La classica

Avant 250 onns è Ludwig van Beethoven naschì. Quest onn festivescha il mund da la musica classica 250 onns Ludwig van Beethoven. Naschì è el a Bonn (Germania) mez december 1770 (battegià 17-12-1770). La gronda part da sia vita ha el vivì e lavurà a Vienna. Là è el mort ils 26 da mars 1827. Beethoven ha manà la classica da Vienna al zenit ed uschia ha el fullà via a la romantica tempriva.

Quest onn sa fatschenta l'emissiun La classica da RTR ina giada al mais cun quest grond architect da la musica. La quarta part porta musica vocala. Nus udin las cantatas: Meeresstille und glückliche Fahrt, Chorfantasie, Bundeslied, Opferlied e las chanzuns: Die Himmel rühmen, Lied aus der Ferne, Der Kuss ed Auf dem Hügel sitz ich spähend.

Gia sco uffant era Clara Schumann (1819-1896) – lura anc Clara Wieck – ina pianista talentada. Ses bab, in scolast da clavazin a Leipzig, ha furmà Clara a partir da l'entschatta sco uffant genial. Tant pli scuidus è il bab vegnì, cura che Clara e Robert Schumann èn s'inamurads. Il bab è schizunt ì la via giudiziala per evitar che sia figlia maridia Robert Schumann – 9 onns pli vegl ed anteriur scolast da clavazin da Clara. L'amur dal pèrin è però stada pli ferma – il 1840 han Clara e Robert maridà.

A partir da quel mument ha Clara dentant vivì u stuì viver en la sumbriva da ses um ch'era medemamain cumponist e pianist. Da lez temp na deschevi betg che dunnas avessan creà cumposiziuns, ellasdunnas astgavan sin il pli vesair ora bain al clavazin.

En il center da quella classica – Soirées musicales

En quella classica pudais Vus tranter auter udir il ciclus per clavazin cun il titel «Soirées musicales», op. 6. Quella ovra ha Clara Schumann cumponì en la vegliadetgna da bun 16 onns, cur ch'ella gieva sin turnea sco pianista.

L'ovra ha sis moviments ch'èn per exempel titulads cun Mazurka, Polonaise u Ballade. Quels titels regordan zunt fitg ad in auter grond pianist da lez temp: a Frédéric Chopin che la pianista-cumponista enconuscheva persunalmain.

«La classica» da RTR dechanta la stagiun dal prosperà, chatschà e dal flurì. Sentiments da primavaira en la musica classica. Sco part principala udin nus Der Frühling, la segunda part da l'oratori profan Die Jahreszeiten, musica da Joseph Haydn (1732-1809) tenor pleds da Gottfried van Swieten. En pli preschentain nus cumposiziuns da Felix Mendelssohn-Bartholdy (1809-1847) 1. moviment da la sinfonia nr. 4 (Die Italienische) e da Frédéric Chopin (1810-1849) il valzer Les Sylphides en in'orchestraziun da Roy Douglas. Sco cuntrapaisa chantan Anne Sofie von Otter e Wolfgang Holzmair duas chanzuns da Franz Schubert (1797-1828) Der Frühling e Frühlingssehnsucht».

Il gener dal divertimento è in gener simpel. Sco ch'il pled «divertimento» di gia, èn divertimentos scrits per divertir. Uschia sa cumpona in divertimento da plirs simpels moviments. Il divertimento en Es-Dur (KV 563) da Mozart è però in'excepziun. Mozart n'ha mai vulì differenziar tranter musica d'art e musica da divertiment. Uschia ha el er giugà en ses sulet divertimento per violina, viola e violoncello cun la convenziun ed ha cumponì in divertimento zunt elavurà, per uschè da dir serius. El ballantscha tranter il stil galant ed il stil doct, vul dir tranter in stil pli melodius e divertent ed in stil pli academic.

La classica – in spezia sammelsuri d'ovras nunenconuschentas da cumponists tant sco emblidads. Nus udin: Da Friedrich Anton Ferdinand von Flotow (1812-1883) trais parts da si'opera «Martha oder Der Markt von Richmond» (uvertura, Ach! So fromm e Die letzte Rose). Da Franz Anton Hoffmeister (1754-1812) il terz moviment da ses Concert per viola ed orchester en D-Dur. Da Marianna von Martines (1744-1812) la cantata per sopran ed orchester Il primo amore. Da Peter Heidrich (*1935) las 14 variaziuns da la chanzun englaisa Happy Birthday. Da Jacques Ibert (1890-1962) il rondo per orchester Hommage à Mozart e da Vincenzo Bellini (1801-1835), il grond um da l'opera taliana insatge nunusità, il Concert per oboa ed orchester en Es-Dur.

Redacziun: Giusep G. Decurtins

La classica – in spezia sammelsuri d'ovras nunenconuschentas da cumponists tant sco emblidads. Nus udin: Da Friedrich Anton Ferdinand von Flotow (1812-1883) trais parts da sia opera «Martha oder Der Markt von Richmond» (uvertura, Ach! So fromm e Die letzte Rose). Da Franz Anton Hoffmeister (1754-1812) il terz moviment da ses Concert per viola ed orchester en D-Dur. Da Marianna von Martines (1744-1812) la cantata per sopran ed orchester Il primo amore. Da Peter Heidrich (*1935) las 14 variaziuns da la chanzun englaisa Happy Birthday. Da Jacques Ibert (1890-1962) il rondo per orchester Hommage à Mozart e da Vincenzo Bellini (1801-1835), il grond um da l'opera taliana insatge nunusità, il Concert per oboa ed orchester en es-dur.

En questa Classica pudais Vus tadlar intgins schatgs da musica dal cumponist tudestg Richard Wagner (1813-1883). Ina gronda part da sia vita ha Wagner er passentà en l'exil en Svizra. Durant quel temp è Wagner stà uschè productiv sco nagliur auter. Vegnì en Svizra è Wagner il 1848 sco fugitiv politic. Suenter l'uschenumnà «Dresdner Maiaufstand» devi in mandat d'arrest cunter el. Wagner è arrivà quasi cun nagut en Svizra. Davent da l'entschatta ha el però savì co far contacts. I n'è betg ì ditg, ch'el ha gì in mecen: Otto Wesendonck. Dentant ha Wagner gì ina affera cun la dunna da lez, cun Mathilde Wesendonck. Lezza vala sco la musa da Wagner.

Tranter auter ha Wagner cumponì la musica tar intginas poesias ch'ella ha scrit. Quellas tschintg chanzuns ch'èn enconuschentas sco «Wesendonck-Lieder» udis vus er en questa emissiun. La finala è lur affera vegnida a la glisch e Wagner è puspè fugì, lu dentant betg sco fugitiv politic, mabain da l'amur.

Avant 250 onns è naschì Ludwig van Beethoven. Quest onn festivescha il mund da la musica classica il giubileum dad in dals gronds cumponists, dad in che ha influenzà e marcà l'istorgia da musica sco mo paucs: Ludwig van Beethoven. Naschì è el a Bonn (Germania) ca. mez december 1770 (battegià 17-12-1770). Il bler da sia vita ha el vivì e lavurà a Vienna. Là è el mort ils 26 da mars 1827.

Quest onn sa fatschenta l'emissiun «La classica» ina giada al mais cun quest grond architect da musica. La terza part porta set da sias 11 uverturas. L'emprima datescha dal 1800 (Prometheus), la davosa dal 1822 (Zur Weihe des Hauses). Beethoven ha scrit uverturas vairas sco: Leonore I-III, Egmont e Fideli. Dad el datti era uverturas faussas che na stattan betg a l'entschatta d'ina opera, d'in oratori – savens è quai musica da program sco: «Zur Namesfeier» u «Zur Weihe des Hauses».

Redacziun: Giusep G. Decurtins

Quella Classica emprova da condensar l'opera «Macbeth» da Giuseppe Verdi «en in'ura»: I va per pussanza, meglier ditg per in pèrin che n'ha nagins scrupels per vegnir a la pussanza. La Lady Macbeth e ses um Macbeth mazzan pliras persunas per ch'els daventian retg e regina. A l'entschatta da l'opera entaupan ils dus generals Macbeth e Banco strias. Quellas profetiseschan che Macbeth daventia in di Than da Cowdor e pli tard retg. Ma ellas profetiseschan er che Banco vegnia in di ad esser il bab da retgs – vul dir ch'ils fegls da Banco vegnan ad esser retgs, el sez però betg. Suenter quellas emprimas profezias cumenza la spirala da mazzar per pussanza.

Lady Macbeth ha en las chautschas

Cunzunt la Lady Macbeth, la dunna da Macbeth, n'ha insumma nagins scrupels da mazzar autras persunas per ch'ella vegnia regina. Ella instighescha ses um da commetter divers mazzaments. Envers la fin sa mida quai però ed ella daventa unfrenda. Cunquai ch'ella ha schletta conscienza fa ella suicidi.

Tut auter Macbeth. Lez è l'entschatta anc pli reservà, ma cun il temp po la Lady persvader el da mazzar per pussanza. La finala na s'enricla el betg da ses malfatgs. El sto constatar ch'el n'ha nagina schanza pli e mora en il cumbat sin il champ da battaglia.

Nello Santi, il dirigent talian cun in dachasa a Turitg e durant onns era a Flem, è mort ils 6 da favrer en la vegliadetgna dad 88 onns. Cun Nello Santi perda il mund da la musica in artist carismatic, in dals gronds dirigents dal repertori da lopera taliana. Santi ha dirigì en las impurtantas chasas dopera dal mund. El ha lavurà ensemen cun ils pli renumads chantadurAs da ses temp. A Turitg ha el scrit istorgia. Passa 60 onns è Nello Santi stà collià fermamain cun lopera da Turitg. Là ha el dirigì 94 premieras, surtut operas da Verdi, Puccini, Donizetti e Rossini. Sias interpretaziuns valan anc oz sco mussavia dina musica a litaliana. Ils 6 da favrer è maestro Santi mort a Turitg e quai en la vegliadetgna dad 88 onns.

La classica sa regorda da quest grond dirigent chha laschà enavos fastizs er en il Grischun, a Flem. Il settember 2002 è Nello Santi stà osp en in Artg musical da Rosvita Scherrer. Questa emissiun interessanta mussa fitg bain las diversas facettas da quest grond um da la musica taliana. Sper musica dirigida da Nello Santi porta La classica parts da quest discurs dals

21-09-2002.

Redacziun: Giusep G. Decurtins