ក្នុងនាមជា​ប្រធាន​អាស៊ាន​ប្តូរវេន​ឆ្នាំ​២០២២​នេះ ​ប្រទេស​កម្ពុជា​កាលពីពេល​ថ្មី​ៗ​នេះ ​បាន​ប្រកាស​លើកពេល​កិច្ចប្រជុំ​រដ្ឋមន្ត្រី​ការបរទេស​អាស៊ាន​ដែល​គ្រោងធ្វើ​នៅថ្ងៃ​ទី​១៨-​១៩ ខែ​មករា​នេះ ​ទៅថ្ងៃក្រោយ​ដោយហេតុផល​សមាជិក​អាស៊ាន​មួយចំនួន​មានការ​លំបាក​ក្នុងការ​ធ្វើ​ដំណើរ។ ​ជុំវិញ​បញ្ហា​នេះ ​លោក ​គង់ ភោគ ​រដ្ឋលេខាធិការ​ក្រសួង​ការបរទេស ​និង​ជា​អតីត​អគ្គលេខាធិការរង​អាស៊ាន​រយៈពេល​៣​ឆ្នាំ​កន្លង​ទៅ ​ថ្លែងបញ្ជាក់​បន្ថែម​ថា ​ការលើកពេល​នេះ​គឺជា​ការជួយសម្រួល​ដល់​មិត្ត​អាស៊ាន​ផ្សេងទៀត ​ដើម្បី​ឲ្យ​ពួកគេ​ចូលរួម​ចំណែក ​និង​ផ្តល់​យោបល់​បាន​ពេញលេញ ​ខណៈ​ប្រទេស​អាស៊ាន​មួយចំនួនធំ​ទៀត​បាន​ជូនដំណឹង​ពីការ​ចូលរួម​រួចហើយ​ ដើម្បី​គាំទ្រ​ភាព​ជា​ប្រធាន ​និង​ស្វែងរក​ដំណោះស្រាយ​រួមគ្នា​។