Då Nell Irvin Painter gjekk av med som pensjon som historieprofessor på Princeton, byrja ho studere kunst. Denne erfaringa; å vere ei kvinne med eit langt liv bak seg midt i eit miljø av unge kreative, har ho skrive om i boka Old in Art School. Også Jan Grue har skildra korleis det er å vere nesten – men berre nesten – akkurat som alle andre. I Jeg lever et liv som ligner deres skriv han om å vere akademikar, forfattar og rullestolbrukar.

Dei to møtest til ein samtale om kropp, kunst og identitet. Samtalen blir leia av professor emeritus i litteraturvitskap, Per Buvik.

Velkommen til litteraturfestival 14.-17. februar 2019 på Litteraturhuset i Bergen: Fire dagar, 50-50 sakprosa og skjønnlitteratur, 50-50 internasjonalt og norsk program – litteratur, debatt, dans, teater, film, slam, performance, fest. 90 gjester frå meir enn 20 land.

I det mektige dikteposet Ædnan, som i vinter blei løna med den svenske, høgthengande Augustprisen, skriv Linnea Axelsson samefolkets historie. Det er ei historie prega av undertrykking og tvang, men òg av eit forhold til naturen som er ulikt det vi kjenner frå majoritetskulturen i Skandinavia. Korleis har naturen forma den samiske identiteten? Og korleis kan litteraturen formidle naturens verdi?

Axelsson møter litteraturvitar og journalist Astrid Hygen Meyer til samtale.

Carsten Jensen er ein av Nordens mest framståande forfattarar. Han har skrive og gitt ut bøker i fleire sjangrar og gitt seg i kast med ei lang rekke tema – men utsynet mot verda og dei store spørsmåla er ein alltid gjeldande fellesnemnar. Bøkene hans er omsett til fleire språk.

I denne samtalen med kritikar og journalist Jan H. Landro snakkar Jensen om skrivearbeidet og forfattarskapen.

«Gjennom heile oppveksten i dei kvite heimane kalla dei oss negerbarna.» I debutboka Eg snakkar om det heile tida spør Camara Lundestad Joof seg sjølv: Korleis var det eigentleg? Blei ho kalla svarting eller nigger? Blei ho slegen av den gamle dama, eller hugsar ho feil? Bør ho slutte å bry seg, slutte å snakke om det? «No er du svært sensitiv, vennen min, vi meiner jo ikkje noko vondt med det.»

Etter ei framsyning frå boka, møter Camara Lundestad Joof forskar og forfattar Kristina Leganger Iversen til samtale.

Den norske kyrkja er ikkje lenger ei statskyrkje. Korleis har ho endra seg? Og kva skal ho vere i dag? Journalist Tomm Kristiansen og prost Trond Bakkevig fortel sin versjon av dei siste femti års kyrkjehistorie i boka Da Gud skiftet mening.

I dette foredraget vil Tomm Kristiansen fortelje om korleis kyrkja har gått frå bibeltruskap til å vigsle kvinnelege prestar og homofile, og om kyrkja sitt engasjement i kampen mot apartheid, mot atomvåpen og for miljøet.

Etter å ha skrive sakprosabøker og essay om situasjonen i spanske Baskerland, ga Edurne Portela i 2017 ut romanen Mejor la ausencia. Boka følgjer hovudpersonen Amaia gjennom oppveksten i Bilbao i 1980- og 1990-åra, i eit miljø prega av politisk vald frå ETA, avindustrialisering og arbeidsløyse. Boka vann den spanske bokhandlarprisen.

Portela møter forfattar og historikar Sigrun Slapgard til ein samtale om korleis den blodige fortida pregar notida og om moglegheitene for frigjering som finst i litteraturen.

Noreg og Nigeria deler eit traume: Terrorangrep retta mot barn og ungdom. Korleis kan foreldra leve vidare når det aller verste har skjedd?

Det er eit av spørsmåla nigerianske Helon Habila stiller i dokumentarboka The Chibok Girls, som undersøker kva som skjedde da Boko Haram bortførte 276 jenter nord i Nigeria i 2014. I Brit Bildøen sin kritikarroste roman Sju dagar i august møter vi eit ektepar som framleis slit med sorga, åtte år etter at dottera døydde på Utøya 22. juli 2011.

Korleis forfattarar kan nærme seg slike traume, er tema når Bildøen og Habila møtest til samtale. Samtalen blir leia av forfattar Aage Storm Borchgrevink.

Lytteposten er LittfestBergens gratistilbod til deg som treng ein pause frå festivalprogrammet – men som ikkje har lyst til å ta den. Finn deg ein plass, len deg tilbake og høyr nokre av Noregs og verdas beste forfattarar lese frå bøkene sine.

I denne lytteposten kan du høyre Xiaolu Guo (Kina), Jennifer Makumbi (Uganda), Dubravka Ugrešić (Kroatia).

Midt i bølga av forfattarar som skriv med utgangspunkt i si eiga historie, er det mogleg å leite fram nokre som framleis stoler på fiksjonens kraft. Blant dei er bergensforfattarane Pedro Carmona-Alvarez og Gunnhild Øyehaug. Kvifor skriv dei som dei gjer? Synest dei at kollegaene er modige, eller berre fantasilause? Og blir dei nokon gong leie av å skulle finne på ting?

Carmona-Alvarez og Øyehaug møtest til ein humoristisk samtale om den sjølvbiografiske bølga sett (nesten) frå utsida. Samtaleleiar er Mona B. Riise.