Lytteposten er LittfestBergens gratistilbod til deg som treng ein pause frå festivalprogrammet – men som ikkje har lyst til å ta den. Finn deg ein plass, len deg tilbake og høyr nokre av Noregs og verdas beste forfattarar lese frå bøkene sine.

I denne lytteposten kan du høyre Xiaolu Guo (Kina), Jennifer Makumbi (Uganda), Dubravka Ugrešić (Kroatia).

Romanen Svar på brev frå Helga av Bergsveinn Birgisson består av kjærleiksbrev frå ein gammal mann på Island. Boka, som blei nominert til Nordisk råds litteraturpris, blir sett opp av Hordaland teater i 2019. Skodespelarane Helge Jordal og Ragnhild Gudbrandsen kjem til LittfestBergen for å lese eit utdrag frå boka.

Etter lesinga snakkar forfattar Bergsveinn Birgisson og teatersjef Solrun Toft Iversen om adaptasjon frå roman til scene. Samtalen blir leia av Eivind Riise Hauge.

Etter å ha skrive sakprosabøker og essay om situasjonen i spanske Baskerland, ga Edurne Portela i 2017 ut romanen Mejor la ausencia. Boka følgjer hovudpersonen Amaia gjennom oppveksten i Bilbao i 1980- og 1990-åra, i eit miljø prega av politisk vald frå ETA, avindustrialisering og arbeidsløyse. Boka vann den spanske bokhandlarprisen.

Portela møter forfattar og historikar Sigrun Slapgard til ein samtale om korleis den blodige fortida pregar notida og om moglegheitene for frigjering som finst i litteraturen.

Kva er norsk kultur? Kva er norsk identitet? Og korleis har dei blitt forma? Dette er spørsmål forfattaren Kaj Skagen nærmar seg i boka Norge, vårt Norge. Det vi oppfattar som «det norske» har blitt skapt gjennom motsetninga mellom metafysikk og sosial radikalisme, hevdar Skagen.

I dette foredraget fortel han om ånds- og idékampane som har lagt grunnlaget for det moderne Noreg, og kva som trugar den norske identiteten i dag.

Då Nell Irvin Painter gjekk av med som pensjon som historieprofessor på Princeton, byrja ho studere kunst. Denne erfaringa; å vere ei kvinne med eit langt liv bak seg midt i eit miljø av unge kreative, har ho skrive om i boka Old in Art School. Også Jan Grue har skildra korleis det er å vere nesten – men berre nesten – akkurat som alle andre. I Jeg lever et liv som ligner deres skriv han om å vere akademikar, forfattar og rullestolbrukar.

Dei to møtest til ein samtale om kropp, kunst og identitet. Samtalen blir leia av professor emeritus i litteraturvitskap, Per Buvik.

Noreg og Nigeria deler eit traume: Terrorangrep retta mot barn og ungdom. Korleis kan foreldra leve vidare når det aller verste har skjedd?

Det er eit av spørsmåla nigerianske Helon Habila stiller i dokumentarboka The Chibok Girls, som undersøker kva som skjedde da Boko Haram bortførte 276 jenter nord i Nigeria i 2014. I Brit Bildøen sin kritikarroste roman Sju dagar i august møter vi eit ektepar som framleis slit med sorga, åtte år etter at dottera døydde på Utøya 22. juli 2011.

Korleis forfattarar kan nærme seg slike traume, er tema når Bildøen og Habila møtest til samtale. Samtalen blir leia av forfattar Aage Storm Borchgrevink.

Frå stygt og rasande til høgstemt og lovprisande – poetar frå sju nasjonar og ein dansar møtest i ei lyrisk verd utanfor kartet. Topograf for kvelden er poeten Henning H. Bergsvåg (Noreg).

Kveldens poetar: Asieh Amini (Iran), Linnea Axelsson (Sverige), Kristina Leganger Iversen (Noreg), Camara Lundestad Joof (Noreg), Cecilie Løveid (Noreg), Kei Miller (Jamaica), Erlend O. Nødtvedt (Noreg), Mansur Rajih (Jemen), Ahmedur Rashid Chowdhury AKA Tutul (Bangladesh), Gunnar Wærness (Noreg) og dansar Mirte Bogaert (Belgia).

I det mektige dikteposet Ædnan, som i vinter blei løna med den svenske, høgthengande Augustprisen, skriv Linnea Axelsson samefolkets historie. Det er ei historie prega av undertrykking og tvang, men òg av eit forhold til naturen som er ulikt det vi kjenner frå majoritetskulturen i Skandinavia. Korleis har naturen forma den samiske identiteten? Og korleis kan litteraturen formidle naturens verdi?

Axelsson møter litteraturvitar og journalist Astrid Hygen Meyer til samtale.

Kjærleik, kjønnsidentitet og frigjering: Det er ikkje små tema Rupert Thomson tek opp i sin nyaste roman Never anyone but you, som er ei fiksjonalisert framstilling av liva til dei franske surrealistane Claude Cahun og Marcel Moore under den tyske okkupasjonen. Både som livspartnarar og som kunstnarar utfordra dei to førestillingane om kva kvinner, kunst og kjærleik kan vere.

Thomson møter Mona B. Riise til ein samtale om liv, skrift og sjølvframstilling.

Len deg tilbake og lytt til tre forfattarar som alle behandlar det vonde i litteraturen, men på kvart sitt språk, frå kvart sitt kontinent, i ulike sjangrar og med kvar si unike stemme.

Hakan Günday (Tyrkia), Helon Habila (Nigeria) og Juan Gabriel Vásquez (Colombia) les utvalde tekstar frå bøkene sine i engelsk omsetjing.