La classica

Ils 6 da settember avant 85 onns è Gion Antoni Derungs naschì enta Vella. Gion Antoni Derungs – bain il pli grond ed impurtant cumponist rumantsch – è naschì ils 6 da settember 1935 a Vella. Mort è Gion Antoni ils 4 da settember 2012 a Cuira. La classica sa regorda dad el cun emetter da sia musica cumponida per orchester sinfonic, orchester instrumental, furmaziun da chombra e per chant da solo. Musica scritta tranter 1978-2010.

Nus udin: Capriccio per orchester instrumental (1986), Suita sursilvana: sis canzuns popularas dalla Surselva (1979), ord: Octet, op. 79 (1978): la danza, Canzuns romanticas per vusch da solo e piano (1985), ord: Bündner Tänze per orchester (2010): mazurka e valser, ord: Amur e dolur (2009): Dei jeu pia cun tristezia, Che fasch qua tü randulin, Cor, pertgei eis aschi trests e Donna, donna ve a cha.

La noziun «chanzuns senza pleds» stat en stretg connex cun il cumponist Felix Mendelssohn (1809-1847). El ha cumponì bunamain 50 ovras caracteristicas per clavazin ed ha dà a quellas il titel «Lieder ohne Worte». Inventà quest gener n'ha el dentant betg persul. Per l'ina ha ses scolast da clavazin, Ludwig Berger (1777-1839) fullà via cun ils opus 12 e 22 – e per l'autra è er sia sora Fanny Mendelssohn Hensel (1805-1847) stada da la partida.

En quest'ura udis Vus dasper mintgamai in carnet dals fragliuns Mendelssohn, er in'ovra d'in cumponist sidamerican. Heitor Villa-Lobos (1887-1959) ha fatg ina sintesa da musica classica da l'Europa e musica tradiziunala da la Brasilia. Il resultat da quella sintesa è la suita «Bachianas Brasileiras». Vus udis in extract ord quell'ovra, numnadamain la suita nr. 5 per otg cellos e sopran.

La fin da quell'emissiun cun musica senza pleds fa il cumponist russ Sergej Rachmaninow (1873-1943). La davosa da sias 14 chanzuns per chant e clavazin op. 34 ha el titulà «Vocalisa». L'interpret chanta l'entira ovra sulet sin in vocal. Igl è pia propi ina chanzun senza pleds.

Stad – la stagiun dal sulegl, dal bel chaud – quai ha er inspirà cumponists. La classica porta musica per il temp da stad, cumponida dal Russ Piotr Illitsch Tschaikowsky (Capriccio italien ed ils dus valzers dals ballets: Dornröschen e Nussknacker), dal Talian Giuseppe Verdi (L'estate ord: Le quattro stagioni), da l'Austriac Joseph Haydn (ord: Die Jahreszeiten – Der Sommer: terzet e chor final), dal Tudestg Johannes Brahms (ord: Liebeslieder-Walzer: Ein kleiner, hübscher Vogel e Rede, Mädchen, allzu liebes), dal Talian Gioacchino Antonio Rossini (La gazza ladra, uvertura) e dal Polac Frédéric Chopin (valzer ord: Les Sylphides).

Chant e ghitarra electrica: Nora Fischer fa giu la pulvra a musica veglia La chantadura Nora Fischer ed il ghitarrist Marnix Dorrestein fan in spagat: Els interpreteschan da nov musica veglia dal 17avel tschientaner. Uschia n'audan ins strusch las chanzuns da cumponists sco Monteverdi, Purcell u Dowland. Magari sumeglian lur interpretaziuns al jazz u al pop. Savens han ellas er in caracter psichedelic, cunzunt grazia ad effects spezials da la ghitarra electrica.

La finamira da Nora Fischer e Marnix Dorrestein è stada da pudair mussar ad in public pli vast quant bellas ed independentas dal temp che talas melodias cumponidas avant quatter tschientaners èn anc oz. Plinavant èsi stà impurtant ad els da mantegnair il spiert da las chanzuns da lezzas uras, tenor mai è quai gartegià.

Avant 250 onns è Ludwig van Beethoven naschì. Quest onn festivescha il mund da la musica classica 250 onns Ludwig van Beethoven. Naschì è el a Bonn (Germania) ca. mez december 1770 (battegià 17-12-1770). Il bler da sia vita ha el vivì e lavurà a Vienna. Là è el mort ils 26 da mars 1827. Beethoven ha manà la classica da Vienna al zenit ed uschia ha el fullà via tar la romantica tempriva. Quest onn sa fatschenta lemssiun La classica da RTR cun quest grond architect da musica. La 4. part porta musica vocala. Nus udin las cantadas: Meeresstille und glückliche Fahrt, Chorfantasie, Bundeslied, Opferlied e las chanzuns: Die Himmel rühmen, Lied aus der Ferne, Der Kuss ed Auf dem Hügel sitz ich spähend. (Rep. dals 19-04-20).

Redacziun: Giusep G. Decurtins

La pli populara ovra dal cumponist franzos Maurice Ravel (1875-1937) è ses Boléro. Tenor el ha quest saut spagnol però da far pauc cun musica. La finala è la dramaturgia dal ballet la raschun ch'il Boléro è in grond crescendo. Ravel è in cumponist ch'ha discurrì fitg pauc davart sia musica u davart ses cumponer. Al cumponist svizzer Arthur Honegger ha el però tradì:

«En mia vita hai jau cumponì sulet ina capodovra e quai è stà il Boléro. Deplorablamain n'ha quel da far nagut cun musica.» Maurice Ravel

Quest Boléro ha el cumponì per la sautunza Ida Rubinstein. Tar il Boléro sa tracti pia da musica da ballet, uschia che la scena, la «istorgia» dal ballet dictescha il caracter da la musica. Quest ballet gioga en in café spagnol: Tuttenina cumenza ina dunna giuvna a sautar in «bolero», pia in saut spagnol, e successivamain cumenzan er ils auters visitaders dal café a sautar. Il rest è extasa collectiva.

Questa extasa exprima Ravel en ses Boléro cun in grond crescendo che cuzza l'entira ovra da bun in quart d'ura. En in piano-pianissimo cumenza il schumber pitschen cun il ritmus caracteristic ch'el repeta d'in cuntin. Sur quella basa sa rasa la melodia ed er quella sa repeta en differents instruments – fin tar il punct culminant ed ina fin andetga.

Sper il renumà Boléro udis Vus en quest'emissiun er autras perlas musicalas da Ravel che tutga – sper Claude Débussy – tar in dals represchentants principals da l'impressiunissem musical.

Avant 250 onns è Ludwig van Beethoven naschì. Quest onn festivescha il mund da la musica classica il giubileum dad in dals gronds cumponists, dad in che ha influenzà e marcà l'istorgia da musica sco mo paucs: Ludwig van Beethoven. Naschì è el a Bonn (Germania) ca. mez december 1770 (battegià 17-12-1770). Il bler da sia vita ha el vivì e lavurà a Vienna. Là è el mort ils 26 da mars 1827. Quest onn sa fatschenta l'emissiun «La classica» ina giada al mais cun quest grond architect da musica. La terza part porta 7 da sias 11 uverturas. L'emprima datescha dals 1800 (Prometheus), la davosa dals 1822 (Zur Weihe des Hauses). Beethoven ha scrit uverturas vairas sco: Leonore I-III, Egmont e Fideli. Dad el datti era uvertuars faussas che na stattan betg a l'entschatta d'ina opera, d'in oratori – savens è quai musica da program sco: «Zur Namensfeier» u «Zur Weihe des Hauses». (Rep. dals 08-03-2020).

Durant l'entir process da cumposiziun da ses op. 11 n'era Johannes Brahms (1833-1897) betg segir dal gener. Era el gia pront per ina sinfonia elavurada? Sco ch'i para, betg. Durant cumponer quest'ovra è Brahms bunamain sa desperà:

«Ich sehe es ein, dass das Werk so eine Zwittergestalt, nichts Rechtes ist. Ich hatte so schöne, so grosse Idee [sic!] von meiner ersten Sinfonie, und nun!» (Johannes Brahms)

La finala hai dà ina maschaida tranter serenada e sinfonia. Tar ils tratgs d'ina serenada tutga il caracter divertent e simpel, cunzunt dals moviments quatter, tschintg e sis. Ils emprims trais moviments èn però pli lungs e cunzunt pli elavurads sco tals d'ina sinfonia.

Vitiers vegn che Brahms ha cumponì ina serenada per orchester grond cun mintgamai duas flautas, oboas, clarinettas, fagots, schizunt quatter corns, duas trumbettas, paucas e natiralmain instruments d'artg. Uschia fiss il titel «Sinfonie-Serenade», che Brahms ha nudà en sias skizzas, forsa adattà.

La finala ha el tuttina puspè stritgà la part da sinfonia. Il giuven da 26 onns n'era anc betg pront per si'emprima sinfonia e na leva anc betg sa metter en retscha cun il grond bab da la sinfonia Beethoven. L'emprima sinfonia ha Brahms pir scrit cura ch'el aveva 43 onns.

Avant la serenada nr. 1 da Brahms pudais Vus udir en questa «Classica» l'uvertura «Genoveva» da Robert Schumann (1810-1856). «Genoveva» (1847/48) è la suletta opera che Schumann ha cumponì. Fin oz n'ha l'opera sez betg propi gì success, tut auter l'uvertura. Sper l'uvertura «Manfred» op. 15 tutga l'uvertura «Genoveva» tar las pli renumadas uverturas da Schumann – ovras che tutgan tar il repertori classic.

Avant 250 onns è Ludwig van Beethoven naschì. Quest onn festivescha il mund da la musica classica il giubileum dad in dals gronds cumponists, dad in che ha influenzà e marcà l'istorgia da musica sco be paucs: Ludwig van Beethoven. Naschì è el a Bonn (Germania) ca. mez december 1770 (battegià 17-12-1770). Per la pli gronda part da sia vita ha el vivì e lavurà a Vienna. Là è el mort ils 26 da mars 1827.

Beethoven ha manà la classica da Vienna al zenit ed uschè ha el fullà via tar la romantica tempriva. Quest onn sa fatschenta era l'emissiun «La classica» da RTR cun quest grond architect da musica.

L'emprima part da questa seria è ina spezia «The Best of Beethoven» (instrumental, Rep. dals 12-01-2020).

Redacziun: Giusep G. Decurtins

La sinfonia nr. 4 da Tschaikowsky (1840-1893) tracta dal destin, da ses destin. Quell'ovra ha el cumponì, cura ch'el era en ina crisa persunala, numnadamain la fin dals onns 1870.

L'onn 1877 nè betg stà simpel per il cumponist russ. Sulettamain per mantegnair la parita d'ina vita normala ha el maridà tut anetg quel onn. Uschia na fai betg surstar che quella letg è stada pauc ventiraivla. La suletta via ord quella miseria veseva Tschaikowsky en la mort e la finala ha el er empruvà da sa prender la vita. Dal medem onn datescha er la sinfonia nr. 4.

Che quella ovra tracta da ses destin savain nus oz grazia a sia correspundenza cun sia mecena Nadezhda von Meck. Uschia descriva Tschaikowksy ch'il destin haja la «fatala pussanza» d'evitar ch'ins haja cletg en la vita. La sinfonia nr. 4 tractia da quella pussanza che pendia sco ina spada da Damocles sur il chau. Pir en il quart moviment da quella sinfonia dumogna Tschaikowsky da volver il dies al destin – almain per in mument.