La classica

Il cumponist franzos Georges Bizet (1838-1875) è sa deditgà bunamain sia entira vita al gener da l'opera. Sia musica orchestrala è pli pauc enconuschenta. En questa classica udis Vus sia entira sinfonia en C-Dur, in'ovra da giuventetgna da Bizet.

La sinfonia en C-Dur ha Bizet cumponì cun sulet 17 onns. Quai è anc avant ch'el ha survegnì il grond premi da Roma ed ha pudì ir durant trais onns en la chapitala taliana per profundar sia scolaziun musicala. Bizet n'era da lez temp anc betg enconuschent, uschia n'ha el sez er mai udì sia sinfonia. Durant 80 onns èn las notas da questa sinfonia, la partitura stada zuppada en in truchet. Cartaivlamain è quell'ovra er sulet il resultat d'in exercizi d'in cumponist giuven.

Musicalmain pon ins constatar che Bizet, in cumponist da la romantica, è sorientà fitg vid ils idols da la classica. Sia sinfonia fa la parita d'ina sinfonia à la Haydn u Mozart. Bizet ha dà fadia da cumponer ina sinfonia cun ina clera furma ed in solida basa tonala, dentant senza far stinà da scolar. La zunt equilibrada orchestraziun en quella sinfonia mussa las abilitads da Bizet.

Ina incumbensa da Mozart a Salzburg era d'embellir musicalmain ils servetschs divins.

La gronda part da la musica sacrala da Mozart (1756–1791) pon ins divider en duas fasas cumpositoricas: 1772–1777 e 1779–1781. Mozart steva lura en servetsch da l'uvestg da Salzburg. Durant sia dimora a Vienna, quai sco cumponist/artist liber, ha Mozart scrit mo paucas ovras sacralas, dentant impurtantas: il Requiem, la Grosse Messe in c-moll e lura curt avant sia mort l'enconuschent Ave verum corpus.

La Classica dad oz porta musica sacrala da Wolfgang Amadé Mozart. Nikolaus Harnoncourt dirigia il Concentus musicus da Vienna, solists vocals ed il renomà Arnold Schönberg-Chor. Nus udin:

* Laudate Dominum (ord: Vesperae solennes de Confessore),

* Dulcissium convivium (ord: Litaniae de venerabili altaris sacramento),

* la motetta da solo Exsultate, jubilate,

* ils offertoris: Venite populi, Benedictus sit Deus, Sub tuum praesidium e

* las duas motettas da Maria: Sancta Maria, mater Dei ed Alma Dei creatoris.

L'element blau ha inspirà numerus cumponists. Saja quai ils daguts d'in urizi, l'imposanta forza dals flums u las reflexiuns ch'ins vesa en aua ruassaivla. En la «Classica» udis Vus cumposiziuns ch'han en ina furma u l'autra in connex cun l'aua.

Sin il cedel da program da quest'emissiun stattan dasper las renumadas ovras sco «La Moldau» da Bedrich Smetana u «An der schönen blauen Donau» da Johann Strauss, il figl er in scherzo or da la sinfonia «Die Rheinische» da Robert Schumann. Er en ils titels per clavazin «Une barque sur l'océan» da Maurice Ravel e «Le Onde» da Ludivico Einaudi han ils cumponists vulì metter aua en musica. Lura pudais Vus er tadlar in extract or da la suita da Tchaikovsky «Schwanensee» ed il preludi dals daguts da plievgia, ina cumposiziun da Frédéric Chopin.

Primavaira en la musica classica.

Sentiments da primavaira en la musica classica! Uss, per l'entschatta da la primavaira 2021, dechanta l'emissiun La classica la stagiun dal prosperar, dal chatschar e dal flurir. Nus udin musica sinfonica da: Felix Mendelssohn-Bartholdy, Franz Schubert, Johann Strauss, Pjotr Ilitsch Tschaikowsky e d'Antonio Vivaldi. Sco intermezzos interpreteschan Regula Mühlemann (sopran) e Tatiana Korsunskaya (piano) chanzuns da la patria dals dus cumponists svizzers Walther Geiser da Zofingen (1897–1993) e Wilhelm Baumgartner da Rorschach (1820-1867).

Interessant per nus Rumantschs è che Walther Geiser – el era da lez temp professer al conservatori da Basilea – ha gì mess duas poesias da Jachen Luzzi en musica (Prümavaira e Dorma mes charin). Udir co che Regula Mühlemann, la gronda sopranista d'Adligenswil/Lucerna chanta questas duas en in stget e net ladin è in daletg!

Redacziun: Giusep G. Decurtins

Ins taidla musica e dat in gieu. Ma er en gieus da video datti musica e quella audan ins segir main conscientamain. En La Classica pudais Vus però tadlar ina schelta da talas melodias, per il pli en versiuns sinfonicas.

Gia il 2011 ha l'orchester da grond renum, il London Philharmonic Orchestra, registrà in album en quest connex. Quel album porta il curaschus titel «The Greatest Video Game Music», pia la pli grondiusa musica en gieus da video. Quellas interpretaziuns orchestralas furman la basa da l'emissiun.

Brachial enfin dultsch

Il repertori da musica da gieus da video è vast. Uschia audan ins per part en il medem gieu d'acziun cumposiziuns fitg pesantas sco er melodias pli finas. Musica cun in caracter pli luc, quasi divertent porschan savens gieus d'aventuras u da puzzle.

La musica da gieus da video è pia fitg differenta e quai sto ella er esser. La finala raquinta in gieu ina istorgia. La musica creescha in'atmosfera, accumpagna la persuna che sesa avant il computer tras il gieu e suttastritga uschia l'entira istorgia. Per part dovri passaschas pompusas che sumeglian a grondas furmas sinfonicas, per part er be simpla musica d'ambient senza gronds puncts culminants.

Avant 180 onns è il cumponist naziunal tschec Antonin Dvorak naschì.

Antonin Dvorak (1841-1904) n'è betg stà in interpret da format sco ses collegas Franz Liszt u Johannes Brahms. Da chasa anora era el violinist. La violina ha el dentant barattà cun la bratscha e cun lezza è el entrà il 1862 en l'Orchester dal teater da Prag. Strusch in auter cumponist n'ha fatg in tal svilup social sco el: la via dal mazler – quai è stà l'emprima professiun da Dvorak – ad in cumponist da renum mundial. 1891 daventa Dvorak magister al conservatori da Prag. Lura suonda el il clom dal conservatori da New York. Là ha el scolà in'enitra generaziun da giuvens cumponist e scrit, tranter auter, sia 9avla sinfonia «Aus der neuen Welt». 1895 returna el a Prag, daventa directur dal conservatori e cumpona sias ovras tardivas sco il concert per cello ed orchester e l'opera «Rusalka». Ensemen cun ses dus collegas Bedrich Smetana e Leos Janacek ha el era inizià e furmà la musica naziunala tscheca e manà quella a la perfecziun. 1904 mora Antoni Dvorak a Prag.

Redacziun: Giusep G. Decurtins

Lom e chaud, cler e traglischant, ma er liric, pesant u tuttavia er dultsch. Uschia po in cello tunar. En questa Classica stat quel instrument cun il corpus da lain che vegn sunà tranter las chommas en il center, il violoncello – u curt il cello.

Ins di chil tun dal cello sumeglia il pli fitg a la vusch dal carstgaun. Forsa vegnan ovras oriundas per chant pervi da quai gugent arranschadas per il cello. Dus da quels arranschaments udis Vus gist a lentschatta da lemissiun. Per lina è quai «Vocalise» dal cumponist russ Sergei Rachmaninow e per lautra «Lasst mich allein» da Antonin Dvorak.

Suita per violoncello e clavazin nr. 1 da Brahms

Lovra principala da questa Classica furma la suita per violoncello nr. 1 da Johannes Brahms, in semperverd en la litteratura per quest instrument. Beethoven, chè stà in idol da Brahms e chha vivì ina generaziun avant, vala sco piunier per il gener da suita per violoncello e clavazin. El è stà lemprim chha cumbinà quels dus instruments sco partenaris eguals. Brahms ha cuntinuà sin la via da Beethoven.

En pli udis Vus «Sicilienne» da Gabriel Fauré, ina cumposiziun plitost dultscha. I sa tracta din arranschament per cello ed orchester. La fin stat il cello tut persul sin il palc. Vus pudais tadlar musica dal cumponist baroc Johann Sebastian Bach, numnadamain ils emprims dus moviments da sia suita per violoncello nr. 1.

La Classica questa giada cun in program spiramain russ.

«Die Luft der Fremde bekommt meiner Inspiration nicht, weil ich Russe bin, und das Unbekömmlichste für einen Menschen wie mich ist es, im Exil zu leben», uschia Sergej Prokofjew. Quests pleds savessan er esser da Sergej Rachmaninow. El che ha en ils 25 onns suenter sia emigraziun cumponì sulettamain sis ovras. Ed en tut quellas ha el laschà resunar l'olma da sia patria. La Classica va oz a la tschertga da questa uschè numnada olma russa. Nus udin musica magari melanconic-pitra, magari frestg-fidel-viva cumponida da Dmitri Schostakowitsch, Aram Khachaturian, Michael Glinka, Sergej Rachmaninow, Alexander Borodin e Nikolai Rimski-Korsakow. Munida vegnan quellas ovras cun chanzuns tradiziunalas russas tschentadas per chor e dadas dals renumads Don Kosaken.

Georg Friedrich Händel è naschì a Halle. Propi carriera ha el però fatg en la Gronda Britannia, nua chel ha lavurà a la curt roiala. Mort è el il 1759 a Londra.

A la curt roiala a Londra ha el adina puspè survegnì incumbensas dal retg. Uschia ha el per exempel stuì cumponer musica adattada per sunar ordavert u pli precis sin in bastiment (Water music). Ed er per festivar la «Pasch dad Aachen» il1748 ha el survegnì inincumbensa da la curt roiala. Per festivar la fin da la guerra aveva il retg planisà in spectacul cun fieu artifizial e salvas donur. Händel ha gì lincumbensa da cumponer musica che tegna pitg a la canera dals chanuns. La finala èsi però vegnì tut auter (Music for the royal fireworks).

Soundtrack per la Championsleague

Er ina melodia, che cunzunt ils fans da ballape enconuschan oz, deriva da la plima da Händel. Per cumponer limni da la Champions League è Tony Britten sorientà il 1992 fitg ad in imni da Händel. Quel imni (Zadok the Priest) aveva Händel cumponì oriundamain per las festivitads dincurunaziun da King George II., lonn 1727.

Il halleluja or dal Messias

Igl è forsa il pli pompus halleluja insumma or da loratori, il Messias, che Händel ha cumponì il 1741. Il halleluja resuna a la fin da la segunda da trais parts. Cura chil retg George II. ha udì lemprima giada quest imni, saja el stà en pe tut commovì. Dapi lura èsi usit chils Englais stattan si per tadlar il halleluja da Händel.

Tschaiver en la musica classica

Nagin barlot, nagin tschaiver il 2021! E tuttina è il prinzi carnaval era quest onn preschent – almain en furma da musica! La Classica visita divers carnavals mess en musica da Johann Strauss, il bab (Carneval in Paris e Carneval da Vienna), da Johann Strauss, il figl (Carneval in Rom), dad Almiro Giampieri (Carneval di Venezia) e da Carl Michael Ziehrer il carnaval dals uffants (Faschingskinder-Walzer). Questa musica instrumental-orchestrala vegn munida cun chanzuns da Franz Schubert, chanzuns da ses ciclus: Die Winterreise. Sco interprets udin nus qua Matthias Goerne, chant e Graham Johnson, piano.