ដោយ​សារ​តែ​ការ​ចរ​ចា​មិន​ត្រូវ​គ្នាជា​ច្រើន​លើក​ច្រើន​សារ​មក​នេះ ​ក្រសួង​ការងារ​បាន​ទុក​ពេល​ឲ្យ​ភាគី​វិវាទ​នៅ​ក្រុម​ហ៊ុន​ណាហ្គាវើលដ៍​អាច​ជួប​មុខ​គ្នា​សារ​ជា​ថ្មី​នៅ​ក្នុង​រយៈ​ពេល​ជិត​១ខែ​ខាង​មុខ​ទៀត​។​ ការ​ពន្យា​សម្រុះ​សម្រួល​នេះ​ត្រូវ​បាន​អ្នក​ការពារ​សិទ្ធិ​ការងារ​យល់​ថា​ ជា​ចេតនា​ដាក់​សម្ពាធ​ដល់​ភាគី​កម្មករ ​នៅគ្រា​ដែល​អ្នក​តវ៉ា​កំពុង​ជាប់​បណ្តឹង​នៅ​តុលាការ​​ដែល​ប្តឹង​ដោយ​ភាគី​ថៅកែ។​ លោក​ មឿន​ តុលា​ នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ ​និង​សិទ្ធិមនុស្ស​​ហៅកាត់ថា ​សង់ត្រាល់​ លើក​ឡើង​ថា​ អធិការកិច្ច​ការងារ​គួរ​សិក្សា​ពី​ឬស​គល់​នៃ​ការ​រើស​អើង​សហជីព​នៅ​ក្រុម​ហ៊ុន​ណាហ្គាវើលដ៍​ឲ្យ​បាន​លំអិត​ ខណៈ​លោក​យល់​ថា ​វិវាទ​អូស​បន្លាយ​នេះ​ផ្តើម​ចេញ​ពី​ការ​រើសអើង​សហជីព​។​