La classica

Nadal è era la festa dal chant e da la musica. La classica per la 4. dumengia d'advent porta chant e musica «per la notte di Natale», sco Arcangelo Corelli numna ses Concerto grosso, op. 6 nr. 8. Daspera udin nus anc autra musica dal baroc scritta per Nadal (F. Manfredini, J. S. Bach, G. F. Händel e Joh. Heinrich). Munida vegn questa musica cun chants «sin via vers Betlehem» (Adeste fideles, Transeamus usque Betlehem, Siemi da Nadal, Ave Maria, Da mesanotg fideivlamein e Clara notg da Nadal).

Ludwig van Beethoven (1770-1827) ha cumponì nov sinfonias e tuttas èn singularas, nagina sumeglia l'autra. Ordvart enconuschentas èn la terza, la tschintgavla u la novavla. Pli pauca attenziun retschaiva la quarta sinfonia. Auter è quai en quest'emissiun. Cunzunt tranter la terza sinfonia da Beethoven, la Eroica e la tschintgavla l'uschenumnada «Schicksalssymphonie», resta la quarta sinfonia da Beethoven magari en l'umbriva. Robert Schuman ha descrit la quarta sinfonia suandantamain: «Eine griechisch schlanke Maid zwischen zwei Nordlandriesen».

Il maletg d'ina fina matta tranter dus gigants circumscriva la moda sco la quarta sa differenziescha da las sinfonias vischinas. Quai sa mussa per exempel er en la dimensiun da l'orchester. En nagin'autra sinfonia dovra Beethoven in orchester uschè pitschen.

En quest'emissiun vegn la sinfonia nr. 4 da Beethoven enramada da duas uverturas: «Die Geschöpfe des Prometheus» e «Leonoren-Ouvertüre Nr. 3».

L'impressiunissem è in stil da la pictura, però datti er en la musica quest stil. Il cumponist franzos Claude Debussy è quasi il sulet ch'ha cumponì tala musica. El ha empruvà da tschiffar in'impressiun dad in mument en musica. Cun pleds simpels pon ins dir ch'el ha creà in maletg cun tuns enstagl da cun colurs. En quest impressiunissem musical fluescha il ritmus senza cesuras cleras e las armonias na suondan a naginas reglas. Ultra da quai è la colur, la maschaida da tuns pli impurtanta che las reglas dad armonia e furmas cleras, che valevan anc en la romantica ni en la classica. Era cun ils titels fa Debussy savens allusiuns a la pictura. Uschia portan dus carnets da musica dad el il titel «Images per pianoforte», per rumantsch «Maletgs per clavazin».

Felix Mendelssohn e ses oratori dal profet Elias che vul manar enavos tar Dieu ses pievel ch'aveva pers la cardientscha.  Duas parts, in'uvertura e 42 numers – quai la structura da quest oratori cumponì da Felix Mendelssohn-Bartholdy 1837/46. El tracta la figura dal profet Elias (Vegl Testament) ed è scrit per solists vocals, chor ed orchester.

Tema, odi, dubi e confusiun, dentant era speranza e confiert èn ils elemets da quest'ovra. E raquintads vegnan ils suandants purtrets: carstgauns fomentads senza speranza, la forza da l'uraziun e las miraclas d'Elias, ses cumbat cunter ils sacerdots da Baal, sia fugia e l'ascensiun vers tschiel.

RTR ha registrà il concert dals 29 da december 2017 a Trun en la baselgia da s. Martin. Ils interprets: Letizia Scherrer (sopran), Ivonne Fuchs (alt), Martin Mairinger (tenor), Markus Volpert (bass), cantus firmus surselva e l'orchester Le Phénix. Dirigent: Clau Scherrer. La Classica porta la segunda part da quest oratori.

Felix Mendelssohn e ses oratori dal profet Elias che vul manar enavos tar Dieu ses pievel ch'aveva pers la cardientscha. Duas parts, in'uvertura e 42 numers – quai la structura da quest oratori cumponì da Felix Mendelssohn-Bartholdy 1837/46. El tracta la figura dal profet Elias (Vegl Testament) ed è scrit per solists vocals, chor ed orchester.

Tema, odi, dubi e confusiun, dentant era speranza e confiert èn ils elements da quest'ovra. E raquintads vegnan ils suandants purtrets: carstgauns fomentads senza speranza, la forza da l'uraziun e las miraclas d'Elias, ses cumbat cunter ils sacerdots da Baal, sia fugia e l'ascensiun vers tschiel.

RTR ha registrà il concert dals 29-12-2017 a Trun en la baselgia da s. Martin. Ils interprets: Letizia Scherrer (sopran), Ivonne Fuchs (alt), Martin Mairinger (tenor), Markus Volpert (bass), Cantus firmus surselva e l'orchester Le Phénix. Dirigent: Clau Scherrer. La classica porta l'emprima part (2. part: dumengia: 02-12-2018 19:00).

Franz Schubert vala surtut sco il classicher da la chanzun d'art. Sia musica da chombra, la sinfonica, la sacrala e sia musica per la tribuna stattan en la sumbriva da las 600 chanzuns d'art. E tuttina era en questas spartas datti vairs juvels. La Classica porta musica sinfonica da Franz Schubert (1797-1828). En il center stat la sinfonia nr. 3 en D-Dur che Schubert ha cumponì cun 18 onns. Ina musica viv-frestga, plaschaivla tegnida en la tradiziun. E tuttina mussa quella gia la via cumpositorica da Schubert. In via che maina ad ina musica da scharnier da la classica da Vienna a la romantica.

Gioachino Rossini è naschì ils 29 da favrer 1792 e mort ils 13 da november 1868 – pia precis avant 150 onns. Quai è raschun avunda che La Classica sa dedichescha ad ovras ord la plema dal talian Rossini. Gioachino Antonio Rossini è in cumponist talian è vala sco il retg da l'opera taliana. Cunzunt sin il champ dal belcanto ha Rossini cumponì ovras da grond'impurtanza. En stgars dus decennis ha el cumponì 39 operas. Da lezzas uras han ins sentì en l'entira Europa la fevra da Rossini. En quella Classica pudais vus gudair intgins schatgs: Tranter auter l'uvertura da Guillaume Tell cun il marsch famus. Schatgs ord las operas «Il barbiere di Siviglia» ed ord «Cenerentola».

La Classica cun musica da trais Mozarts: Leopold, Wolfgang Amadeus e Franz Xaver. Tat Leopold (1719-1787), bab Wolfgang Amadeus (1756-1791) e figl e biadi Franz Xaver (1791-1844) – sper las enconuschentas dinastias da musicists (famiglia Bach, famiglia Strauss) pon ins era vesair ils trais Mozarts sco tala.

La Classica porta musica dal tat, bab e biadi Mozart. Vus udis da Leopold parts da sias sinfonias: Die Bauernhochzeit, Burlesca, Neu Lambacher e Kindersinfonie. Da Wolfgang Amadeus: il Molto Allegro da sia sinfonia Nr. 40 KV 550. Da Franz Xaver ses Concert da clavazin ed orchester Nr. 2. Es-Dur, op. 25.

Gounod è naschì il 1818 e mort il 1893 en la vegliadetgna da 65 onns. Per quest motiv sa deditgescha La classica quest'emna al cumponist franzos da la romantica. A l'entschatta da sia carriera da cumponist ha Gounod cunzunt cumponì operas. Numerusas n'han betg gì success. Pir cun l'opera Faust ha Gounod gì il success decisiv e dapi lura è el er vegnì renconuschì da ses collega cumponists.

Sper intgins schatgs ord quest'opera, preschenta La classica er la «Messe solennelle de Sainte Cecile», ina messa cun in opulent orchester sinfonic.

Pli pauc enconuschent è el per sia musica da chombra: Tar quella tutga er la speziala «Petite Symphonie» che Gounod ha cumponì per flauta ed in octet d'instruments a flad. La finala è er il «Ave Maria», che sa basa sin in preludi da Bach, ord la plima da Gounod.

Franz Lehar è mort ils 24 d'october 1948 a Bad Ischl – uss avant 70 onns.  Die lustige Witwe, Der Graf von Luxemburg, Zigeunerliebe u Das Land des Lächelns – tgi n'enconuscha betg ina da questas operettas?

U ils hits Dein ist mein ganzes Herz, Da geh ich zu Maxim, Meine Lippen, sie küssen so heiss? U la chanzun da la Wolga (Es steht ein Soldat am Wolgastrand) u la chanzun da la Vilja (Es lebt eine Vilja).

Avant 70 onns è il bab spiertal da questa musica mort: Franz Lehar (1870-1948). La Classica sa regorda da quest cumponist ungarais-austriac ch'ha da ses temp gì dapli success ch'ils Strauss da Vienna e che vegneva numnà savens il gigant da la secunda perioda da l'operetta da Vienna.