Málflutningur verður í Landsréttarmálinu fyrir yfirdeild Mannréttindadómstóls Evrópu í Strassborg í fyrramálið.

Barnahjálp Sameinuðu þjóðanna telur ekki réttlætanlegt að fjölskyldur sem sótt hafa um hæli hér á landi séu sendar aftur til Grikklands. Aðstæður þar séu afar bágbornar.

Flest bendir til þess að sólarhringsverkfall Eflingar verði á fimmtudaginn. Í dag voru um 3500 leikskólabörn send heim vegna aðgerða Eflingar.

Ný skýrsla um áhrifin af loðnubrestinum í fyrra leiðir í ljós að áhrifin voru enn meiri í Vestmannaeyjum en óttast var. Þetta segir bæjarstjórinn í Eyjum.

Veðurstofan spáir mikilli leysingu á morgun og fimmtudag, úrkomu og hlýindum. Þetta veldur vatnavöxtum víða um land.

Samfylkingin er næststærsti flokkurinn á Alþingi samkvæmt Þjóðarpúlsi Gallups. Fylgi hennar eykst úr 14 prósentum í 18. Sjálfstæðisflokkurinn mælist með 22 prósenta fylgi.

Fjallað um baráttufund Eflingar í Iðnó í dag. Arnar Páll Hauksson talar við Sólveigu Önnu Jónsdóttur, formann Eflingar.

Öryggisógnir tengdar uppbyggingu 5G háhraðanetsins hafa mikið verið til umræðu í Evrópu, þá sérstaklega meintar ógnir tengdar aðkomu kínverska fjarskiptarisans Huawei. Íslensk stjórnvöld hafa lítið skipt sér af þessu en nú hefur orðið breyting þar á. Arnhildur Hálfdánardóttir segir frá og talar við Hrafnkel V. Gíslason og Heiðar Guðjónsson.

Hamfarahlýnun er að gera út af við Feneyjar Afríku. Saint-Louis í Senegal var höfuðborg nýlenduveldis Frakka í 250 ár en er nú að sökkva í sæ eins og fjöldi annarra borga og bæja. Rúmlega hundrað milljónir manna á vesturströnd Afríku þurfa hugsanlega að flýja flóðasvæði í náinni framtíð. Pálmi Jónasson segir frá.