo di Capula l'enconuschenta e charezzada chanzun «O sole mio».

Èsi pussibel da condensar in'entira opera en in'ura? Questa Classica fa l'experiment. L'opera Carmen tracta dal destin da Carmen – ina zagrendra – e Don José – in schuldà. Carmen è ina dunna ferma e cunzunt ina dunna libra, e Don José in um conscienzius, ma er in um che vul prender en possess ina dunna. La finala vegn Carmen da surmanar Don José cun sias furbarias. Per ella banduna Don José er sia Michaela, si'amur da giuventetgna ed el fugia er da sias obligaziuns en il militar.

Carmen sa decida lura tuttina per in auter um, numnadamain per Escamillo, in torero. Gliez na tegna Don José natiralmain betg ora. Cun ferma persvasiun di Carmen a la fin: «Libra sun jau naschida e libra vegn jau a murir». Uschè scuidus sco quai che Don José è, mazza el sinaquai sia Carmen.

Johann Sebastian Bach: Ostern-Oratoriun BWV 249 L'oratori da Pasca da Johann S. Bach è per propi ina cumposiziun da parodia. La cumposiziun originala aveva in auter text ed era patratgada per in'autra occasiun. En quest cas sa tracti d'ina ovra scritta sco cantata da gratulaziun per il 43avel anniversari dal cont Christian von Sachsen-Weissenfels. Quai è stà ils 23 da favrer 1725. Gist suenter ha Bach integrà questa cantata profana en in'ovra liturgica per Pasca 1725. L'oratori ha 11 numers. Nus udin il Collegium Vocale cun Philippe Herreweghe e 4 solists vocals: B. Schlick, K. Wessel, J. Taylor e P. Kooy.

redacziun: Giusep G. Decurtins

Jean Sibelius (1865-1957) vala sco il cumponist naziunal da la Finlandia. Tranter auter è el vegnì enconuschent cun ovras sco l'ovra tranter sinfonia e poem sinfonic «Kullervo» op. 7 u il poem sinfonic «Finlandia» op. 26. En la vegliadetgna da 50 onns aveva Sibelius però ina crisa creativa. Il 1914 cura che l'Emprima Guerra mundiala è rutta or ha il cumponist bandunà ses plans vid ina sinfonia ed è plitost sa deditgà ad ovras pli pitschnas.

Suenter ina fasa d'abstinenza e tristezza ha Sibelius puspè chattà la vita la primavaira da l'onn 1915.

«Jau hai vis oz – da diesch avant las dudesch – 16 cigns! In dals pli impressiunants muments da mia vita. Dieus pertgiria – tge bellezza! Ditg èn els sgulads sur mai, fin ch'els èn svanids en la brentina dal sulegl. (...) Mistica natirala e mal il cor. Tema final per la sinfonia nr. 5»

Jean Sibelius, 21 d'avrigl 1915, diari.

La famiglia Bach: musica dal bab e da quatter figls. En l'istorgia da la musica na datti betg in segund tal cas: Johann Sebastian Bach ha gì – da duas lètgs - 20 uffants; 11 figls e 9 figlias. Quatter da quels figls èn daventads cumponists cun ina irradiaziun differenta: Wilhelm Friedemann, Carl Philipp Emanuel, Johann Christoph Friedrich e Johann Christian.

La classica porta musica da l'emprima e segunda generaziun dals Bachs. Ina terza n'hai betg dà. Mo in sulet biadi da Johann Sebastian Bach ha fatg musica. Suenter 100 onns è la dinastia da la famiglia Bach uschia morta ora.

Franz Schubert vala surtut sco il classicher da la chanzun d'art.  Sia musica da chombra, la sinfonica, la sacrala e sia musica per la tribuna stattan en la sumbriva da las 600 chanzuns d'art. E tuttina, era en questas spartas datti vairs juvels. La Classica porta musica sinfonica da Franz Schubert (1797-1828).

En il center stat la sinfonia nr. 3 en D-Dur che Schubert ha cumponì cun 18 onns. Ina musica viv-frestga, plaschaivla tegnida en la tradiziun. E tuttina mussa quella gia la via cumpositorica da Schubert. Ina via che maina ad ina musica da scharnier tranter la classica da Vienna e la romantica.

Nus sajan in pievel dal chant en il collectiv – po esser! Ma era nus avain nossa chanzun d'art solistica. Chantaduras e chantadurs da professiun tschertgan adina puspè chanzuns solisticas, era talas en rumantsch. Il Festival da la chanzun rumantscha ha organisà la dumengia dals 17 da mars ina matinée cun primaudiziuns e chanzuns che vegnan preschentadas darar.

Quai èn chanzuns cumponidas d'Armon Cantieni, Gion Antoni Derungs, Benedetg Dolf e da l'American Warren Thew, in bun ami da nus Rumantschs. La Classica porta quest concert cun ils interperts: Sara-Bigna Janett, Judit Scherrer, Lothar Burtscher – chant e la pianista Alena Sojer.

Questa Classica porta dus schatgs da Felix Mendelssohn Bartholdy (1809-1847). Per l'ina l'uvertura «Sommernachtstraum» e per l'autra sia sinfonia taliana, nr. 4 en A-dur. Ses collega-cumponist Schumann aveva ina giada caracterisà il cumponist da la romantica sco «il Mozart dal 19avel tschientaner». Creschì si è Mendelssohn Bartholdy en ina famiglia da banchiers. El è naschì a Hamburg e suenter stà da chasa a Leipzig. Là ha el tranter auter manà il Gewandhausorchester.

Si'emprima ovra da scheni ha il cumponist da la romantica cumponì cun 17 onns. I sa tracta dad ina uvertura da la cumedia da Shakespeare «A Midsummer Night's Dream». Mendelssohn Bartholdy numna questa cumposiziun «Ein Sommernachtstraum».

Er il segund schatg che Vus udis en La Classica sa basa sin ina tematica extra-musicala. Sia sinfonia taliana – la «Italienische» ha el cumponì suenter in lung viadi en l'Italia – el sa referescha pia a sias impressiuns.

Nagin auter cumponist ha influenzà il gener da la chanzun artistica uschè marcantamain sco Franz Schubert. Ina chanzun artistica è in'ovra per clavazin e chant solo. Il text n'ha il cumponist per il solit betg scrit sez ed è d'auta qualitad. Tar Schubert gioga il clavazin er ina pli impurtanta rolla che tar auters cumponists da lezzas uras. El è in partenari egual dal chantadur u la chantadura. Las duas chanzuns artisticas «Erlkönig» e «Gretchen am Spinnrade» mussan quai a moda exemplarica.

Tut en tut ha Schubert cumponì bunamain 600 chanzuns artisticas. Inqualas furman er in ciclus. Quai vul dir ch'il cuntegn d'ina retscha da chanzuns furman in'istorgia. In da quels ciclus è «Die schöne Müllerin» che sa basa sin poesias da Wilhelm Müller.