La classica

La sinfonia nr. 4 da Tschaikowsky (1840-1893) tracta dal destin, da ses destin. Quell'ovra ha el cumponì, cura ch'el era en ina crisa persunala, numnadamain la fin dals onns 1870. L'onn 1877 nè betg stà simpel per il cumponist russ. Sulettamain per mantegnair la parita d'ina vita normala ha el maridà tut anetg quel onn. Uschia na fai betg surstar che quella letg è stada pauc ventiraivla. La suletta via ord quella miseria veseva Tschaikowsky en la mort e la finala ha el er empruvà da sa prender la vita. Dal medem onn datescha er la sinfonia nr. 4.

Che quella ovra tracta da ses destin savain nus oz grazia a sia correspundenza cun sia mecena Nadezhda von Meck. Uschia descriva Tschaikowksy ch'il destin haja la «fatala pussanza» d'evitar ch'ins haja cletg en la vita. La sinfonia nr. 4 tractia da quella pussanza che pendia sco ina spada da Damocles sur il chau. Pir en il quart moviment da quella sinfonia dumogna Tschaikowsky da volver il dies al destin – almain per in mument.

Jakob u Jacques Offenbach – naschì avant 200 onns, ils 20 da zercladur 1819 a Cologna, è stà in cumponist e cellist tudestg-franzos. Jacques Offenbach (1819-1880) vala sco l'inventader da l'operetta moderna, vul dir da quell'operetta ch'è s'emancipada e daventada in gener independent dal teater musical.

I sa tracta d'ovras per la tribuna cun ina presa critica-satirica. Offenbach prenda gugent situaziuns dal mintgadi e persunas da la societad (aristocratica) sin la corna. Sia musica è viv-frestga, da grond schlantsch e d'ina ritmica marcanta. Las melodias van bainspert en l'ureglia. Tgi n'enconuscha betg la Barcarole ord «Les Contes d'Hoffmann» il Can-Can ord «Orpheus in der Unterwelt».

Sper sia musica per la tribuna (102 ovras), ha Offenbach era cumponì per cello e piano solo e concerts per cello ed orchester. Jacques Offenbach è mort ils 5 d'october 1880 sper Paris.

Èsi pussibel da condensar in'entira opera en in'ura? Questa Classica fa l'experiment. L'opera Carmen tracta dal destin da Carmen – ina zagrendra – e Don José – in schuldà. Carmen è ina dunna ferma e cunzunt ina dunna libra, e Don José in um conscienzius, ma er in um che vul prender en possess ina dunna. La finala vegn Carmen da surmanar Don José cun sias furbarias. Per ella banduna Don José er sia Michaela, si'amur da giuventetgna ed el fugia er da sias obligaziuns en il militar.

Carmen sa decida lura tuttina per in auter um, numnadamain per Escamillo, in torero. Gliez na tegna Don José natiralmain betg ora. Cun ferma persvasiun di Carmen a la fin: «Libra sun jau naschida e libra vegn jau a murir». Uschè scuidus sco quai che Don José è, mazza el sinaquai sia Carmen.

Ils 4 da settember avant 7 onns è Gion Antoni Derungs mort. Gion Antoni Derungs – bain il pli grond ed impurtant cumponist indigen, è mort avant 7 onns. La Classica sa regorda dad el cun emetter quatter ovras scrittas dad el tranter il 1988 ed il 2010:

* Suita sursilvana, op. 76 dada dal cantus firmus surselva&orchester da chombra grischun (dir. Clau Scherrer ils 06-09-2015 Teater Cuira),

* Saults grischuns, op. 174 interpretads da la Südwestdeutsche Philharmonie Konstanz (dir. Simon Camartin ils 03-11-2010 baselgia S. Martin Cuira),

* Serenata, op. 179 cun l'orchester da chombra Novosibirsk (dir. Rainer Held ils 05-09-2009 baselgia Glion) ed

* Amur e Dolur op. 180 sunà da Cristina Vital (flauta) & Julia Kreyenbühl (arpa).

Hector Berlioz è mort ils 8 da mars 1869, pia avant 150 onns. A quella chaschun deditgain nus la Classica al pli renumà cumponist franzos da la romantica. Punct central da questa emissiun è l'ovra «Les nuits d'été». I sa tracta da sis chanzuns per chant ed orchester – dal reminent in gener che Hector Berlioz ha quasi fundà. Cumponì quest'ovra ha Berlioz tranter il 1834 e 1840, publitgà lura pir paucs onns pli tard. Il titel «Les nuits d'été» è forsa in zic irritand, pertge tgi che spetga chanzuns ilaricas e plain schlantsch vegn trumpà. I sa tracta d'in lung lamento sur da l'amur – cunzunt sur da las varts tristas.

Sco ch'i vegn ditg, ha Berlioz cumponì quellas chanzuns gist il temp cura che sia lètg cun Harriet Smithson steva sin chommas falombras ed era vi da dar dapart. Cun questas chanzuns duai Berlioz avair sepulì l'amur ch'el aveva ina giada. Sper il cuntegn da las poesias conferma er in ulteriur indizi questa teoria. En la chanzun «Absence» supplitgescha il «jau-liric» instantamain ina marusa da turnar enavos e gist quella chanzun ha Berlioz deditgà a la duna cun la quala el aveva gia ina liaison.

La bella Italia n'è betg mo bella e ritga quai che pertutga cuntrada, natira, cuschina e vin. Ella è era ritga quai che pertutga cultura e musica. En «La classica» da questa giada udin nus ovras dals trais gronds ed impurtants cumponists Rossini, Verdi e Donizetti. Vitiers era musica da dus cumponists betg tant enconuschents: Martucci e Ferlendis. Segund prenums: trais Giuseppes, in Gaetano ed in Gioacchino. 

Redacziun: Giusep G. Decurtins

Jean Sibelius (1865-1957) vala sco il cumponist naziunal da la Finlanda. Tranter auter è el vegnì enconuschent cun ovras sco l'ovra tranter sinfonia e poem sinfonic «Kullervo» op. 7 u il poem sinfonic «Finlandia» op. 26. En la vegliadetgna da 50 onns aveva Sibelius però ina crisa creativa. Il 1914, cura che l'Emprima Guerra mundiala è rutta or, ha il cumponist bandunà ses plans per ina sinfonia ed è plitost sa deditgà ad ovras pli pitschnas.

Suenter ina fasa d'abstinenza e tristezza ha Sibelius puspè chattà la vita la primavaira da l'onn 1915.

«Jau hai vis oz – diesch avant las dudesch – 16 cigns! In dals pli impressiunants muments da mia vita. Dieus pertgiria – tge bellezza! Ditg èn els sgulads sur mai, fin ch'els èn svanids en la brentina dal sulegl. (...) Mistica natirala e mal il cor. Tema final per la sinfonia nr. 5»

Jean Sibelius, 21 d'avrigl 1915, diari.

La classica construescha questa giada sezza ina sinfonia. Tschintg moviments ha questa sinfonia construida ord parts da diversas sinfonias dals trais classichers da Vienna: Joseph Haydn (Sinfonia nr. 48 - 1. Allegro), Ludwig van Beethoven (Sinfonia nr. 2 - 2. Larghetto), Wolfgang Amadé Mozart (Sinfonia nr. 39 - 3. Menuetto +Trio) e dals successurs Franz Schubert (Sinfonia nr. 6 - 3. Scherzo) e Felix Mendelssohn-Bartholdy (Sinfonia nr. 4 - 4. Saltarello-Presto). Las punts da moviment tar moviment fan chanzuns d'art da Franz Schubert (Der Erlkönig, Heidenröslein, Das Wandern e Ständchen).

Richard Strauss (1864-1949) ha scrit ina cumposiziun musicala per grond orchester. El sa basa a moda libra sin il cudesch filosofic da Friedrich Nietzsche (1844-1900) «Also sprach Zarathustra». Quest cudesch tracta la relaziun dad in individi cun il mund, la relaziun tranter carstgaun e natira. Il profet Zarathustra vegn cun la levada dal sulegl giu dal culm e raquinta als carstgauns, che vivan ina vita terrestra, ch'i dettia er ina forza superiura. Tenor il profet valia la paina da sa stentar a quella forza superiura – in surcarstgaun.

Ord vista musicala èn las tonalitads C-dur sco er h-moll da gronda impurtanza per «Also sprach Zarathustra» da Strauss. Uschia è l'introducziun ina gronda cadenza che finescha en C-dur. Suenter l'emprima cesura mida la tonalitad abrupt en h-moll. La cumposiziun finescha era cun vi e nà d'accords da talas tonalitads.

Uschia pudess ins concluder che Strauss interpretescha cun la dispita da quellas duas tonalitads, che na pudessan betg esser pli differentas e lunsch davent ina da l'autra, il cumbat dad in carstgaun per daventar in surcarstgaun.

Pavana, menuet, valzer, habanera – furmas da saut chatt'ins dapertut en la musica classica. Il saut sco furma cumpositorica datti en mintga epoca da la musica e bunamain tar mintga cumponist. Musica e saut – ina simbiosa: surtut il ballet, per part era sco element dramaturgic-divertent en l'opera. Musica, saut e pled – quai èn ils dus ciclus «Liebeslieder. Walzer» da Johannes Brahms buns exempels. «La classica» porta tals sauts. Nus udin musica d'Aram Khachaturian, Alexander Borodin, Bedrich Smetana, Frédéric Chopin, Antonin Dvorak, Charles Gounod, Wolfgang Amadé Mozart e Johannes Brahms.

redacziun: Giusep G. Decurtins