La classica

Georg Friedrich Händel è naschì a Halle. Propi carriera ha el però fatg en la Gronda Britannia, nua ch'el ha lavurà a la curt roiala. Mort è el il 1759 a Londra. A la curt roiala a Londra ha el adina puspè survegnì incumbensas dal retg. Uschia ha el per exempel stuì cumponer musica adattada per sunar ordavert u pli precis sin in bastiment (Water music). Ed er per festivar la «Pasch dad Aachen» dal 1748 ha el survegnì in'incumbensa da la curt roiala. Per festivar la fin da la guerra ha il retg planisà in spectacul cun fieu artifizial e salvas d'onur. Händel ha gì l'incumbensa da cumponer musica che tegna pitg a la canera dals chanuns. La finala èsi però vegnì tut auter (Music for the royal fireworks).

Soundtrack per la Championsleague

Er ina melodia che cunzunt ils fans da ballape enconuschan oz, deriva or da la plima da Händel. Per cumponer l'imni da la Champions League è Tony Britten s'orientà il 1992 fitg ad in imni da Händel. Quel imni (Zadok the Priest) ha Händel cumponì oriundamain per las festivitads d'incurunaziun da King George II., l'onn 1727.

Il halleluja ord il Messias

Igl è forsa il pli pompus halleluja insumma ord l'oratori, il Messias che Händel ha cumponì il 1741. Il halleluja resuna a la fin da la segunda da trais parts. Cura ch'il retg George II. ha udì l'emprima giada quest imni, saja el stà tut commovì en pe. Dapi lura èsi usit ch'ils Englais stattan en pe per tadlar il halleluja da Händel.

Avant 195 onns è naschì Johann Strauss, il figl(1825-1899). Avant 15 dis ha La classica discurrì da la relaziun disturbada tranter Johann Strauss, il bab e Johann Strauss, il figl – davart ina famiglia tut autra che armonica! Questa segunda part porta il suttitel: Johann Strauss, il figl – sias duas fatschas e las entschattas da sia firma da musica.

Nus udin insatge da sia tenuta durant ils embrugls da la revoluziun dals 1848, da sia relaziun cun la curt imperiala e surtut da sia relaziun cun las dunnas, Jetty e Lily e da sia amur zuppada, Olga Smirnitzky. Sia tema da murir e la relaziun cun ses dus frars pli giuvens, Josef ed Eduard, èn era part da questa emissiun. Johann Strauss, il figl è naschì ils 25 d'october 1825 a Vienna – pia uss avant 195 onns. Là è el mort ils 3 da zercladur 1899.

Avant 195 onns è Johann Strauss, il figl naschì (1825-1899). Avant 195 onns è naschì Johann Strauss, il figl (1825-1899).

Ils Strauss da Vienna – davart ina famiglia tut autra che armonica! Igl è bain unic en listorgia da la musica che dus umens da la medema famiglia, che purtavan il medem prenum, che lavuravan en la medema citad – els faschevan surturt musica da divertiment e saut – avevan pli u main la medema popularitad: Johann Strauss, il bab e Johann Strauss, il figl. Dentant: lur relaziun era fitg disturbada. En inemprima part discurra La classica da la relaziun dals Strauss cun il mentur e pli tard concurrent Joseph Lanner, da las uschenumnadas soirées dansantes, quellas sairas da saut enorm tschertgadas e fitg popularas, e da las relaziuns famigliaras dals Strauss, relaziuns tut auter che armonicas. (2. part: La classica dals 15-11-20 19:00 / rep. 22-11-20 15:03: Johann, il figl e sias duas fatschas e las entschattas da sia firma da musica).

L'orgla da beselgia e sia funcziun sacrala e profana. Il svilup da l'orgla primitiva, da quest instrument cun mo paucs tuns e siu fol enfin a l'orgla moderna, in instrument cumputrisà cun sias milli pussaivladads e cumbinaziuns da tuns e colurs tonalas – quai svilup è fantastics. La classica sa fatschenta cun lorgla e sia funcziun sacrala e profana. Sacral – qua stà ella en servetsch da la liturgia, accumpogna ed embellescha cults divins, survetschs divins (chant da pievel, messas chantadas dals chors baselgia, chorals etc. ). Profan – qua entaupins l'orgla sco instrument solistic, sco element en la musica sinfonica, sco instrument zunt adattà per l'improvisaziun sco era per musica da divertiment e populara.

Redacziun: Giusep G. Decurtins

Schins discurra da la «Novavla», èsi cler da tge ovra chi sa tracta: Igl è ina da las sinfonias monumentalas da Beethoven, sia ultima per esser precis. Ma, daco è gist quellovra talmain speziala e co èsi ì vinavant suenter cun il gener da la sinfonia? Questa «Classica» emprova da dar respostas. Ludwig van Beethoven (1770-1827) ­ tutga sco Joseph Haydn (1732-1809) e Wolfgang Amadeus Mozart (1756-1791) tar ils trais gronds cumponists da lepoca classica. Er Haydn e Mozart han cumponì sinfonias. Beethoven ha però sviluppà quel gener sco nagin auter. Cun sias contribuziuns è la sinfonia daventada il gener cun il pli grond prestige insumma.

La Novavla sinfonia ha gì sia premiera lonn 1824. En quella ha Beethoven integrà in chor. Quai è stà in grond novum, perquai che fin uss era la sinfonia in gener sulettamain instrumental, senza cuntegn u text. Igl è stà lultima sinfonia che Beethoven ha cumponì. E ses collegas cumponists han anc generaziuns suenter stuì morder ora ils dents cun lierta che Beethoven ha laschà enavos.

La classica cun ovras che stgaudan adina puspè cor ed olma. En sia seria cun hits da la musica classica porta l'emissiun «La classica» questa giada ovras da: Wolfgang Amadé Mozart (ord: Klavierkonzert Nr. 21 - Andante, Klavierkonzert Nr. 27 – Allegro ed ord: Le nozze di Figaro – uvertura e l'aria: Voi che sapete), da Ludwig van Beethoven (Romanze für Violine und Orchester in F-Dur e Für Elise), da Carl Maria von Weber (Abu Hassan – uvertura), da Johann Peter Salomon (Romanze für Violine und Streichorchester), da Michail Iwanowitsch Glinka (Ruslan und Ludmila – uvertura), dad Antonin Dvorak (Slawischer Tanz nr. 6) e da Giuseppe Giordani (Caro mio ben).

Redacziun: Giusep G. Decurtins

En quella Classica pudais Vus tadlar musica dal l'epoca dal baroc. Tranter ils cumponists segnan Pachelbel, Bach, Corelli u Tartini. L'istorgia da musica classica è magari er ina istorgia da chanzuns che na van betg ord l'ureglia, da baus d'ureglia. Intginas ovras oriundamain cumponidas avant tschients onns han savens dastgà renascher en la musica da pop e rock. Per exempel sa basa «Conquest of paradise», la musica dal cumponist grec Vangelis, sin ina successiun d'accords enconuschenta en il temp baroc. Quella successiun era da lez temp enconuschenta sut il titel «La Follia». En La Classica pudais Vus tadlar las variaziuns che Arcangelo Corelli ha fatg sur da quella successiun d'accords.

Er ina lingia dad otg tuns en il bass, renumada en il temp baroc, ha chattà la via en numerusas chanzuns pli modernas. Uschia sa basan «Memories» da Maroon 5, «Go West» dals Pet Shop Boys u «Basket Case» da Green Day sin il medem construct armonic sco il canon en D-Dur da Johann Pachelbel (1653-1706).

Plinavant pudais Vus er tadlar inqual variaziun or da las «Goldberg-Variationen» da Johann Sebastian Bach. Quellas ha Bach cumponì aposta per tadlar durant la notg: In collega dad el che na saveva betg durmir ha mintgamai laschà sunar la notg quellas variaziuns. Er Giuseppe Tartini è in cumponist dal baroc, da lez udis la «Teufelstriller-Sonate».

Avant 140 onns è Jacques Offenbach mort sper Paris. Jakob u Jacques Offenbach – naschì ils 20 da zercladur 1819 a Cologna, mort ils 5 doctober 1880 sper Paris – è stà in cumponist, cellist e directur da teater tudestg-franzos. El vala sco l'inventader da l'operetta moderna, vul dir da quella che è semancipada e daventada uschè in genre independent dal teater musical. I sa tracta dad ovras per la tribuna cun ina presa critic-satirica. En sias operettas prenda Offenbach gugent situaziuns dal mintgadi e persunas da la societad aristocratica sin la corna. Sia musica è viv-frestga, da grond schlantsch e d'ina ritmica marcanta. Las melodias van bainspert en l'ureglia (Barcarole ord Les Contes d'Hoffmann u il Can-Can ord Orpheus in der Unterwelt). Sper sia musica per la tribuna (102 ovras, d.a. La belle Hélène, La vie parisienne, Barbe-bleue) ha Offenbach era cumponì per cello e piano e concerts per cello ed orchester.

Redacziun: Giusep G. Decurtins

La classica renda omagi ad in vair homo musicus. Simon Camartin da Mustér – ils 25 da settember cumplenescha el ses 75avel anniversari. Cun bun 50 onns è el sa deditgà entiramain a sia passiun, la musica, il diriger. E quai cun grond engaschi, plaschair e success! Fin oz ha el dirigì passa 40 orchesters en 25 divers pajais. Simon Camartin n'è betg mo il dirigent che porta la musica indigena sur ils cunfins, mabain er il dirigent che porta las ovras enconuschentas dal grond mund sco era musica contemporana qua tar nus. Ed el ha adina puspè promovì giuvens talents da musica, indigens ed esters. En La classica dad oz preschenta Simon Camartin ovras dirigidas dad el a Falera, Lemberg (Ucraina), Minsk (Bielorussia) e Tiflis (Georgia). Nus udin: Letizia Scherrer (chant), Oana Camartin (violina), Oksana Rapita (piano) e Christina Daletska (chant) ed ils orchesters: Filarmonica de Stat Oradea (Rumenia), INSO National Symphony Orchestra Lemberg (Ucraina), Orchester naziunal da Radio e Televisiun Bielorussia Minsk, Georgian National Symphony Orchestra & Choir Tiflis e la Camerata Moldova.

Redacziun: Giusep G. Decurtins

La musica dal cumponist talian contemporan Ludovico Einaudi (*1955) è enconuschenta ad in public vast. El è in dals paucs che dumogna dad emplenir tant salas da concert sco er stadions. Questa Classica dat in'invista en si'ovra.

Ludovico Einaudi cumpona en emprima lingia per il clavazin, dentant betg sulettamain. Gist l'ultim decenni ha el agiuntà instruments d'artg sco er suns e tuns electronics a sias cumposiziuns. A la surfatscha para la musica da sa midar. I tuna magari pli pauc classic, pli datiers al gener dal pop, pli modern, forsa er pli popular. Dentant, il coc da sias cumposiziuns n'è strusch sa midà en cumparegliaziun cun sias emprimas cumposiziuns dals onns 90. Sia musica è caracterisada d'elements repetitivs, structuras simplas e paucs moviments armonics.